E-Paper
ఏప్రిల్ నుంచి 45% పెరిగిన హెచ్ఏఎల్ షేర్లు.. ఇప్పుడు కొనొచ్చా?
డిఫెన్స్ రంగంలో ఆర్డర్లు పుంజుకోవడంతో హిందూస్థాన్ ఏరోనాటిక్స్ లిమిటెడ్ (HAL) షేర్లు రాకెట్ వేగంతో దూసుకెళ్తున్నాయి. ఏప్రిల్ నుంచి ఇప్పటివరకు 45 శాతం లాభపడిన ఈ డిఫెన్స్ పిఎస్యు స్టాక్పై ప్రముఖ బ్రోకరేజ్ సంస్థల తాజా విశ్లేషణ, టార్గెట్ ధరల వివరాలు ఇక్కడ చూడండి.
దేశీయ రక్షణ రంగంలో ఆర్డర్ల ప్రవాహం పెరగడం, విదేశీ ఎగుమతులకు ఊపు రావడం, రక్షణ బడ్జెట్ కేటాయింపులు పెరగడంతో హిందూస్థాన్ ఏరోనాటిక్స్ లిమిటెడ్ (HAL) షేర్లలో మళ్లీ బుల్లిష్ ట్రెండ్ కనిపిస్తోంది. ఏప్రిల్ నెల నుంచి ఇప్పటివరకు ఈ డిఫెన్స్ స్టాక్ ఏకంగా 45 శాతం ర్యాలీ చేసి రూ. 4,945 స్థాయికి చేరుకుంది. గతంలో నమోదైన ఆల్-టైమ్ గరిష్ఠ స్థాయి రూ. 5,675 కి చేరువవుతుండటంతో 2026 సంవత్సరంలో ఇప్పటివరకు ఈ స్టాక్ 13 శాతం మేర రాబడిని అందించింది. ఈ తరుణంలో స్టాక్ ఇంకా లాభాలను అందిస్తుందా లేదా అనే అంశంపై మార్కెట్ విశ్లేషకులు స్పష్టత ఇచ్చారు.
జూన్ త్రైమాసికంలో అదిరిపోయే ఫలితాలు
ఇటీవల విడుదల చేసిన జూన్ త్రైమాసిక (క్యూ1) ఆర్థిక ఫలితాలు విశ్లేషకుల అంచనాలను మించాయి. ముడి సరుకుల ధరలు పెరిగినప్పటికీ, కంపెనీ తన మార్జిన్లను మెరుగుపరుచుకోగలిగింది. సమీక్షా త్రైమాసికంలో హెచ్ఏఎల్ కాన్సాలిడేటెడ్ నికర లాభం ఏడాది ప్రాతిపదికన 14.9 శాతం పెరిగి రూ. 1,589.68 కోట్లకు చేరింది. ఇతర ఆదాయం 20.5 శాతం పెరగడం కూడా లాభాల వృద్ధికి దోహదపడింది.
కంపెనీ ఆపరేషనల్ రెవెన్యూ 14.4 శాతం పెరిగి రూ. 5,515.17 కోట్లుగా నమోదైంది. యాజమాన్యం ఎఫ్వై27 (FY27) కి నిర్దేశించుకున్న 10-12 శాతం ఆదాయ వృద్ధి లక్ష్యం కంటే ఇది మెరుగ్గా ఉండటం గమనార్హం. ఎబిటా (EBITDA) 19 శాతం వృద్ధితో రూ. 1,538 కోట్లకు చేరగా, ఈబిట్డా మార్జిన్ 106 బేసిస్ పాయింట్లు మెరుగుపడి 27.9 శాతానికి పెరిగింది. ముడిసరుకుల వ్యయం 24.5 శాతం పెరిగినప్పటికీ, ఉద్యోగుల ఖర్చులు కేవలం 10.3 శాతం మాత్రమే పెరగడం, ఇతర వ్యయాలు 4.7 శాతం తగ్గడంతో కంపెనీ నిర్వహణ లాభదాయకత స్థిరంగా నిలిచింది.
బ్రోకరేజ్ సంస్థల విశ్లేషణ.. టార్గెట్ ధర ఎంత?
జూన్ త్రైమాసిక ఫలితాల అనంతరం ప్రముఖ దేశీయ బ్రోకరేజ్ సంస్థలు హెచ్ఏఎల్ షేరుపై సానుకూల ధోరణిని వ్యక్తం చేశాయి.
