2006 నాటి కేసు: సీఈసీ జ్ఞానేశ్ కుమార్‌పై విజిలెన్స్ విచారణకు ఆదేశం

2006 నాటి కేఎస్టీపీ రోడ్డు ప్రాజెక్టు అవినీతి ఆరోపణల కేసులో భారత ప్రధాన ఎన్నికల కమిషనర్ (సీఈసీ) జ్ఞానేశ్ కుమార్‌పై సమగ్ర విజిలెన్స్ విచారణకు కేరళ ప్రభుత్వం ఆదేశించింది. ప్రాజెక్ట్ నిర్వహించిన మలేషియా ఇంజినీర్ ఆత్మహత్య లేఖలో ఆయన పేరు ప్రస్తావనకు రావడంతో కేరళ హోం శాఖ ఈ చర్యలు చేపట్టింది.

భారత ప్రధాన ఎన్నికల కమిషనర్ (సీఈసీ) జ్ఞానేశ్ కుమార్‌కు ఊహించని చట్టపరమైన చిక్కులు ఎదురయ్యాయి. 2006లో ఆయన కేరళ పబ్లిక్ వర్క్స్ డిపార్ట్‌మెంట్ (పీడబ్ల్యూడీ) కార్యదర్శిగా వ్యవహరించిన సమయంలో జరిగిన కేఎస్టీపీ రోడ్డు నిర్మాణ ప్రాజెక్టు అవినీతి ఆరోపణలపై విజిలెన్స్, యాంటీ కరప్షన్ బ్యూరో (వీఏసీబీ) విచారణకు కేరళ ప్రభుత్వం జారీ చేసింది.

భారత ప్రధాన ఎన్నికల కమిషనర్ (సీఈసీ) జ్ఞానేశ్ కుమార్‌ రాజీనామా చేయాలంటూ ముంబైలో నిరసనలు. ఎంఎన్ఎస్ చీఫ్ రాజ్ థాకరే, శివసేన (యూబీటీ) చీఫ్ ఉద్దవ్ థాకరే, వేలాది మంది ప్రజలు ఈ నిరసనల్లో పాల్గొన్నారు. (Anshuman Poyrekar/HT Photo)

మలేషియా ఇంజినీర్ ఆత్మహత్య - లేఖలో పేరు

కాంగ్రెస్ నాయకుడు మలయంకీళ్ వేణుగోపాల్ ఇచ్చిన ఫిర్యాదు ఆధారంగా ఈ విచారణకు ఆదేశించినట్లు కేరళ హోం మంత్రి రమేష్ చెన్నితల వెల్లడించారు. 2006లో కేరళ స్టేట్ ట్రాన్స్‌పోర్ట్ ప్రాజెక్ట్ (కేఎస్టీపీ) కింద చేపట్టిన ఎమ్‌‌సీ రోడ్డు విస్తరణ పనులను 'పాటి-బెల్' (PATI-BEL) కన్సార్షియం దక్కించుకుంది. ఆ సమయంలో జ్ఞానేశ్ కుమార్ పీడబ్ల్యూడీ కార్యదర్శిగా ప్రాజెక్ట్ పర్యవేక్షణ బాధ్యతలు చూశారు. అయితే భూసేకరణ జాప్యం, బిల్లుల చెల్లింపులో ఎదురైన తీవ్ర ఆలస్యం వల్ల ప్రాజెక్ట్ మేనేజర్‌గా ఉన్న మలేషియా సివిల్ ఇంజినీర్ లీ సీ బీన్ సబ్‌కాంట్రాక్టర్ల నుంచి తీవ్ర ఒత్తిడికి గురయ్యారు. తదనంతరం ఆయన కౌలాలంపూర్‌లో ఆత్మహత్య చేసుకున్నారు.

"లీ సీ బీన్ రాసిన రెండు ఆత్మహత్య లేఖల్లో ఒకదానిలో జ్ఞానేశ్ కుమార్ పేరును స్పష్టంగా పేర్కొన్నారు" అని హోం మంత్రి రమేష్ చెన్నితల తెలిపారు. ప్రాజెక్ట్ బిల్లుల మంజూరు కోసం అధికారులు తీవ్రంగా వేధించారని వేణుగోపాల్ తన ఫిర్యాదులో పేర్కొన్నారు.

రెండు దశాబ్దాల నాటి కేసు

2006లో అప్పటి వీఎస్ అచ్యుతానందన్ నేతృత్వంలోని ఎల్‌డీఎఫ్ ప్రభుత్వం ఈ వ్యవహారంపై ప్రాథమిక విచారణ ప్రారంభించి, జ్ఞానేశ్ కుమార్‌ను పీడబ్ల్యూడీ నుంచి బదిలీ చేసింది. ఆ తర్వాత ఆయన కేంద్ర సర్వీసులకు డెప్యూటేషన్‌పై ఢిల్లీ వెళ్లడంతో ఆ విచారణ మధ్యలోనే నిలిచిపోయింది. తాజాగా ముఖ్యమంత్రి వీడీ సతీశన్‌తో చర్చించి, న్యాయ నిపుణుల సలహా తీసుకున్న తర్వాతే పాత విచారణను పునఃప్రారంభించాలని నిర్ణయించామని హోం శాఖ స్పష్టం చేసింది.

"2006 నాటి విజిలెన్స్ కేసు ఫైళ్లను పరిశీలించి అసలు నిజాలను వెలికితీయాలి" అని సీపీఐ(ఎమ్) నేత, మాజీ ఆర్థిక మంత్రి టీఎమ్ థామస్ ఐజాక్ ఈ నిర్ణయాన్ని స్వాగతించారు.

రాజకీయ వివాదాలు - నిరసనలు

ప్రస్తుతం కేంద్ర ఎన్నికల సంఘంలో జ్ఞానేశ్ కుమార్ ఏకపక్ష నిర్ణయాలు తీసుకుంటున్నారని ప్రతిపక్షాలు మండిపడుతున్నాయి. కాక్రోచ్ జనతా పార్టీ (సీజేపీ)తో సహా పలు రాజకీయ పక్షాలు ఆయన రాజీనామా చేయాలని డిమాండ్ చేస్తూ నిరసనలు తెలుపుతున్న తరుణంలో ఈ రెండు దశాబ్దాల నాటి కేసు బయటకు రావడం తీవ్ర సంచలనం సృష్టిస్తోంది.