ఢిల్లీలో తీవ్ర ఉద్రిక్తత.. సీజేపీ అధినేత అభిజీత్ దిప్కే అరెస్ట్

కన్నాట్ ప్లేస్‌లో 'లహెరా దో తిరంగా' ప్రదర్శనకు బయలుదేరిన కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దిప్కేను ఢిల్లీ పోలీసులు ముందస్తుగా అదుపులోకి తీసుకున్నారు. సీఈసీ జ్ఞానేష్ కుమార్ రాజీనామా డిమాండ్‌తో సీజేపీ నేతలు చేపట్టిన ఈ కార్యక్రమం ఉద్రిక్తతలకు దారితీసింది.

దేశ రాజధాని ఢిల్లీలోని కన్నాట్ ప్లేస్ వేదికగా తలపెట్టిన 'లహెరా దో తిరంగా' కార్యక్రమానికి బయలుదేరిన కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దిప్కేను పోలీసులు శుక్రవారం అదుపులోకి తీసుకున్నారు. అక్టోబర్ 16న సాయంత్రం 5 గంటలకు కన్నాట్ ప్లేస్‌లోని సెంట్రల్ పార్క్ వద్ద ఈ నిరసన ప్రదర్శన నిర్వహించాల్సి ఉంది. అయితే ఈ ప్రదర్శన వల్ల తీవ్ర ట్రాఫిక్ సమస్యలు తలెత్తుతాయని, ప్రజా భద్రతతో పాటు స్థానిక వ్యాపారులు, వాహనదారులకు ఇబ్బందులు కలుగుతాయని పేర్కొంటూ కార్యక్రమాన్ని విరమించుకోవాలని ఢిల్లీ పోలీసులు అంతకుముందే దీప్కేకు స్పష్టం చేశారు.

అభిజీత్ దిప్కే ఉన్న చోట పోలీసు బలగాలు (PTI)

కన్నాట్ ప్లేస్‌లో సెక్షన్ 163 అమల్లో ఉందన్న పోలీసులు

ఎన్సీపీ-ఎస్సీపీ ప్రతినిధి అనీష్ గవాండే నివాసం నుంచి బయటకు వస్తున్న సమయంలో దీప్కేను పోలీసులు అడ్డుకున్నారు. "కన్నాట్ ప్లేస్ ప్రాంతంలో సెక్షన్ 163 (గతంలో సెక్షన్ 144) అమల్లో ఉంది. అందుకే మిమ్మల్ని ముందస్తుగా అదుపులోకి తీసుకుంటున్నాం" అని పోలీస్ అధికారి ఒకరు దిప్కేకు స్పష్టం చేసిన దృశ్యాలు సామాజిక మాధ్యమాల్లో వైరల్‌గా మారాయి.

అయితే పోలీసుల చర్యను దిప్కే తీవ్రంగా ఖండించారు. తాను ఏ చట్టాన్ని ఉల్లంఘించలేదని, ఒకవేళ కన్నాట్ ప్లేస్‌లో అనుమతి లేకపోతే నిరసన తెలపడానికి ప్రత్యామ్నాయ వేదికను చూపించాలని అధికారులతో వాగ్వాదానికి దిగారు.

అసలు వివాదం ఏమిటి?

కేంద్ర ప్రభుత్వం జంతర్ మంతర్ నిరసన వేదికను డీనోటిఫై చేయడాన్ని నిరసిస్తూ, జంతర్ మంతర్ వద్ద ఏర్పాటు చేసిన బారికేడ్లను బద్దలు కొట్టారనే ఆరోపణలపై సీజేపీ నేతలు సౌరవ్ దాస్, అశుతోష్ రాంకాలపై కేసులు నమోదయ్యాయి. ప్రస్తుతం వారు జ్యుడీషియల్ కస్టడీలో ఉన్నారు. వారి ముందస్తు విడుదలను డిమాండ్ చేస్తూనే ఈ 'లహెరా దో తిరంగా' కార్యక్రమానికి సీజేపీ పిలుపునిచ్చింది.

దేశంలో ఇటీవల జరిగిన ఎన్నికల నిర్వహణ, ఓటర్ల జాబితా ప్రత్యేక ముమ్మర సవరణ (ఎస్ఐఆర్) ప్రక్రియలో భారీగా అక్రమాలు జరిగాయని ఆరోపిస్తూ ప్రధాన ఎన్నికల కమిషనర్ (సీఈసీ) జ్ఞానేష్ కుమార్ తక్షణమే రాజీనామా చేయాలని సీజేపీతో పాటు పలు ప్రతిపక్షాలు సుదీర్ఘంగా డిమాండ్ చేస్తున్నాయి. ఈ వివాదమే తాజాగా ఢిల్లీలో పోలీసుల ముందస్తు అరెస్టులకు, తీవ్ర ఉద్రిక్తతలకు దారితీసింది.