ఢిల్లీలో భగ్గుమన్న విద్యార్థులు: టియర్ గ్యాస్, లాఠీఛార్జ్ లెక్క చేయకుండా పార్లమెంట్ ముట్టడి

నీట్ (NEET) పేపర్ లీకేజీ వ్యవహారంలో కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని డిమాండ్ చేస్తూ ఢిల్లీలో విద్యార్థులు భారీ పార్లమెంట్ మార్చ్ నిర్వహించారు. పోలీసులు లాఠీఛార్జ్, టియర్ గ్యాస్ ప్రయోగించినా వెనక్కి తగ్గేది లేదని ఆందోళనకారులు స్పష్టం చేశారు.

ఢిల్లీ వీధులు విద్యార్థుల నినాదాలతో హోరెత్తాయి. నీట్ (NEET) పేపర్ లీక్ వ్యవహారంలో కేంద్ర ప్రభుత్వంపై తీవ్ర ఆగ్రహం వ్యక్తమవుతోంది. కాక్రోచ్ జనతా పార్టీ ఆధ్వర్యంలో చేపట్టిన పార్లమెంట్ ముట్టడి కార్యక్రమం తీవ్ర ఉద్రిక్తతకు దారితీసింది. పటిష్టమైన పోలీసు బందోబస్తు, లాఠీఛార్జీలు, టియర్ గ్యాస్ ప్రయోగాలను సైతం లెక్కచేయకుండా విద్యార్థులు, నిరసనకారులు తమ పోరాటాన్ని కొనసాగించారు. కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని వారు గట్టిగా డిమాండ్ చేశారు.

రణరంగంగా మారిన పార్లమెంట్ స్ట్రీట్

ఢిల్లీలో భగ్గుమన్న విద్యార్థులు: టియర్ గ్యాస్, లాఠీఛార్జ్ లెక్క చేయకుండా పార్లమెంట్ ముట్టడి (PTI)

పార్లమెంట్ వీధి వైపు దూసుకుపోతున్న నిరసనకారులను పోలీసులు బహుళ అంచెల బారికేడ్లతో అడ్డుకున్నారు. రాజధాని నలుమూలల నుంచే కాకుండా ఇతర రాష్ట్రాల నుంచి పెద్ద సంఖ్యలో విద్యార్థులు ఈ ప్రదర్శనలో పాల్గొన్నారు. పోలీసులు ఎంతగా అణచివేసేందుకు ప్రయత్నించినా వెనకడుగు వేసేది లేదని విద్యార్థులు స్పష్టం చేశారు.

"మమ్మల్ని అనేక చోట్ల అడ్డుకోవడానికి ప్రయత్నించారు. మార్గమంతా భారీ బారికేడ్లు పెట్టారు. లాఠీఛార్జ్ చేశారు, టియర్ గ్యాస్ విసిరారు. అయినా సరే మేము వెనక్కి వెళ్లేది లేదు" అని నిరసనలో పాల్గొన్న ఢిల్లీ యూనివర్సిటీ విద్యార్థిని గ్లోరీ తెలిపారు.

ధర్మేంద్ర ప్రధాన్ రాజీనామాకే మొగ్గు

వారాలుగా నిరసనలు తెలుపుతున్నా ప్రభుత్వం స్పందించకపోవడం పట్ల విద్యార్థులు తీవ్ర అసంతృప్తి వ్యక్తం చేశారు. "విద్యార్థులను పట్టించుకోని దేశం గమ్యం లేనిదవుతుంది" అని ఒక విద్యార్థి ఆవేదన వ్యక్తం చేశారు.

"కేంద్ర మంత్రి ధర్మేంద్ర ప్రధాన్ రాజీనామా చేయాలన్నదే మా ఏకైక డిమాండ్. నెరవేర్చలేని అసాధ్యమైన డిమాండ్లను మేము కోరడం లేదు. ఇంతవరకు వచ్చిన మేము, పోరాటం పూర్తయ్యేంత వరకు విశ్రమించం" అని డీయూ విద్యార్థిని సంస్కృతి కుమార్ స్పష్టం చేశారు.

మూడు వారాలుగా నిరాహార దీక్షలు

"ఇది మన దేశం కాదా? పౌరులుగా ప్రశ్నించే హక్కు, అంగీకారం లేని నిర్ణయాలను సవాలు చేసే హక్కు మనకు లేదా? హక్కుల కోసం శాంతియుతంగా నిరసన తెలుపుతున్న విద్యార్థులపై పోలీసులు ఎందుకు లాఠీఛార్జ్ చేస్తున్నారు?" అని ఫాతిమా ప్రశ్నించారు. ఇది తమకు 'సై లేదా నై' లాంటి ఘట్టమని, ఇప్పటివరకు ఎంతో మంది త్యాగాలు చేశారని, ఇప్పుడు వెనక్కి తగ్గితే మళ్లీ హక్కుల కోసం గళమెత్తలేమని పేర్కొన్నారు.

ఇళ్లల్లో చెప్పకుండా వచ్చి..

పోలీసుల తీరుపై పలువురు యువతులు తీవ్ర ఆగ్రహం వ్యక్తం చేశారు. బాదర్‌పూర్ ప్రాంతానికి చెందిన 17 ఏళ్ల అన్షిక, స్కూలుకు వెళ్తున్నానని ఇంట్లో చెప్పి ఈ నిరసనలో పాల్గొంది. అయితే పోలీసులు తమ పట్ల నేరస్థుల్లా ప్రవర్తించారని వాపోయింది. చేతిపై ఉన్న గాయాలను చూపుతూ, మహిళా పోలీసులు తనను కిందకు లాగి గట్టిగా పట్టుకున్నారని ఆరోపించింది.

"ఎన్నికలప్పుడు మా ఇళ్లకు వచ్చి ఓట్లు అడుగుతారు, కానీ నీట్ పేపర్ లీక్‌పై చర్చించడానికి మాత్రం ముఖం చాటేస్తారు. మేము కేవలం చర్చను మాత్రమే కోరుతున్నాం. శాంతియుతంగా నిరసన తెలిపే హక్కు కూడా మాకు లేదా?" అని అన్షిక ప్రశ్నించింది.

ఇక బిహార్‌లోని వైశాలి జిల్లాకు చెందిన 20 ఏళ్ల కిస్మత్, నిరసన కోసం పాట్నా నుంచి రాత్రికే రాత్రి ప్రయాణమై ఢిల్లీకి చేరుకుంది. ఇంట్లో చెప్తే భద్రత గురించి భయపడతారని, అబద్ధం చెప్పి ఇక్కడికి వచ్చానని పేర్కొంది. కేంద్ర విద్యాశాఖ మంత్రి తన పదవికి రాజీనామా చేసే వరకు తమ పోరాటం ఆగేది లేదని ఆందోళనకారులు స్పష్టం చేశారు.