IT Refund: ఐటీ రిఫండ్ రావడం లేదా? ఆలస్యమవ్వడానికి ప్రధాన కారణాలివే

అసెస్మెంట్ ఇయర్ 2026-27కు సంబంధించి ఆదాయపు పన్ను రీఫండ్ల కోసం పన్ను చెల్లింపుదారులు ఎదురుచూస్తున్నారు. బ్యాంకు ఖాతా వివరాల్లో తప్పులు, ఈ-వెరిఫికేషన్ పెండింగ్‌లో ఉండటం వంటి వివిధ కారణాల వల్ల ఐటీ రీఫండ్ ప్రక్రియ ఆలస్యమయ్యే అవకాశాలున్నాయి.

అంచనా సంవత్సరం (AY) 2026-27కు సంబంధించి ఆదాయపు పన్ను రిటర్నులు (ITR) దాఖలు చేసిన పన్ను చెల్లింపుదారులు తమ రిఫండ్ సొమ్ము కోసం నిరీక్షిస్తున్నారు. జులై 31 నాటికి ఐటీఆర్ దాఖలు చేయడానికి గడువు ముగుస్తుండటంతో, ఇప్పటికే ప్రాసెస్ పూర్తి చేసిన అనేక మంది ఖాతాల్లో రిఫండ్ నిధులు జమ కావడం లేదు. ఆర్థిక సంవత్సరంలో ఒక పౌరుడు చెల్లించాల్సిన అసలు పన్ను కంటే ఎక్కువ మొత్తం జమ చేసిన సందర్భాల్లో ఆదాయపు పన్ను శాఖ ఆ అదనపు మొత్తాన్ని రిఫండ్ రూపంలో తిరిగించేస్తుంది.

ఐటీ రీఫండ్ ఆలస్యమవుతోందా?

రిటర్న్ విజయవంతంగా ప్రాసెస్ అయ్యి, వెరిఫికేషన్ పూర్తయిన తర్వాత మాత్రమే రీఫండ్ ఖాతాలో పడుతుంది. చిన్నపాటి పొరపాట్లు లేదా సమాచార లోపాలు ఉన్నా ఈ ప్రక్రియ నిలిచిపోతుంది.

రిఫండ్ ఆలస్యమవ్వడానికి 5 ముఖ్యమైన కారణాలు

బ్యాంకు ఖాతా ప్రీ-వాలిడేషన్ లోపాలు: ఆదాయపు పన్ను ఈ-ఫైలింగ్ పోర్టల్‌లో నమోదు చేసిన బ్యాంకు ఖాతా వివరాలు తప్పుగా ఉన్నా లేదా ఆ ఖాతా 'ప్రీ-వాలిడేట్' కాకపోయినా రీఫండ్ ఆగిపోతుంది.

ఈ-వెరిఫికేషన్ పూర్తికాకపోవడం: ఐటీఆర్ దాఖలు చేసిన తర్వాత 30 రోజులలోపు ఈ-వెరిఫికేషన్ పూర్తి చేయడం తప్పనిసరి. ఆధార్ ఓటీపీ లేదా నెట్ బ్యాంకింగ్ ద్వారా వెరిఫై చేయకపోతే ఆ రిటర్న్ చెల్లుబాటు కాదు.

పాన్ వివరాల్లో వ్యత్యాసాలు: పాన్ కార్డ్‌లోని పేరు, పుట్టిన తేదీ వంటి వివరాలు ఐటీ పోర్టల్ అలాగే బ్యాంక్ ఖాతా సమాచారంతో సరిపోలకపోవడం కూడా ఆలస్యానికి దారితీస్తుంది.

పన్ను రికార్డుల్లో తేడాలు (Tax Mismatch): ఎంప్లాయర్లు లేదా ఆర్థిక సంస్థలు నివేదించిన సమాచారానికి, ఫారమ్ 26AS, ఏఐఎస్ (AIS) వివరాలకు మధ్య వ్యత్యాసాలు ఉంటే ఆదాయపు పన్ను శాఖ మరింత విచారణ చేపడుతుంది.

ఫైలింగ్‌లో పొరపాట్లు: ఐటీఆర్ దాఖలు చేసేటప్పుడు గణాంకాలు తప్పుగా నమోదు చేయడం, మినహాయింపుల లెక్కల్లో తేడాలు ఉండటం వల్ల అధికారులు రిటర్నులను లోతుగా సమీక్షించాల్సి వస్తుంది.

రీఫండ్ స్టేటస్ ఎలా తనిఖీ చేయాలి?

రీఫండ్ రావడం ఆలస్యమైనంత మాత్రాన మీ దరఖాస్తులో ఏదో పెద్ద సమస్య ఉందనుకోవాల్సిన అవసరం లేదు. భారీ సంఖ్యలో దరఖాస్తులు రావడం, క్షుణ్ణంగా పరిశీలించడం వల్ల ప్రక్రియ కాస్త ఆలస్యం కావచ్చు. మీ వ్యక్తిగత సమాచారాన్ని సరిగ్గా నమోదు చేస్తూ, అవసరమైన ఈ-వెరిఫికేషన్‌ను వీలైనంత త్వరగా పూర్తి చేయడం ద్వారా రీఫండ్ త్వరగా పొందే అవకాశం ఉంటుంది.

తరచుగా అడిగే ప్రశ్నలు (FAQs)

1. ఐటీఆర్ దాఖలు చేసిన ఎంత కాలానికి రీఫండ్ వస్తుంది?

రిటర్న్ విజయవంతంగా ఈ-వెరిఫై అయిన తర్వాత సాధారణంగా 7 నుండి 30 రోజులలోపు రిఫండ్ ప్రాసెస్ పూర్తవుతుంది.

2. బ్యాంకు ఖాతా ప్రీ-వాలిడేషన్ ఎలా చేయాలి?

ఐటీ ఫైలింగ్ పోర్టల్‌లో లాగిన్ అయి 'Profile Settings' లోకి వెళ్లి మీ బ్యాంక్ ఖాతా నంబర్, ఐఎఫ్‌ఎస్‌సీ కోడ్‌ను నమోదు చేసి ప్రీ-వాలిడేట్ చేసుకోవచ్చు.

3. ఐటీఆర్ ఈ-వెరిఫికేషన్ చేయకపోతే ఏమవుతుంది?

ఐటీఆర్ సమర్పించిన 30 రోజుల్లోపు ఈ-వెరిఫికేషన్ చేయకపోతే ఆ రిటర్న్‌ను చెల్లుబాటు కానిదిగా (Invalid) భావిస్తారు.