E-Paper
బ్యాంకుపై ఫిర్యాదు చేయాలా? ఆర్బీఐ ఆంబుడ్స్మన్ను ఆశ్రయించే ముందు ఈ 3 స్టెప్స్ తప్పనిసరి
బ్యాంకు లేదా ఇతర ఆర్థిక సంస్థల సేవల్లో లోపాలుంటే ఆర్బీఐకి నేరుగా ఫిర్యాదు చేయలేరు. దీనికంటూ ఒక క్రమ పద్ధతిని రిజర్వ్ బ్యాంక్ ఆఫ్ ఇండియా (RBI) నిర్దేశించింది. ఆంబుడ్స్మన్ను కలవడానికి ముందు మీరు అనుసరించాల్సిన ఆ 3 కీలక దశలు ఇవే.
మీ బ్యాంకు మీ సమస్యను పరిష్కరించడం లేదా? లోన్ విషయంలో కానీ, క్రెడిట్ కార్డు ఛార్జీల విషయంలో కానీ మీకు అన్యాయం జరిగిందని భావిస్తున్నారా? అయితే వెంటనే ఆర్బీఐకి ఫిర్యాదు చేసేయాలని అనుకుంటున్నారా? కాస్త ఆగండి! బ్యాంకు ఫిర్యాదుల పరిష్కారం కోసం రిజర్వ్ బ్యాంక్ ఆఫ్ ఇండియా ఒక పక్కా పద్ధతిని రూపొందించింది. ఆ ప్రక్రియను అనుసరించకుండా నేరుగా ఆర్బీఐని ఆశ్రయిస్తే మీ ఫిర్యాదు తిరస్కరణకు గురయ్యే అవకాశం ఉంది.
బ్యాంకులు, ఎన్బీఎఫ్సీలు (NBFCs), క్రెడిట్ ఇన్ఫర్మేషన్ కంపెనీలు, పేమెంట్ సిస్టమ్ పార్టిసిపెంట్స్.. ఇలా ఏ ఆర్థిక సంస్థపై ఫిర్యాదు చేయాలన్నా ఆర్బీఐ సూచించిన ఈ 3 అంచెల విధానాన్ని పాటించడం తప్పనిసరి.
1. మొదటి అడుగు: సంబంధిత సంస్థకే ఫిర్యాదు
మీకు ఏ బ్యాంకుతో సమస్య ఉందో, ముందుగా ఆ బ్యాంకులోనే ఫిర్యాదు చేయాలి. సమస్యను అంతర్గతంగా పరిష్కరించుకునే అవకాశం సదరు సంస్థకు కల్పించడం ఆర్బీఐ నిబంధనల ప్రకారం ముఖ్యం. దీనిని దాటవేసి నేరుగా పై అధికారులకు వెళ్లకూడదు.
2. రెండో అడుగు: రసీదు లేదా రిఫరెన్స్ నంబర్ తీసుకోవాలి
మీరు ఫిర్యాదు చేసిన వెంటనే దానికి సంబంధించిన 'అక్నాలెడ్జ్మెంట్ స్లిప్' లేదా 'రిఫరెన్స్ నంబర్' తప్పకుండా తీసుకోవాలి. మీరు ఫిర్యాదు చేశారనడానికి ఇదే ప్రధాన ఆధారం. మీ సమస్య ఏ దశలో ఉందో ట్రాక్ చేయడానికి కూడా ఇది ఎంతో ఉపయోగపడుతుంది.
3. మూడో అడుగు: ఆర్బీఐ ఆంబుడ్స్మన్ను ఎప్పుడు కలవాలి?
మీరు ఫిర్యాదు చేసిన 30 రోజుల్లోపు బ్యాంకు నుంచి ఎటువంటి స్పందన రాకపోయినా, లేదా వారు ఇచ్చిన సమాధానం మీకు సంతృప్తికరంగా లేకపోయినా.. అప్పుడు మీరు ఆర్బీఐ ఆంబుడ్స్మన్ను ఆశ్రయించవచ్చు.
ఫిర్యాదు ఎలా చేయాలి?
ఆంబుడ్స్మన్కు ఫిర్యాదు చేయడానికి రెండు మార్గాలు ఉన్నాయి:
- ఆన్లైన్ ద్వారా: ఆర్బీఐ వారి మేనేజ్మెంట్ సిస్టమ్ (CMS) పోర్టల్ https://cms.rbi.org.in సందర్శించి ఫిర్యాదు చేయవచ్చు.
- తపాలా ద్వారా: సెంట్రలైజ్డ్ రిసీప్ట్ అండ్ ప్రాసెసింగ్ సెంటర్ (CRPC), రిజర్వ్ బ్యాంక్ ఆఫ్ ఇండియా, సెక్టార్ 17, చండీగఢ్ - 160017 చిరునామాకు మీ ఫిర్యాదును పంపవచ్చు.
ముందుగా బ్యాంకును సంప్రదించకుండా నేరుగా ఆంబుడ్స్మన్కు పంపే ఫిర్యాదులను అనుమతించబోమని, అవి తిరస్కరణకు గురవుతాయని ఆర్బీఐ స్పష్టం చేసింది.
తరచుగా అడిగే ప్రశ్నలు (FAQ)
1. నేను నేరుగా ఆర్బీఐకి ఫిర్యాదు చేయవచ్చా?
లేదు. ముందుగా మీరు సమస్య ఉన్న బ్యాంకు లేదా ఆర్థిక సంస్థకు ఫిర్యాదు చేయాలి. వారు పరిష్కరించకపోతేనే ఆర్బీఐని సంప్రదించాలి.
2. బ్యాంకుకు ఫిర్యాదు చేశాక ఎంత కాలం ఆగాలి?
కనీసం 30 రోజులు వేచి చూడాలి. ఆ లోపు స్పందన రాకపోతే ఆంబుడ్స్మన్కు ఆశ్రయించవచ్చు.
3. ఆర్బీఐ హెల్ప్లైన్ నంబర్ ఏది?
బ్యాంకింగ్ ఫిర్యాదులకు సంబంధించిన సందేహాల కోసం మీరు 14448 నంబర్కు కాల్ చేయవచ్చు లేదా ఆర్బీఐ అవగాహన వెబ్సైట్ https://rbikehtahai.rbi.org.in/ ను చూడవచ్చు.
