త్రిష వివాదంపై సీఎం విజయ్ తీవ్ర ఆగ్రహం.. జయలలిత ఘటన గుర్తుచేస్తూ కౌంటర్

మహిళలపై వ్యక్తిగత విమర్శలు, అసభ్య వ్యాఖ్యలు చేయడాన్ని ఏమాత్రం సహించేది లేదని తమిళనాడు ముఖ్యమంత్రి సి. జోసెఫ్ విజయ్ స్పష్టం చేశారు. నటి త్రిషను ఉద్దేశించి డీఎంకే, ఏఐఏడీఎంకే నేతలు చేసిన వ్యాఖ్యల నేపధ్యంలో అసెంబ్లీ సాక్షిగా స్పందించిన ఆయన.. 1989లో జయలలితకు జరిగిన అవమానాన్ని గుర్తుచేశారు.

మహిళలపై పరుష పదజాలం వాడటం, రాజకీయం పేరిట వ్యక్తిగత దూషణలకు దిగడాన్ని ఎంతమాత్రం సహించేది లేదని తమిళనాడు ముఖ్యమంత్రి సి. జోసెఫ్ విజయ్ స్పష్టం చేశారు. ఈ ఏడాది ఆరంభంలో జరిగిన అసెంబ్లీ ఎన్నికల్లో తమిళగ వెట్రి కళగం (టీవీకే) సాధించిన చారిత్రక విజయంలో మహిళల పాత్ర అత్యంత కీలకమని ఆయన గుర్తుచేశారు.

త్రిష వివాదంపై సీఎం విజయ్ తీవ్ర ఆగ్రహం.. జయలలిత ఘటన గుర్తుచేస్తూ కౌంటర్

అసెంబ్లీ వేదికగా ఘాటు వ్యాఖ్యలు

శాసనసభ వేదికగా సీఎం విజయ్ మాట్లాడుతూ.. "రాజకీయాల్లో ఎవరైనా విమర్శలు చేసుకోవచ్చు, ప్రజలు అన్నింటినీ ప్రత్యక్షంగా గమనిస్తున్నారు. కానీ రాజకీయం ముసుగులో మన ప్రజలను, ముఖ్యంగా మహిళలను వ్యక్తిగతంగా కించపరుస్తూ దిగజారి మాట్లాడటం సరికాదు. అందరూ భావప్రకటన స్వేచ్ఛను ఎంతవరకు వినియోగిస్తున్నారో ఆలోచించుకోవాలి" అని విజ్ఞప్తి చేశారు.

తమిళనాడులో ఇటీవల కాలంలో అశ్లీలత, ద్వేషం ఏరులై పారుతోందని ఆయన ఆవేదన వ్యక్తం చేశారు. మహిళల పట్ల అసభ్యంగా మాట్లాడటం, ద్వంద్వార్థాలు ఉన్న పదాలను వాడటం ముమ్మాటికీ తప్పేనని తేల్చిచెప్పారు.

ఈ సందర్భంగా 1989లో నాటి ప్రతిపక్షం వల్ల ఇదే అసెంబ్లీ వేదికగా మాజీ ముఖ్యమంత్రి జయలలిత ఎదుర్కొన్న ఘోర అవమానాన్ని విజయ్ గుర్తుచేశారు. ప్రముఖ సినీ నటి త్రిష కృష్ణన్‌ను ఉద్దేశించి డీఎంకే సీనియర్ నేత ఉదయనిధి స్టాలిన్ చేసిన అనుచిత వ్యాఖ్యల నేపథ్యంలో సీఎం విజయ్ ఈ వ్యాఖ్యలు చేయడం ప్రాధాన్యత సంతరించుకుంది. కావేరీ జలాల పంపిణీకి సంబంధించి తంజావూరులో జరిగిన ర్యాలీలో జనం త్రిష పేరును ప్రస్తావించినప్పుడు ఉదయనిధి అనుచిత వ్యాఖ్యలు చేశారనే ఆరోపణలు వచ్చాయి.

ఈ ఘటనపై కేసు నమోదు చేసిన పోలీసులు ఉదయనిధిని చెన్నైలోని ఆయన నివాసంలో ఉదయం 10 గంటలకు అరెస్టు చేసి తంజావూరుకు తరలించారు. అనంతరం మద్రాస్ హైకోర్టు జోక్యంతో ఆయన విడుదలయ్యారు. విడుదలయ్యాక ఉదయనిధి స్పందిస్తూ.. "నన్ను కారణం లేకుండా అరెస్ట్ చేశారు, నేను ఎవరినీ ఉద్దేశించి తప్పుగా మాట్లాడలేదు" అని వివరణ ఇచ్చారు.

ఏఐఏడీఎంకే నేతల కౌంటర్లు

మరోవైపు ఏఐఏడీఎంకే నేత ఆర్‌బి ఉదయకుమార్ కూడా కేబినెట్ విస్తరణపై వ్యాఖ్యానిస్తూ, "సీఎం విజయ్ తన ప్రాణస్నేహితురాలు త్రిషను తమిళనాడు ఉప ముఖ్యమంత్రిగా ఎప్పుడు ప్రకటిస్తారా అని రాష్ట్రం ఆసక్తిగా ఎదురుచూస్తోంది" అంటూ పరోక్ష వ్యాఖ్యలు చేయడం మరింత దుమారం రేపింది. ఈ పరిణామాలన్నింటికీ అసెంబ్లీ సాక్షిగా సీఎం విజయ్ తన వ్యాఖ్యలతో చెక్ పెట్టే ప్రయత్నం చేశారు.