ఐటీసీ క్యూ4 ఫలితాలు: లాభం 72% పతనం.. కానీ అది చూసి కంగారు పడక్కర్లేదు

ప్రముఖ ఎఫ్ఎంసీజీ (FMCG) దిగ్గజం ఐటీసీ (ITC) తన నాలుగో త్రైమాసిక ఫలితాలను ప్రకటించింది. వార్షిక ప్రాతిపదికన లాభం 72 శాతం పడిపోయినట్లు కనిపిస్తున్నప్పటికీ, ఈ గణాంకాల వెనుక ఒక బలమైన కారణం ఉంది. ఇన్వెస్టర్లు ఆందోళన చెందాల్సిన అవసరం లేదని విశ్లేషకులు చెబుతున్నారు.

స్టాక్ మార్కెట్ విశ్లేషకులు ఆసక్తిగా ఎదురుచూస్తున్న ఐటీసీ క్యూ4 (Q4FY26) ఫలితాలు గురువారం విడుదలయ్యాయి. గతేడాది ఇదే సమయంతో పోలిస్తే నికర లాభం భారీగా తగ్గినట్లు కనిపించడం మార్కెట్లో చర్చకు దారితీసింది. అయితే, ఇది కంపెనీ వ్యాపార వైఫల్యం వల్ల కాదు, కేవలం సాంకేతిక కారణాల వల్ల జరిగిందని స్పష్టమవుతోంది.

ఐటీసీ క్యూ 4 ఫలితాల విడుదల

ఐటీసీ క్యూ4 ఫలితాలు:

వివరాలు	క్యూ4 FY26	క్యూ4 FY25	మార్పు (YoY)
నికర లాభం (PAT)	₹5,469.74 కోట్లు	₹19,807.88 కోట్లు	72.4% తగ్గింది
ఆదాయం (Revenue)	₹23,821.48 కోట్లు	₹20,376.36 కోట్లు	17% పెరిగింది

లాభం ఎందుకు తగ్గింది? అసలు కారణం ఇదీ..

నిజానికి ఐటీసీ వ్యాపారం చాలా నిలకడగా సాగుతోంది. గతేడాది (Q4FY25) ఐటీసీ తన హోటల్ వ్యాపారాన్ని ప్రత్యేక కంపెనీగా విడదీసింది. ఆ సమయంలో కంపెనీకి ₹15,179 కోట్ల వన్-టైమ్ లాభం (One-time gain) వచ్చింది.

గతేడాది లాభంలో ఈ అదనపు సొమ్ము కలిసి ఉండటం వల్ల ఆ సంఖ్య భారీగా కనిపించింది. ఈ ఏడాది అలాంటి వన్-టైమ్ ఆదాయం లేకపోవడంతో, వార్షిక ప్రాతిపదికన పోల్చినప్పుడు లాభం పడిపోయినట్లు కనిపిస్తోంది. ఒకవేళ మనం గడిచిన మూడో త్రైమాసికం (Q3FY26)తో పోలిస్తే, కంపెనీ లాభం 9 శాతం పెరగడం విశేషం.

ఆదాయంలో దూకుడు

లాభం సంగతి పక్కన పెడితే, ఐటీసీ ఆదాయం మాత్రం అదరగొట్టింది. ఏడాది ప్రాతిపదికన ఆదాయం 17 శాతం పెరిగి ₹23,821 కోట్లకు చేరింది. సిగరెట్ల వ్యాపారంతో పాటు ఎఫ్ఎంసీజీ, అగ్రి బిజినెస్‌లో కూడా కంపెనీ మెరుగైన వృద్ధిని కనబరిచింది.

పూర్తి ఏడాది (FY26) నివేదిక:

2026 ఆర్థిక సంవత్సరానికి గాను ఐటీసీ మొత్తం ఆదాయం ₹89,913 కోట్లుగా నమోదైంది. ఇది గత ఆర్థిక సంవత్సరం కంటే 10.2 శాతం ఎక్కువ. హోటల్ డీమెర్జర్ ప్రభావం వల్ల వార్షిక నికర లాభం ₹21,018 కోట్లకు పరిమితమైంది (గతేడాది ఇది ₹35,052 కోట్లు).