ఫుకెట్-ఢిల్లీ ఎయిర్ ఇండియా విమానంలో తీవ్ర కుదుపులు: ఏడుగురికి గాయాలు

థాయిలాండ్‌లోని ఫుకెట్ నుంచి ఢిల్లీ వస్తున్న ఎయిర్ ఇండియా విమానంలో తీవ్రమైన కుదుపులు (Turbulence) చోటుచేసుకున్నాయి. విమానం సురక్షితంగా ల్యాండ్ అయినప్పటికీ, గాయపడిన ఏడుగురు ప్రయాణికులను వసంత కుంజ్‌లోని ఫోర్టిస్ ఆసుపత్రికి తరలించి అత్యవసర చికిత్స అందిస్తున్నారు.

థాయిలాండ్‌లోని ఫుకెట్ నుంచి ఢిల్లీకి ప్రయాణిస్తున్న ఎయిర్ ఇండియా (AI2379) విమానంలో ఆందోళనకర సంఘటన చోటుచేసుకుంది. ఆకాశంలో ప్రయాణిస్తున్న సమయంలో అకస్మాత్తుగా తీవ్రమైన కుదుపులు ఎదురవ్వడంతో విమానం ఒక్కసారిగా ఊగిసలాడి ఎత్తు మారింది.

ఫుకెట్-ఢిల్లీ ఎయిర్ ఇండియా విమానంలో తీవ్ర కుదుపులు: ఏడుగురికి గాయాలు (ANI Video Grab)

విమానం ఢిల్లీలోని ఇందిరా గాంధీ అంతర్జాతీయ విమానాశ్రయంలో సురక్షితంగా ల్యాండ్ అయినప్పటికీ, ఈ కుదుపుల కారణంగా పలువురు ప్రయాణికులు గాయపడ్డారు. విమానం దిగిన వెంటనే విమానాశ్రయ వైద్య బృందం బాధితులకు ప్రాథమిక చికిత్స అందించింది.

ఆసుపత్రిలో 'కోడ్ ఎల్లో' ప్రకటన.. అత్యవసర వైద్యం

ప్రమాద సమాచారం అందుకున్న వెంటనే ఢిల్లీ వసంత కుంజ్‌లోని ఫోర్టిస్ ఆసుపత్రి వర్గాలు వేగంగా స్పందించాయి. గాయపడిన ఏడుగురు ప్రయాణికులను ఆసుపత్రి అత్యవసర విభాగానికి (ER) తరలించారు. బాధితులకు తక్షణమే చికిత్స అందించేందుకు ఆసుపత్రి యాజమాన్యం 'కోడ్ ఎల్లో' (Code Yellow) ప్రోటోకాల్‌ను అమల్లోకి తెచ్చింది.

గాయపడిన ప్రయాణికులకు అవసరమైన సీటీ స్కాన్లు, ఎంఆర్‌ఐ, ఎక్స్-రే వంటి రేడియోలాజికల్ పరీక్షలు నిర్వహిస్తున్నట్లు వైద్యులు తెలిపారు. ప్రయాణికులను పరిశీలన కోసం ఇన్‌పేషెంట్ వార్డులకు తరలించారు. బాధితుల కుటుంబ సభ్యులకు సమాచారం అందించేందుకు, వైద్య పత్రాలు, ఇతర సహాయక చర్యల కోసం ఎయిర్ ఇండియా ప్రత్యేక బృందాన్ని ఆసుపత్రి వద్ద అందుబాటులో ఉంచింది.

తలలు, వీపు భాగాలకు గాయాలు

విమానాశ్రయం వెలుపల అంబులెన్సులు సిద్ధంగా ఉంచగా, కొందరు ప్రయాణికులు వీల్‌చైర్లపై, కట్టుకట్టిన గాయాలతో బయటకు రావడం కనిపించింది.

"విమానంలో ఒక్కసారిగా తీవ్రమైన కుదుపులు వచ్చాయి. గాల్లో విమానం ఊగిసలాడటంతో చాలామంది కిందపడిపోయారు. కొందరి తలలు, వీపు భాగాలకు గాయాలయ్యాయి" అని విమాన ప్రయాణికుడు ఒకరు తెలిపారు.

భయపడాల్సిన పనిలేదు: ఎయిర్ ఇండియా స్పష్టత

ఈ ఘటనపై ఎయిర్ ఇండియా సంస్థ అధికారిక ప్రకటన విడుదల చేసింది. "ప్రయాణంలో ఊహించని రీతిలో చిన్నపాటి కుదుపులు ఎదురవ్వడం వల్ల విమాన ఎత్తులో తాత్కాలిక మార్పు వచ్చింది. ప్రయాణికులకు ఎలాంటి తీవ్రమైన గాయాలు కాలేదు. ముందస్తు జాగ్రత్తగా కొందరు ప్రయాణికులను, విమాన సిబ్బందిని ఆసుపత్రికి తరలించి వైద్య పరీక్షలు నిర్వహిస్తున్నాం" అని ఎయిర్ ఇండియా ప్రతినిధి వివరించారు.

బాధితులకు అవసరమైన పూర్తి సహాయ సహకారాలు అందిస్తున్నామని, ఈ ఘటనపై విమానయాన నియంత్రణ అధికారుల విచారణకు సహకరిస్తున్నామని సంస్థ వెల్లడించింది.