E-Paper
Maatrubhumi: మోదీ సర్కార్‌కు అంత ధైర్యం లేదు.. అందుకే ఆ సినిమాను మళ్లీ షూట్ చేశారు: యూట్యూబర్ సంచలన ఆరోపణలు
Maatrubhumi: సల్మాన్ ఖాన్ మాతృభూమి మూవీ గురించి చెబుతూ మరోసారి మోదీ సర్కార్ ను లక్ష్యంగా చేసుకున్నారు ప్రముఖ యూట్యూబర్ ధ్రువ్ రాఠీ. ఈ సినిమాలో సీన్లను చైనాకు అనుకూలంగా మరోసారి షూటింగ్ చేయాల్సి వచ్చిందని అనడం గమనార్హం.
Prefer HTon Google
Maatrubhumi: బాలీవుడ్ స్టార్ హీరో సల్మాన్ ఖాన్ లీడ్ రోల్‌లో నటిస్తున్న మోస్ట్ అవైటెడ్ యాక్షన్ డ్రామా 'మాతృభూమి' (Matrubhoomi) మరోసారి వివాదాల సుడిగుండంలో చిక్కుకుంది. గత కొంతకాలంగా వివిధ కారణాలతో వాయిదా పడుతూ వస్తున్న ఈ సినిమా చుట్టూ ఇప్పుడు కొత్త రాజకీయం తెరపైకి వచ్చింది. ప్రముఖ యూట్యూబర్, సోషల్ మీడియా అనలిస్ట్ ధ్రువ్ రాఠీ (Dhruv Rathee) ఈ సినిమా షూటింగ్ రీషూట్ వెనుక ఉన్న అసలు కారణాలంటూ సంచలన ఆరోపణలు చేశారు.
ఢిల్లీలో అక్టోబర్ 11న జరిగిన ఒక ప్రత్యేక ప్రెస్ మీట్‌లో ఆయన చేసిన వ్యాఖ్యలు ప్రస్తుతం బాలీవుడ్ వర్గాల్లోనూ, సోషల్ మీడియాలోనూ పెద్ద ఎత్తున దుమారం రేపుతున్నాయి. చైనాను వ్యతిరేకంగా చూపించే సన్నివేశాలను మార్చడం కోసమే ఈ సినిమాను బలవంతంగా రీషూట్ చేయించారంటూ ఆయన విమర్శించారు.
చైనాకు అనుకూలంగా మార్పులు చేయించారంటూ ఆరోపణ
'మాతృభూమి - మే వార్ రెస్ట్ ఇన్ పీస్' పేరుతో రూపొందుతున్న ఈ చిత్రానికి మొదట 'గాల్వన్' (Galwan) అనే టైటిల్ ఖరారు చేసిన సంగతి తెలిసిందే. భారత్-చైనా సరిహద్దుల్లోని గాల్వన్ లోయలో జరిగిన ఘర్షణల నేపథ్యంలో ఈ కథను తెరకెక్కించారు. అయితే రాజకీయ కారణాల వల్ల చిత్ర యూనిట్ టైటిల్ మార్చాల్సి వచ్చింది. ఈ నేపథ్యంలోనే ధ్రువ్ రాఠీ మాట్లాడుతూ.. ప్రభుత్వ ఒత్తిళ్ల కారణంగానే సినిమాను మళ్లీ షూట్ చేయాల్సి వచ్చిందని పేర్కొన్నారు.
మీడియాతో మాట్లాడిన ధ్రువ్ రాఠీ.. "సల్మాన్ ఖాన్ నటిస్తున్న ఒక సినిమా చైనాకు వ్యతిరేకంగా కొన్ని అంశాలతో తెరకెక్కుతోంది. ఆ సినిమాను అలాగే రిలీజ్ చేయడానికి ప్రభుత్వం అస్సలు ఇష్టపడలేదు. చైనాను నెగెటివ్‌గా చూపించడం ఇష్టం లేకనే ఆ సినిమా పూర్తి షూటింగ్‌ను మళ్లీ చేయాల్సి వచ్చింది" అంటూ తీవ్ర ఆరోపణలు గుప్పించారు. ప్రభుత్వానికి వ్యతిరేకంగా వెళ్లే ధైర్యం ఎవరికీ ఉండదని ఆయన వ్యాఖ్యానించారు.
సోషల్ మీడియాలో రగులుతున్న కొత్త డిబేట్
ధ్రువ్ రాఠీ చేసిన ఈ వ్యాఖ్యలు ఇంటర్నెట్‌లో క్షణాల్లో వైరల్ అయ్యాయి. సల్మాన్ ఖాన్ డైరెక్ట్ ఫ్యాన్స్ మాత్రం ఈ ఆరోపణలను తీవ్రంగా ఖండిస్తున్నారు. సినిమాను కేవలం కమర్షియల్, క్రియేటివ్ కారణాల వల్లే మార్చారని, రాజకీయ లబ్ధి కోసం ఇలాంటి విమర్శలు చేయడం సరికాదని మండిపడుతున్నారు. మరోవైపు కొందరు నెటిజన్లు మాత్రం జవాన్ల త్యాగాల నేపధ్యంలో తెరకెక్కుతున్న సినిమాలపై ఇలాంటి ఆంక్షలు ఉండకూడదని అభిప్రాయపడుతున్నారు.
ఇప్పటికే ఈ సినిమా నుంచి కొన్ని సాంగ్స్ రిలీజ్ కాగా, దీపావళి కానుకగా నవంబర్ 13న సినిమాను థియేటర్లలోకి తీసుకురావడానికి మేకర్స్ సన్నాహాలు చేస్తున్నారు. అయితే సెన్సార్ ప్రక్రియ, ప్రభుత్వ అనుమతుల విషయంలో నెలకొన్న ఈ వివాదాలు సినిమా విడుదలపై ఎలాంటి ప్రభావం చూపుతాయో వేచి చూడాలి. ప్రస్తుతం ఢిల్లీలో సీఈసీ జ్ఞానేష్ కుమార్ రాజీనామా డిమాండ్ చేస్తూ సీజేపీ ఆధ్వర్యంలో నిరసనలు జరుగుతున్న విషయం తెలిసిందే. ఇందులో భాగంగా మొదటి నుంచీ మోదీ సర్కార్ కు వ్యతిరేకంగా మాట్లాడుతూ వస్తున్న ధ్రువ్ రాఠీ.. తాజాగా సల్మాన్ ఖాన్ మాతృభూమి మూవీని తెరపైకి తీసుకురావడం గమనార్హం.
