మీరు ఐటీఆర్ దాఖలు చేశారా? ఈసారి పన్ను రిఫండ్‌లో ఆలస్యం కావొచ్చు!

ఐటీఆర్ గురించి ఆదాయపు పన్ను శాఖ ఇప్పటికే చాలా వివరాలను పంచుకుంది. సెప్టెంబర్ 15వ తేదీ వరకు గడువు తేదీ ఉంది. అయితే ఈ ఏడాది ఆదాయపు పన్ను వాపసులో ఆలస్యం జరిగే అవకాశం ఉంది.

ఈ సంవత్సరం ఆదాయపు పన్ను రిటర్న్ అంటే ఐటీఆర్ దాఖలు చేయడానికి చివరి తేదీ సెప్టెంబర్ 15, 2025గా ఉంది. ఆదాయపు పన్ను స్లాబ్ కిందకు వచ్చే వారు ఆదాయపు పన్ను రిటర్న్ దాఖలు చేయడం తప్పనిసరి. అటువంటి పరిస్థితిలో మీరు కూడా ఈ స్లాబ్ కిందకు వస్తే, ఈ సంవత్సరానికి మీ రిటర్న్‌ను దాఖలు చేయాలి. అయితే ఈ సంవత్సరం ఆదాయపు పన్ను రిటర్న్‌ల వాపసులో ఆలస్యం జరగవచ్చు. దీనికి కారణం కూడా ఉంది.

ఐటీఆర్ దాఖలు

నిశితంగా పరిశీలన

ఈసారి ఆదాయపు పన్ను శాఖ రిటర్న్ దాఖలు చేసేటప్పుడు ఇచ్చిన మొత్తం సమాచారాన్ని చాలా నిశితంగా తనిఖీ చేస్తోంది. కచ్చితమైన సమాచారాన్ని మాత్రమే ఇవ్వాలి. తప్పుడు సమాచారం ఇస్తే చట్ట పరమైన చర్యలు తీసుకుంటుంది. పన్ను శాఖ ఐటీఆర్ దాఖలు సమాచారాన్ని క్షుణ్ణంగా పరిశీలిస్తోంది. అందుకే ఈసారి ఐటీఆర్ వాపసులో ఆలస్యం జరగవచ్చని చెప్పవచ్చు.

ఎక్కువ వాపసులపై ఫోకస్

చెల్లింపుదారులు ఏ ఫారమ్‌ను నింపారో ఆదాయపు పన్ను శాఖ చెక్ చేస్తోంది. ఐటీఆర్-1 లేదా ఐటీఆర్-4 వంటి ఫారమ్‌లు సాధారణంగా ఐటీఆర్-2 లేదా ఐటీఆర్-3 ఫారమ్‌లతో పోలిస్తే తక్కువ సమయంలో ప్రాసెస్ అవుతాయి. దీనితో పాటు ఎక్కువ వాపసు క్లెయిమ్‌ల విషయంలో కూడా ఆదాయపు పన్ను శాఖ తనిఖీలు కఠినంగా చేస్తుంది.

వడ్డీ

ఆదాయపు పన్ను చట్టంలోని సెక్షన్ 244A ప్రకారం, పన్ను వాపసులో జాప్యం జరిగితే ప్రభుత్వం ప్రతి నెలా 0.5 శాతం వడ్డీని అందిస్తుంది. ఈ వడ్డీని రిటర్న్ దాఖలు చేసిన రోజు నుండి లేదా అసెస్‌మెంట్ సంవత్సరం ముగిసిన రోజు నుండి లెక్కిస్తారు. మీ మొత్తం పన్నులో 10 శాతం కంటే ఎక్కువ వాపసు మొత్తం ఉన్నప్పుడు మాత్రమే వడ్డీ అందుబాటులో ఉంటుంది.

ఇలా చేయకండి

పన్ను చెల్లింపుదారులు తప్పుడు ఫారమ్ ఎంచుకోవద్దు. మీ ఆదాయాన్ని బట్టి సరైన ఫారమ్ ఎంచుకోవాలి. మూలధన లాభాలు లేదా అద్దె ఆదాయం ఉన్నా.. ఐటీఆర్ 1 ఫారమ్ ఎంచుకుంటే సెక్షన్ 139(9) కింద రిటర్ను నోటీసు అందుకోవచ్చు. టీడీఎస్ రిపోర్టులో తేడాలు ఉంటే కూడా నోటీసులు వచ్చే ఛాన్స్ ఉంది. మీకు ఆదాయపు పన్ను పోర్టల్ నోటీసులు వస్తే.. వాటిని లైట్ తీసుకోవద్దు. గడువులను మరిచిపోకూడదు. చిన్న పొరపాటు కూడా పెద్ద సమస్యగా మారవచ్చు.