E-Paper
Vijay Jana Nayagan: నా చివరి సినిమా ఎందుకు ఆపారు.. నన్ను మోసం చేశారు.. నాకు న్యాయం కావాలి: దళపతి విజయ్
Vijay Jana Nayagan: తమిళనాడు ఎన్నికల బరిలో నిలిచిన టీవీకే అధినేత విజయ్ గురువారం (ఏప్రిల్ 2) తిరుచ్చిలో నామినేషన్ దాఖలు చేశాడు. తన చివరి చిత్రం 'జన నాయగన్' విడుదలను అడ్డుకోవడం వెనుక రాజకీయ కుట్ర ఉందని ఆయన ప్రత్యర్థులపై విరుచుకుపడ్డారు.
తమిళనాడు రాజకీయ తెరపై కొత్త అధ్యాయం మొదలైంది. తమిళ సూపర్ స్టార్, 'తమిళగ వెట్రి కళగం' (TVK) వ్యవస్థాపకుడు విజయ్ గురువారం (ఏప్రిల్ 2) తిరుచ్చిలో తన నామినేషన్ పత్రాలను సమర్పించారు. ఈ సందర్భంగా తరలివచ్చిన అశేష జనవాహినిని ఉద్దేశించి ఆయన ప్రసంగిస్తూ.. అధికార డీఎంకే ప్రభుత్వంపై నిప్పులు చెరిగారు. తన రాజకీయ ప్రవేశాన్ని అడ్డుకోవడానికి అన్ని పార్టీలు ఏకమయ్యాయని, తన చివరి చిత్రం 'జన నాయగన్' విడుదల కాకుండా కుట్ర పన్నాయని ఆయన ఆరోపించారు.
నామినేషన్ వేళ జనసంద్రం
దళపతి విజయ్ నామినేషన్ వేయడానికి వస్తున్నారని తెలియడంతో తిరుచ్చి వీధులన్నీ అభిమానులతో కిక్కిరిసిపోయాయి. భారీ జనసందోహం మధ్య ఆయన వాహనం నెమ్మదిగా కదిలింది. ఈ క్రమంలో దారిలో కిందపడిపోయిన దంపతులను చూసి విజయ్ తన వాహనం దిగి స్వయంగా వారిని పరామర్శించడం అక్కడి వారిని ఆకట్టుకుంది. అనంతరం ఆయన పెరంబూర్, తిరుచ్చి ఈస్ట్ నియోజకవర్గాల అభ్యర్థిగా నామినేషన్ దాఖలు చేశారు.
'జన నాయగన్' విడుదలపై రాజకీయ కుట్ర?
ప్రసంగంలో విజయ్ ప్రధానంగా తన సినిమా విడుదల ఆలస్యం గురించి మాట్లాడారు. "మీ విజయ్ను వ్యతిరేకించడానికి అన్ని పార్టీలు ఎలా ఏకమయ్యాయో నేను ప్రత్యేకంగా చెప్పక్కర్లేదు. కరూరులో జరిగిన తొక్కిసలాట ఘటన వెనుక, అలాగే నా చివరి సినిమా 'జన నాయగన్' విడుదల కాకుండా అడ్డుకోవడం వెనుక పెద్ద కుట్ర దాగి ఉంది. ఆ సినిమా విడుదలైతే మన మధ్య ఉన్న బంధం మరింత బలపడుతుందని, అది ఎన్నికల్లో ఒక శక్తివంతమైన ఆయుధంగా మారుతుందని భయపడే ఇలా చేశారు. వాళ్లు మోసం చేశారు. మీ సోదరుడిగా, మీ కుమారుడిగా నాకు న్యాయం కావాలి" అని ఆయన ఉద్వేగంగా అన్నారు.
"నేను అన్ని విలాసాలను వదులుకుని మీ కోసం వచ్చాను. ప్రజలకు వ్యతిరేకంగా పనిచేసే స్టాలిన్ కావాలా? లేక ప్రజల కోసం పనిచేసే విజయ్ కావాలా? అన్నదే ఈ ఎన్నికల సారాంశం. ఈ 'దుష్టశక్తి' డీఎంకే ప్రభుత్వాన్ని గద్దె దించాలి" అని ఓటర్లకు పిలుపునిచ్చారు.
సెన్సార్ చిక్కుల్లో 'జన నాయగన్'
హెచ్. వినోద్ దర్శకత్వంలో రూపొందిన 'జన నాయగన్' మూవీ వాస్తవానికి సంక్రాంతి కానుకగా జనవరి 9న విడుదల కావాల్సింది. పూజా హెగ్డే, మమితా బైజు, బాబీ డియోల్ కీలక పాత్రల్లో నటించిన ఈ సినిమా.. తెలుగులో బాలకృష్ణ నటించిన 'భగవంత్ కేసరి'కి రీమేక్గా ప్రచారం జరుగుతోంది.
అయితే సెన్సార్ బోర్డు (CBFC) నుంచి క్లియరెన్స్ రాకపోవడంతో విడుదల నిలిచిపోయింది. దీనివల్ల సుమారు రూ. 100 కోట్ల నష్టం వాటిల్లుతుందని నిర్మాతలు కోర్టును ఆశ్రయించినా ఫలితం లేకపోయింది. చిత్రంలో కొన్ని అభ్యంతరకర సన్నివేశాలు ఉన్నాయన్న కారణంతో రివైజింగ్ కమిటీకి పంపడంపై విజయ్ అభిమానులు తీవ్ర ఆగ్రహం వ్యక్తం చేస్తున్నారు. ఈ ఎన్నికల పోరులో విజయ్ మొదటిసారి ప్రత్యక్షంగా పోటీ చేస్తుండటంతో తమిళనాడు రాజకీయాలు ఆసక్తికరంగా మారాయి.
తరచుగా అడిగే ప్రశ్నలు (FAQ)
1. విజయ్ ఏ నియోజకవర్గాల నుండి పోటీ చేస్తున్నారు?
విజయ్ తమిళనాడు అసెంబ్లీ ఎన్నికల్లో పెరంబూర్, తిరుచ్చి ఈస్ట్ (Trichy East) నియోజకవర్గాల నుండి పోటీ చేస్తున్నారు.
2. 'జన నాయకన్' సినిమా విడుదల ఎందుకు ఆలస్యమైంది?
సెన్సార్ బోర్డు (CBFC) నుంచి సర్టిఫికేషన్ రావడంలో జాప్యం జరగడం వల్ల ఈ సినిమా విడుదల నిలిచిపోయింది. చిత్రంలోని కొన్ని సన్నివేశాలపై అభ్యంతరాలు వ్యక్తం కావడంతో దీన్ని రివైజింగ్ కమిటీకి పంపారు.
3. విజయ్ తన ప్రసంగంలో ఏయే అంశాలను ప్రస్తావించారు?
తన సినిమా విడుదలపై కుట్ర జరుగుతోందని, కరూరు తొక్కిసలాట ఘటన వెనుక కూడా రాజకీయం ఉందని విజయ్ ఆరోపించారు. ప్రస్తుత డీఎంకే ప్రభుత్వాన్ని ఓడించాలని ప్రజలను కోరారు.
