బ్యాంకు ఖాతాదారులకు అలెర్ట్: నేడు సెప్టెంబర్ 26న బ్యాంకులు పనిచేస్తాయా?

నాలుగో శనివారం కావడంతో నేడు (సెప్టెంబర్ 26న) ఎస్‌బీఐ, హెచ్‌డీఎఫ్‌సీ, ఐసీఐసీఐ సహా ప్రధాన బ్యాంకుల శాఖలన్నీ మూసివేసి ఉంటాయి. అయితే సమ్మె నేపథ్యంలో ఆదివారం (సెప్టెంబర్ 27న) బ్యాంకులు తెరిచి ఉంటాయని ఆర్‌బీఐ ప్రకటించింది.

బ్యాంకులకు వెళ్లి ప్రత్యక్షంగా లావాదేవీలు నిర్వహించాలని భావిస్తున్న వినియోగదారులు నేడు (సెప్టెంబర్ 26) బ్యాంకులకు సెలవు అని గమనించాలి. రిజర్వ్ బ్యాంక్ ఆఫ్ ఇండియా (ఆర్‌బీఐ) నిబంధనల ప్రకారం ప్రతినెల రెండో, నాల్గవ శనివారాల్లో బ్యాంకులకు అధికారికంగా వారంతపు సెలవు ఉంటుంది. ఈ నేపథ్యంలోనే స్టేట్ బ్యాంక్ ఆఫ్ ఇండియా (ఎస్‌బీఐ), హెచ్‌డీఎఫ్‌సీ బ్యాంక్, ఐసీఐసీఐ బ్యాంక్ సహా దేశంలోని అన్ని ప్రభుత్వ, ప్రైవేటు బ్యాంకుల శాఖలు నేడు పనిచేయవు.

సెప్టెంబర్ 28 (సోమవారం) నుంచి సెప్టెంబర్ 30 (బుధవారం) వరకు బ్యాంక్ ఉద్యోగ సంఘాల సమ్మె (Rahul Sharma)

రేపు సేవలు అందుబాటులో..

సెప్టెంబర్ 28 నుంచి 30 వరకు యునైటెడ్ ఫోరమ్ ఆఫ్ బ్యాంక్ యూనియన్స్ (UFBU) 3 రోజుల దేశవ్యాప్త సమ్మెకు పిలుపునిచ్చింది. వరుసగా 5 రోజులు బ్యాంకింగ్ సేవలకు భంగం వాటిల్లకుండా ఉండేందుకు కేంద్ర ఆర్థిక మంత్రిత్వ శాఖ, ఆర్‌బీఐ ప్రత్యేక నిబంధనలు తీసుకొచ్చాయి.

రేపు ఆదివారం (సెప్టెంబర్ 27) సాధారణ సెలవు దినం అయినప్పటికీ, ప్రభుత్వ రంగానికి చెందిన బ్యాంకులు (PSBs), ప్రాంతీయ గ్రామీణ బ్యాంకులు (RRBs) శాఖలు, కరెన్సీ చెస్ట్‌లు సజావుగా పనిచేస్తాయని ఆర్‌బీఐ స్పష్టం చేసింది. నగదు డిపాజిట్లు, చెక్కుల దాఖలు వంటి అత్యవసర పనులు ఉన్నవారు రేపు బ్యాంకులకు వెళ్లి తమ పనులను పూర్తి చేసుకోవచ్చని సూచించింది.

సెప్టెంబర్ 28 నుంచి 30 వరకు బ్యాంకింగ్ సమ్మె

వారంలో 5 రోజుల బ్యాంకింగ్ పనిదినాలు అమలు చేయడం, పెన్షన్ విధానంలో మార్పులు తదితర డిమాండ్లను నెరవేర్చాలని కోరుతూ సెప్టెంబర్ 28 (సోమవారం) నుంచి సెప్టెంబర్ 30 (బుధవారం) వరకు బ్యాంక్ ఉద్యోగ సంఘాలు సమ్మె చేపట్టనున్నాయి. ముఖ్యంగా సెప్టెంబర్ 30న అర్ధవార్షిక ముగింపు (Half-Yearly Closing) ఉన్నందున, బ్యాంకింగ్ సేవలపై తీవ్ర ప్రభావం పడే అవకాశం ఉంది.

డిజిటల్ సేవలు యథాతథం

శాఖల పరిధిలో ప్రత్యక్ష లావాదేవీలు నిలిచిపోయినప్పటికీ, ఆన్‌లైన్ లావాదేవీలైన యూపీఐ (UPI), ఇంటర్నెట్ బ్యాంకింగ్, మొబైల్ బ్యాంకింగ్, ఏటీఎం (ATM) సేవలు నిరంతరాయంగా అందుబాటులో ఉంటాయని బ్యాంకింగ్ వర్గాలు తెలిపాయి.