Gold Rate today: బంగారం పైపైకి.. డాలర్ డౌన్.. $4,400లకు పసిడి పరుగు

అమెరికాలో రిటైల్ విక్రయాలు క్షీణించడంతో డాలర్ ఇండెక్స్ బలహీనపడింది. దీనికితోడు అంతర్జాతీయంగా కేంద్ర బ్యాంకుల కొనుగోళ్లు పెరగడంతో పసిడి ధరలు ఔన్సుకు $4,400 మార్కుకు అత్యంత చేరువలో నిలిచాయి.

అంతర్జాతీయ మార్కెట్‌లో బంగారం ధరలు మళ్లీ ఆల్‌టైమ్ రికార్డు స్థాయి దిశగా పరుగులు తీస్తున్నాయి. అమెరికాలో వినియోగదారుల సెంటిమెంట్ పడిపోవడం, రిటైల్ విక్రయాలు మందగించడంతో డాలర్ ఇండెక్స్ ఒత్తిడికి లోనైంది. దీంతో సురక్షితమైన పెట్టుబడిగా భావించే పసిడికి మళ్లీ డిమాండ్ పెరిగింది.

Gold Rate today: బంగారం పైపైకి.. డాలర్ డౌన్.. $4,400లకు పసిడి పరుగు

ఆసియా మార్కెట్లలో స్పాట్ గోల్డ్ 0.4 శాతం పెరిగి ఔన్సుకు 4,391.60 డాలర్ల వద్ద ట్రేడవుతోంది. పసిడి వరుసగా రెండో వారమూ తన సానుకూల జోరును కొనసాగిస్తోంది. డాలర్ ఇండెక్స్ 0.2 శాతం పడిపోవడంతో విదేశీ కొనుగోలుదారులకు బంగారం మరింత చవకగా మారింది. అమెరికా ఫెడరల్ రిజర్వ్ వడ్డీ రేట్లను వెంటనే పెంచకపోవచ్చనే అంచనాలు బలపడడం కూడా బంగారం ధరలు పుంజుకోవడానికి సహాయపడింది.

ఉదయం 9.20 గంటలకు ఎంసీఎక్స్‌లో 24 క్యారట్ల బంగారం ధర 10 గ్రాములకు రూ. 1,55,020గా ఉంది. వెండి ధర కిలోకు రూ. 2,37,361గా ఉంది.

కేంద్ర బ్యాంకుల కొనుగోళ్లు.. పెరిగిన ఆదరణ

చైనా సహా పలు దేశాల కేంద్ర బ్యాంకులు పెద్ద ఎత్తున పసిడిని కొనుగోలు చేస్తుండటంతో ఇన్వెస్టర్లలో మళ్లీ ఆసక్తి నెలకొంది. ఏప్రిల్ నెల తర్వాత పసిడి 100-రోజుల మూవింగ్ యావరేజ్ మార్కును దాటడం ఇదే తొలిసారి. ప్రైవేట్ ఇన్వెస్టర్లు కూడా పోర్ట్‌ఫోలియో రక్షణ కోసం పసిడి వైపు మొగ్గు చూపుతున్నారు.

భౌగోళిక ఉద్రిక్తతలు.. చమురు మార్కెట్ల ప్రభావం

మధ్యప్రాచ్యంలో మళ్లీ ఉద్రిక్తతలు పెరగడం అంతర్జాతీయ మార్కెట్లపై తీవ్ర ప్రభావం చూపుతోంది. హార్ముజ్ జలసంధి సమీపంలో నౌకలపై దాడులు జరగడం, ఇరాన్‌పై ఆర్థిక ఆంక్షలు విధించేందుకు అమెరికా సిద్ధమవుతుండటంతో ఇంధన సరఫరాపై అనిశ్చితి నెలకొంది. ఇరాన్, ఒమాన్ దేశాలు జలసంధి నిర్వహణపై ఒప్పందానికి యత్నిస్తున్నప్పటికీ, అమెరికా ఈ చర్చల్లో లేకపోవడం మార్కెట్ వర్గాలను కలవరపెడుతోంది.

నిపుణులు ఏమంటున్నారు?

"పసిడి తన బుల్లిష్ ట్రెండ్‌ను కొనసాగించాలంటే ఔన్సుకు 4,400 డాలర్ల నిరోధక స్థాయిని దాటాల్సి ఉంటుంది. ఇటీవలి కాలంలో పెరిగిన ధరల ప్రభావం ఇప్పటికే మార్కెట్‌లో నమోదైంది. కాబట్టి స్పష్టమైన సంకేతాలు వచ్చే వరకు పసిడి ధరలు కొంతకాలం ఒకే పరిధిలో సాగే అవకాశం ఉంది" అని గ్లోబల్ ఎక్స్ ఈటీఎఫ్‌ల విశ్లేషకుడు జస్టిన్ లిన్ పేర్కొన్నారు.

బుధవారం విడుదల కానున్న ఫెడరల్ రిజర్వ్ జూలై పాలసీ సమావేశ మినిట్స్ ఆధారంగా వడ్డీ రేట్లపై మరిన్ని స్పష్టమైన సంకేతాలు వెలువడే అవకాశముంది.

వెండి, ప్లాటినం ఆ బాటలోనే...

బంగారంతో పాటు ఇతర విలువైన లోహాలు కూడా లాభాల్లో పయనించాయి. వెండి 1.3 శాతం పెరిగి ఔన్సుకు 65.54 డాలర్ల వద్ద నిలిచింది. ప్లాటినం, పల్లాడియం లోహాల ధరలు కూడా స్వల్పంగా పుంజుకున్నాయి.