"కంపెనీ ఆర్థిక ఫలితాలు మా అంచనాలను మించి నమోదయ్యాయి. జనరల్ ఎలక్ట్రిక్ (GE) సప్లై చైన్ సమస్యలు సర్దుమణుగుతుండటంతో ఎఫ్వై28 (FY28) నుంచి తేజస్ విమానాల సరఫరా ఊపందుకుంటుంది. వీటితో పాటు ప్రచండ్ హెలికాప్టర్లు, హెచ్టీటీ-40, ఎస్యూ-30 విమానాల నిర్మాణం కంపెనీ ఆదాయ వృద్ధికి మద్దతుగా నిలుస్తుంది" అని మోతీలాల్ ఓస్వాల్ పేర్కొంది.
మోతీలాల్ ఓస్వాల్ ఈ షేరుకు 'బై' (Buy) రేటింగ్ను కొనసాగిస్తూ రూ. 5,800 టార్గెట్ ధరను నిర్ణయించింది.
ఆనంద్ రాఠీ సంస్థ కూడా రూ. 5,800 టార్గెట్తో 'బై' రేటింగ్ను ఇచ్చింది. ఏప్రిల్ నుంచి షేరు 42 శాతం పెరిగినప్పటికీ, ప్రస్తుత మార్కెట్ ధర రూ. 4,960 వద్ద ఎఫ్వై27 ఈపీఎస్ అంచనాల ప్రకారం 35.9x పిఇ మల్టిపుల్ వద్ద ట్రేడ్ అవుతోందని, ఇంకా 9.5 శాతం మేర లాభపడే అవకాశం ఉందని విశ్లేషించింది.
మరోవైపు, జేఎమ్ ఫైనాన్షియల్ సంస్థ హెచ్ఏఎల్ స్టాక్కు 'యాడ్' (Add) రేటింగ్ ఇస్తూ రూ. 4,770 టార్గెట్ ధరను నిర్ణయించింది. ఎఫ్వై28 ఈపీఎస్ రూ. 164 ఆధారంగా 29x పిఇ వ్యాల్యుయేషన్ కట్టారు. ఇన్ క్రెడ్ ఈక్విటీస్ (InCred Equities) మాత్రం 'హోల్డ్' (Hold) రేటింగ్ ఇచ్చింది. వచ్చే 3-4 ఏళ్లలో కంపెనీ చేపడుతున్న రూ. 15,000 కోట్ల క్యాపెక్స్ (Capex) ప్రణాళిక వర్కింగ్ క్యాపిటల్పై ప్రభావం చూపవచ్చని అభిప్రాయపడింది.
రూ. 2.54 లక్షల కోట్ల భారీ ఆర్డర్ బుక్
హెచ్ఏఎల్ కంపెనీ ఎఫ్వై26 చివరినాటికి ఏకంగా రూ. 2.54 లక్షల కోట్ల భారీ ఆర్డర్ బుక్ను కలిగి ఉంది. అంతేకాకుండా, ఎఫ్వై27-28E కాలంలో రిపేర్, ఓవర్ హాల్, నిర్వహణ (ROH) కాంట్రాక్టులతో కలిపి మరో రూ. 90,000 కోట్ల విలువైన కొత్త ఆర్డర్లు వచ్చే అవకాశం ఉందని భావిస్తున్నారు.
కంపెనీ భవిష్యత్ ప్రాజెక్టుల పురోగతి కూడా ఆశాజనకంగా ఉంది. హెచ్టీటీ-40 (HTT-40) విమానాల సరఫరా ఎఫ్వై27లో ప్రారంభమై ఎఫ్వై30 నాటికి పూర్తి కానుంది. మిగిలిన 15 AL-31FP ఇంజన్లు, ఆర్మీకి సంబంధించి 10 ఏఎల్ హెచ్ (ALH) హెలికాప్టర్లను ఎఫ్వై27 లో అందించేందుకు ప్రణాళికలు సిద్ధం చేశారు. అలాగే, 12 సుఖోయ్ సూ-30 ఎంకేఐ (Su-30MKI) విమానాల్లో ఒకదానిని ఎఫ్వై28లో, మిగిలిన 11 విమానాలను ఎఫ్వై29లో డెలివరీ చేయనున్నారు.
