Thalapathy Vijay: పూల‌ను బాంబ్ అనుకొని ప‌రుగో ప‌రుగు.. మీమ్ మెటీరియ‌ల్‌గా ద‌ళ‌ప‌తి విజ‌య్ వీడియో.. నెట్టింట వైర‌ల్‌

Thalapathy Vijay: తమిళనాడులో ఎన్నికల ప్రచారం నిర్వహిస్తున్న టీవీకే అధినేత విజయ్ కన్యాకుమారిలో సైకిల్ యాత్ర చేస్తూ ఒక్కసారిగా భయాందోళనకు గురయ్యాడు. ఒక అభిమాని పూలు చల్లగా, అది ఏదో ప్రమాదమని భావించి అతను పరుగు తీశాడు. ఈ వీడియో నెట్టింట వైరల్ గా మారింది.

తమిళ స్టార్ హీరో, తమిళగ వెట్రి కజగం (TVK) పార్టీ వ్యవస్థాపకుడు దళపతి విజయ్ లేటెస్ట్ వీడియో ఒకటి సోషల్ మీడియాలో తెగ చక్కర్లు కొడుతోంది. ఈ వీడియో ‘మీమ్ మెటీరియల్’గా మారిందనే కామెంట్లు వస్తున్నాయి. కన్యాకుమారిలో ఎన్నికల ప్రచారంలో విజయ్ భయంతో తన బస్ లోకి వెళ్లడం హాట్ టాపిక్ గా మారింది.

ప్రచారంలో దళపతి విజయ్ (PTI)

విజయ్ ప్రచారం

సినిమాలకు గుడ్ బై చెప్పి పాలిటిక్స్ లో ఎంటరైన తమిళ స్టార్ హీరో దళపతి విజయ్ ఈ ఎన్నికల్లో పార్టీ ప్రచారాన్ని పరుగులు పెట్టిస్తున్నారు. ఒంటరిగానే పోటీ చేస్తున్న విజయ్ ఎలాగైనా పార్టీని అధికారంలోకి తీసుకురావాలని ప్రయత్నిస్తున్నాడు. ఈ క్రమంలో ప్రచారం జోరుగా నిర్వహిస్తున్నాడు. తాజాగా కన్యాకుమారిలో ప్రచారంలో భాగంగా సైకిల్ తొక్కుతూ రోడ్డుపై విజయ్ వెళ్లాడు.

బాంబ్ అనుకొని

విజయ్ తన సెక్యూరిటీ సిబ్బంది వెంటరాగా ఉత్సాహంగా సైకిల్ తొక్కుతూ రోడ్డుపై వెళ్లాడు. ఇరువైపులా ఉన్న అభిమానులకు అభివాదం చేస్తూ ముందుకు సాగుతున్న సమయంలో.. ఒక అభిమాని హఠాత్తుగా విజయ్ పైకి పూల రెక్కలు చల్లేందుకు ప్రయత్నించాడు.

అయితే. ఊహించని విధంగా తనపైకి ఏదో వస్తువు విసిరినట్లు భావించిన విజయ్, అది బాంబ్ అనుకొని భయపడినట్లు కనిపించాడు. వెంటనే సైకిల్ దిగిపోయి, వెనుకాలే వస్తున్న తన ప్రచార వాహనం (వ్యాన్) వైపు వేగంగా పరుగులు తీశాడు. ఆ సమయంలో విజయ్ ముఖంలో స్పష్టమైన ఆందోళన కనిపించింది.

వీడియో వైరల్

ఈ వీడియో ఇప్పుడు సోషల్ మీడియాలో తెగ వైరల్ గా మారింది. ‘‘టీవీకే హ్యాండిల్ తొలుత ఈ వీడియోను పోస్ట్ చేసి, ఆ తర్వాత డిలీట్ చేసింది. సైకిల్ పై ప్రచారంలో ఉన్న విజయ్, అభిమాని పూలు చల్లగానే అది బాంబు అనుకుని సైకిల్ వదిలేసి పరుగులు తీశాడు" అని ఓ యూజర్ ఎక్స్ లో పోస్టు చేశాడు. ఈ వీడియో ప్రస్తుతం వివిధ ప్లాట్‌ఫారమ్‌లలో విపరీతంగా షేర్ అవుతోంది.

మీమ్ మెటీరియల్

విజయ్ వీడియోపై నెటిజన్లు భిన్నంగా స్పందిస్తున్నారు. కొంతమంది దీనిని 'మీమ్ మెటీరియల్' గా అభివర్ణిస్తూ జోకులు పేలుస్తున్నారు. "తమిళనాడు రాజకీయాల్లో వినోదానికి కొదవ లేదు" అని ఒకరు వ్యాఖ్యానించగా.. "తానే మాస్టర్ అని పిలుచుకునే వ్యక్తి, పూలదండను బ్లాస్టర్ అనుకుని ఫాస్టర్ గా పరిగెత్తారు" అంటూ ఒక ఎక్స్ యూజర్ ఎద్దేవా చేశారు. "జోసెఫ్ విజయ్.. ఇది సినిమా కాదు, నిజ జీవితంలోకి రా" అంటూ మరికొందరు విమర్శలు గుప్పించారు.

ఫ్యాన్స్ సపోర్ట్

విజయ్ అభిమానులు మాత్రం తమ నాయకుడికి మద్దతుగా నిలుస్తున్నారు. గతంలో కరూర్ వంటి ప్రాంతాల్లో జరిగిన కొన్ని చేదు అనుభవాలు లేదా భద్రతా పరమైన హెచ్చరికల వల్ల ఆయన అలా స్పందించి ఉండవచ్చని వారు విశ్లేషిస్తున్నారు. "ఆయన భద్రతా సిబ్బంది ముందే అప్రమత్తంగా ఉండాల్సింది. బహిరంగంగా సైకిల్ పై వెళ్తున్నప్పుడు ఎవరైనా హఠాత్తుగా అలా దగ్గరకు వస్తే ఎవరికైనా భయం కలుగుతుంది" అని అభిమానులు సోషల్ మీడియా వేదికగా సమర్థిస్తున్నారు.

రాబోయే తమిళనాడు అసెంబ్లీ ఎన్నికల్లో పోటీ చేసేందుకు విజయ్ సిద్ధమవుతున్నారు. ఆయన నటించిన చివరి చిత్రం 'జన నాయగన్' లీక్ కలకలం రేపుతోన్న సంగతి తెలిసిందే.