E-Paper
Deva Death: సినీ లోకంలో విషాదం- ప్రసిద్ధ సంగీత దర్శకుడు దేవా కన్నుమూత- రజనీకాంత్ టైటిల్ కార్డ్ బీజీఎమ్ కొట్టింది ఈయనే!
Music Director Deva Passed Away At 75: దక్షిణ భారత చలనచిత్ర పరిశ్రమలో 'గానా మేస్ట్రో'గా గుర్తింపు పొందిన ప్రముఖ సంగీత దర్శకుడు దేవా (75) చెన్నైలోని ఆసుపత్రిలో శనివారం తుదిశ్వాస విడిచారు. 40 ఏళ్ల సినీ ప్రయాణంలో 400కి పైగా చిత్రాలకు స్వరాలు అందించిన ఆయన మృతిపట్ల పలువురు సినీ ప్రముఖులు సంతాపం తెలిపారు.
Prefer HTon Google
Music Director Deva Passed Away At 75: దక్షిణాది చిత్ర పరిశ్రమలో తనదైన జానపద 'గానా' పాటలతో శ్రోతలను ఊపేసిన ప్రముఖ సంగీత దర్శకుడు దేవా (దేవనేసన్ చొక్కలింగం) కన్నుమూశారు. 75 సంవత్సరాల వయస్సున్న ఆయన చెన్నైలోని ప్రైవేట్ ఆసుపత్రిలో శనివారం (అక్టోబర్ 17) తుదిశ్వాస విడిచారు.
తెలుగు, తమిళ, కన్నడ పరిశ్రమలో విషాదం
దేవనేసన్ చొక్కలింగ మృతికి గల కారణాలను కుటుంబ సభ్యులు ఇంకా వెల్లడించలేదు. అభిమానులు, సినీ ప్రముఖుల ఆఖరి చూపు కోసం ఆయన భౌతిక కాయాన్ని చెన్నై టీ నగర్‌లోని ఆయన నివాసంలో ఉంచారు. దేవా అకస్మాత్తుగా దూరమవ్వడంతో తమిళంతో పాటు తెలుగు, కన్నడ సినీ వర్గాలు తీవ్ర దిగ్భ్రాంతి వ్యక్తం చేస్తున్నాయి.
తమిళ జానపదానికి పట్టం కట్టిన సంగీత వేత్త
సాధారణంగా వీధులకే పరిమితమైన తమిళ జానపద ‘గానా’ శైలిని వెండితెరపైకి తీసుకొచ్చి, దానికి విశేష ప్రజాదరణ కల్పించిన ఘనత దేవాకే దక్కుతుంది. తన విలక్షణమైన స్వరాలు, వినసొంపైన మెలోడీలతో కొన్ని దశాబ్దాల పాటు కోలీవుడ్‌ను ఊపేసారు.
తమిళ చిత్రసీమలో తనకంటూ ఒక ప్రత్యేక అధ్యాయాన్ని లిఖించుకున్నారు దేవా. నాలుగు పదుల సినీ సుదీర్ఘ ప్రయాణంలో తమిళం, తెలుగు, కన్నడ, మలయాళ భాషల్లో ఏకంగా 400 కంటే ఎక్కువ చిత్రాలకు అద్భుతమైన పాటలు, నేపథ్య సంగీతం అందించారు.
రజనీకాంత్ టైటిల్ కార్డ్ వెనుక
సూపర్ స్టార్ రజనీకాంత్ చిత్రాలు ప్రారంభమయ్యేటప్పుడు వచ్చే ఐకానిక్ 'రజనీ టైటిల్ కార్డ్' థీమ్ మ్యూజిక్ వెనుక ఉన్నది ఈయన స్వరకల్పనే కావడం విశేషం. ఇప్పటికీ రజనీ సినిమా మొదలవుతుంటే థియేటర్లలో వినిపించే ఆ విజిల్, రోమాంచిత సంగీతం దేవా మార్క్ ముద్రకు నిదర్శనం.
రజనీకాంత్ నటించిన 'బాషా', 'అరుణాచలం' వంటి బ్లాక్‌బస్టర్ సినిమాలకు దేవా ఇచ్చిన మాస్, మెలోడీ పాటలను తెలుగు ప్రేక్షకులు ఇప్పటికీ మరచిపోలేరు. సినిమాల్లోకి రాకముందు దేవా ప్రయాణం ఎన్నో సవాళ్లతో సాగింది. చిత్ర పరిశ్రమలో ప్రారంభంలో చిన్నచిన్న అవకాశాలు వచ్చినా, ఆ తర్వాత కొంతకాలం సినిమాలకు దూరంగా ఉన్నారు.
కృషితో సాగిన తొలి అడుగులు
ఆ సమయంలో దూరదర్శన్ పోదిగై ఛానెల్‌లో 'వయలుమ్ వాళ్వుమ్' అనే కార్యక్రమానికి పాటలు స్వరపరిచారు. ప్రముఖ సంగీత దర్శకుడు ఇళయరాజా గురువైన ధన్‌రాజ్ మాస్టర్ వద్దే దేవా పియానో నేర్చుకున్నారు. జేబీ కృష్ణ వద్ద హార్మోనియంపై భారతీయ శాస్త్రీయ సంగీతాన్ని అభ్యసించారు. 1980ల కాలంలో వందలాది భక్తి గీతాలను స్వరపరిచి శ్రోతలను అలరించారు.
దేవా సోదరులు సబేష్, మురళి ఇళయరాజాతో పాటు ఇతర ప్రముఖ సంగీత దర్శకుల వద్ద వాద్యకారులుగా పనిచేసేవారు. దేవా సినీ ప్రవేశంలో, ఆయన సక్సెస్ జర్నీలో సోదరుల మద్దతు ఎంతో కీలక పాత్ర పోషించింది.
స్టార్ డైరెక్టర్‌గా నిలబెట్టిన సినిమా
1986లో వచ్చిన 'మాట్టుక్కార మన్నారు' చిత్రంతో దేవా స్వతంత్ర సంగీత దర్శకుడిగా తన ప్రస్థానాన్ని ప్రారంభించారు. 1989లో విడుదలైన 'మనసుక్కేత మహరాస', ఆ తర్వాత వచ్చిన 'వైగాసి పొరంథాచ్చు' వంటి చిత్రాలు ఆయనను స్టార్ మ్యూజిక్ డైరెక్టర్‌గా నిలబెట్టాయి. దేవా మృతితో దక్షిణాది సంగీత ప్రపంచం ఒక దిగ్గజాన్ని కోల్పోయింది.
