Pension : ఈపీఎస్ కనీస పింఛను రూ. 1000 నుంచి రూ. 3000కు పెంపు! త్వరలోనే ప్రకటన?

ఈపీఎస్​ సబ్​స్క్రైబర్స్​కి త్వరలోనే గుడ్​ న్యూస్ అందే అవకాశం ఉంది! ఎంప్లాయీస్ పెన్షన్ స్కిమ్ కింద ప్రస్తుతం రూ. 1000గా ఉన్న కనీస పింఛనును రూ. 3000 వరకు పెంచాలని చర్చలు జరుగుతున్నట్టు సమాచారం.

ఈపీఎస్​ (ఎంప్లాయీస్ పెన్షన్ స్కీమ్) పరిధిలోని సబ్​స్క్రైబర్స్​కు త్వరలోనే శుభవార్త అందే సూచనలు కనిపిస్తున్నాయి. ఈ పథకం కింద ఇప్పటివరకు ఉన్న రూ. 1000 కనీస పింఛనును రూ. 3వేలకు పెంచే అవకాశం ఉన్నట్టు తెలుస్తోంది. ఈ మేరకు కేంద్ర ఆర్థికశాఖతో కార్మికశాఖ ఇప్పటికే చర్చలు జరిపినట్టు సమాచారం.

ఈపీఎస్​ కనీస పింఛను పెంపు!

ఈ నెల 19న జరగనున్న ఈపీఎఫ్​ఓ సెంట్రల్ బోర్డ్ ఆఫ్​ ట్రస్టీస్ భేటీలో.. కనీస పింఛనును రూ. 3000కు పెంచే అంశాన్ని ప్రత్యేక అజెండాగా చర్చించనున్నట్టు సంబంధిత వర్గాలు వెల్లడించాయి.

కనీస పింఛను రూ. 1000 నుంచి రూ. 3000!

2014కి ముందు ఈపీఎఫ్​ఓ వేతన పరిమితిని రూ. 6500గా ఉండేది. దానిని రూ. 15వేలకు పెంచారు. ఆ సమయంలో కనీస పింఛనును కూడా పెంచాలని నిర్ణయం తీసుకున్నారు. అప్పుడు దాదాపు 80శాతం పింఛనుదారులకు పెన్షన్ రూ. 1000 లోపే ఉండేది. అనంతరం దానిని రూ. 1000కి చేస్తూ ఉత్తర్వులు జారీ చేశారు.

పెరుగుతున్న ఖర్చుల నేపథ్యంలో ఇటీవలి కాలంలో ఈ కనీస పింఛనును పెంచాలని కార్మిక సంఘాలతో పాటు ఉద్యోగ సంఘాలు డిమాండ్లు చేస్తూ వస్తున్నాయి.

సరిగ్గా ఇదే సమయంలో ఈ సెప్టెంబర్​లో గరిష్ఠ వేతన పరిమితి రూ. 15వేల నుంచి రూ. 25వేలకు పెరిగింది. ఫలితంగా ఇప్పుడు కనీస పింఛనును కూడా పెంచాలన్న చర్చలు మొదలయ్యాయి. ఇప్పుడు ఉద్యోగుల్లో ఆశలు చిగురించాయి.

ప్రస్తుతం దేశవ్యాప్తంగా 81లక్షలకుపైగా మంది ఈపీఎస్​ సబ్​స్క్రైబర్లు ఉన్నారు. వీరిలో 73లక్షలకుపైగా మందికి రూ. 3వేల లోపు పింఛను అందుతోంది. ఒకవేళ ఈపీఎస్​ పింఛనును రూ. 3వేలకు పెంచితే, వీరికి చాలా ప్రయోజనకరంగా ఉంటుంది.

ఈ వ్యవహారంపై పూర్తి వివరాలు ఈ నెల 19న జరగనున్న ఈపీఎఫ్​ఓ సెంట్రల్ బోర్డ్ ఆఫ్​ ట్రస్టీస్ సమావేశం అనంతరం వెలువడనుంది.