పుట్టిన బిడ్డకు బంగారు ఉంగరం - సరికొత్త స్కీమ్ ను ప్రారంభించనున్న సీఎం విజయ్

Tamil Nadu Govt Gold Ring Scheme : తమిళనాడు ప్రభుత్వ ఆసుపత్రుల్లో జన్మించే పసిపాపలకు గ్రాము బంగారు ఉంగరం అందించే స్కీమ్ కు విజయ్ సర్కార్ శ్రీకారం చుట్టనుంది. ‘తాయ్‌మామన్ తంగ మోదిరం’ పేరు ఈ పథకాన్ని సీఎం విజయ్ సోమవారం మధురైలో ప్రారంభించనున్నారు.

Tamil Nadu Govt Gold Ring Scheme : తమిళనాడు ప్రభుత్వం ప్రవేశపెట్టిన అత్యంత ఆకర్షణీయమైన సంక్షేమ పథకాలలో ఒకటైన 'తాయ్‌మామన్ తంగ మోదిరం తిట్టం' (మేనమామ బంగారు ఉంగరం పథకం) సోమవారం ప్రారంభం కానుంది. రాష్ట్రంలోని ప్రభుత్వ ఆసుపత్రుల్లో జన్మించే ప్రతీ నవజాత శిశువుకు ప్రభుత్వం తరఫున ఒక గ్రాము 22 క్యారెట్ల బంగారు ఉంగరాన్ని అందజేస్తారు. ఈ వినూత్న పథకాన్ని రాష్ట్ర ముఖ్యమంత్రి సీ జోసెఫ్ విజయ్….. మధురైలోని ప్రభుత్వ రాజాజీ ఆసుపత్రి (జీఆర్‌హెచ్) వేదికగా ప్రారంభించనున్నారు.

గ్రాము బంగారు ఉంగరం స్కీమ్

ప్రత్యేక విమానంలో మధురై చేరుకోనున్న ముఖ్యమంత్రి విజయ్….. జీఆర్‌హెచ్ ఆడిటోరియంలో జరిగే కార్యక్రమంలో పాల్గొని 25 మంది నవజాత శిశువులకు స్వయంగా ఈ బంగారు ఉంగరాలను అందజేస్తారు. అనంతరం ఆయన ఆసుపత్రిలోని ప్రసూతి వార్డును నేరుగా సందర్శించి, అదే రోజు జన్మించిన పసిపాపల తల్లులకు ఉంగరాలను అందిస్తారు. నిజానికి ఈ పథకాన్ని దివంగత మాజీ ముఖ్యమంత్రి సీఎన్ అన్నాదురై జయంతి సందర్భంగా సెప్టెంబర్ 15నే ప్రారంభించాల్సి ఉంది. అయితే ముఖ్యమంత్రి విజయ్ లండన్ పర్యటన కారణంగా ఈ కార్యక్రమం వాయిదా పడింది.

రూ. 755 కోట్ల భారీ బడ్జెట్…

ఈ ప్రతిష్టాత్మక పథకం కోసం తమిళనాడు ప్రభుత్వం ఏటా రూ. 755.83 కోట్ల భారీ బడ్జెట్‌ను కేటాయించింది. తొలి విడత పంపిణీ కోసం ఇప్పటికే 1.28 లక్షల బంగారు ఉంగరాలను సిద్ధం చేశారు. ప్రతీ ఉంగరానికి ఒక ప్రత్యేక సీరియల్ నంబర్ ఉంటుంది. ఎటువంటి అవకతవకలకు తావులేకుండా ట్యాంపర్-ప్రూఫ్ ప్యాకేజింగ్‌లో వీటిని భద్రపరిచి పంపిణీ చేస్తారు.

ఈ పథకం అమలు బాధ్యతలను జిల్లా స్థాయిలో పూర్తి పారదర్శకంగా పర్యవేక్షించేందుకు, స్టాక్ నమోదును నిరంతరం పరిశీలించేందుకు ఆయా జిల్లాల కలెక్టర్ల నేతృత్వంలో ప్రత్యేక పర్యవేక్షణ కమిటీలను ఏర్పాటు చేశారు. అధికారంలో ఉన్న టీవీకే పార్టీ ఎన్నికల హామీలలో ఈ పథకం అత్యంత కీలకమైనది. దీని కోసం ప్రముఖ స్వర్ణాభరణాల సంస్థలైన జోయాలుక్కాస్, కల్యాణ్ జువెలర్స్‌కు ఉంగరాల సరఫరా కాంట్రాక్ట్ ఆర్డర్లను అందించారు. ఈ పథకానికి సంబంధించిన ప్రభుత్వ ఉత్తర్వులు జూన్ 23నే విడుదలయ్యాయి.

అర్హతలు - నిబంధనలు :

• లబ్ధి పొందే నవజాత శిశువుల తల్లులు తప్పనిసరిగా తమిళనాడు శాశ్వత నివాసులై ఉండాలి.
• గర్భిణులు 'ప్రెగ్నెన్సీ అండ్ ఇన్‌ఫాంట్ కోహోర్ట్ మానిటరింగ్ అండ్ ఎవాల్యుయేషన్' (PICME) వ్యవస్థ కింద నమోదై ఉండాలి.
• అభ్యర్థులకు రీప్రొడక్టివ్ అండ్ చైల్డ్ హెల్త్ ఐడీ ఉండటం తప్పనిసరి.
• ఆసుపత్రి నుంచి డిశ్చార్జ్ అయ్యే సమయంలో ఈ బంగారు ఉంగరాన్ని అందిస్తారు.
• అక్టోబర్ 6న ఉపఎన్నికలు జరగనున్న మధురాంతకం, ధరాపురం అసెంబ్లీ నియోజకవర్గాల పరిధి మినహా రాష్ట్రవ్యాప్తంగా అన్ని ప్రాంతాల్లో ఈ పథకం అమల్లోకి వస్తుంది.

ఈ పథకం ద్వారా ప్రభుత్వ వైద్య సేవలపై ప్రజల్లో నమ్మకం మరింత పెరుగుతుందని, అలాగే ఆసుపత్రుల్లోనే సురక్షిత ప్రసవాలు (ఇన్స్టిట్యూషనల్ డెలివరీస్) జరిగేలా ప్రోత్సహించవచ్చని ప్రభుత్వ వర్గాలు భావిస్తున్నాయి. జాతీయ కుటుంబ ఆరోగ్య సర్వే-6 (NFHS-6) గణాంకాల ప్రకారం తమిళనాడులో ఏటా సుమారు 7.80 లక్షల మంది పిల్లలు జన్మిస్తున్నారు. వీటిలో 99.9 శాతం ప్రసవాలు ఆసుపత్రుల్లోనే జరుగుతున్నాయి.