కేంద్ర ఉద్యోగులకు డీఏ పెంపు ఎప్పుడు?.. 8వ పే కమిషన్ భేటీ షెడ్యూలు ఇదీ

కేంద్ర ప్రభుత్వ ఉద్యోగులు, రిటైర్డ్ పెన్షనర్లకు జీతాల పెంపు, కరువు భత్యం (డీఏ) సవరణ అంశాలు తీవ్ర ఉత్కంఠ రేపుతున్నాయి. జూలై 2026 విడత డీఏ పెంపుపై కేంద్ర మంత్రివర్గం త్వరలోనే అధికారిక నిర్ణయం తీసుకునే అవకాశాలు కనిపిస్తున్నాయి. దీనికి తోడు 8వ వేతన సంఘం సంప్రదింపుల ప్రక్రియను ముందుకు తీసుకెళ్తోంది.

అఖిల భారత పారిశ్రామిక కార్మికుల వినియోగదారుల ధరల సూచీ (AICPI-IW) ఆధారంగా ఏడాదికి రెండుసార్లు డీఏను సవరిస్తారు. జనవరి నుంచి జూన్, జూలై నుంచి డిసెంబరు కాలానికిగానూ ఈ లెక్కలు వేస్తారు. 2026 జనవరి 1 నుంచి అమల్లోకి వచ్చేలా కేంద్రం డీఏను 58 శాతం నుంచి 60 శాతానికి (2 శాతం పెంపు) పెంచింది. పెన్షనర్లకు ఇచ్చే డియర్‌నెస్ రిలీఫ్ (డీఆర్)ను కూడా 60 శాతానికి సవరించింది.

కేంద్ర ఉద్యోగులకు డీఏ పెంపు ఎప్పుడు?.. 8వ పే కమిషన్ భేటీ షెడ్యూలు ఇదీ

ప్రస్తుతం జూలై 2026 నుంచి వర్తించే రెండో విడత పెంపుపై ప్రకటన వెలువడాల్సి ఉంది. ఒకవేళ డీఏ 3 శాతం పెరిగితే, అది 60 శాతం నుంచి 63 శాతానికి చేరుకుంటుంది. అయితే, కేంద్ర క్యాబినెట్ అధికారికంగా గ్రీన్ సిగ్నల్ ఇచ్చే వరకు దీనిపై పూర్తి స్పష్టత రాదు.

8వ వేతన సంఘం సంప్రదింపుల హోరు

కేంద్ర ప్రభుత్వం 2025 నవంబరు 3న జస్టిస్ రంజన ప్రకాశ్ దేశాయ్ అధ్యక్షతన 8వ వేతన సంఘాన్ని ఏర్పాటు చేసింది. ఈ తాత్కాలిక సంఘం వివిధ ప్రభుత్వ విభాగాలు, ఉద్యోగ సంఘాలు, పెన్షనర్లు, ఇతర భాగస్వామ్య పక్షాలతో మాట్లాడి నివేదిక సిద్ధం చేస్తుంది. ఉద్యోగుల వేతనాలు, భత్యాలు, పెన్షన్లు, సేవా పరిస్థితుల మెరుగుదలపై ఈ కమిషన్ సిఫార్సులు చేయనుంది.

ఇటీవలే జైపూర్‌లోని హెచ్‌సీఎమ్ రిపా (HCM RIPA) వద్ద కీలక సమావేశం ముగిసింది. ఇందులో పెద్ద ఎత్తున ఉద్యోగులు పాల్గొని తమ అభిప్రాయాలను, డిమాండ్లను కమిషన్‌కు వివరించారు.

రాబోయే వేతన సంఘం సమావేశాల షెడ్యూల్

• 8వ వేతన సంఘం రాబోయే రోజుల్లో పలు ప్రాంతాల్లో పర్యటించనుంది.
• సెప్టెంబరు 9న పుదుచ్చేరిలో సంప్రదింపులు
• సెప్టెంబరు 16 నుంచి 18 వరకు ఛండీగఢ్‌లో భేటీలు
• అక్టోబరు 7, 8 తేదీల్లో బెంగళూరులో సమావేశాలు
• ఈ కమిషన్ తన తుది సిఫార్సుల నివేదికను 2027 మే-జూన్ నాటికి కేంద్ర ప్రభుత్వానికి సమర్పించే అవకాశం ఉంది.

ఫిట్‌మెంట్ ఫ్యాక్టర్ ఆధారంగా జీతాల పెంపు

ఉద్యోగుల మూల వేతనం సవరణకు 'ఫిట్‌మెంట్ ఫ్యాక్టర్' అత్యంత కీలకం. గతంలో 6వ వేతన సంఘం 1.86, 7వ వేతన సంఘం 2.57 ఫిట్‌మెంట్ ఫ్యాక్టర్లను అమలు చేశాయి. అయితే, 8వ వేతన సంఘంలో అంతకంటే ఎక్కువ ఫిట్‌మెంట్ ఫ్యాక్టర్ సాధించేందుకు బీపీఎంఎస్ (BPMS), ఎన్సీ జేసీఎం (NC JCM), ఏఐడీఈఎఫ్ (AIDEF) వంటి ఉద్యోగ సంఘాలు తీవ్రంగా ప్రయత్నిస్తున్నాయి. కమిషన్ ఇచ్చే సిఫార్సులు, దానిపై ప్రభుత్వం తీసుకునే నిర్ణయం ఆధారంగానే ఉద్యోగుల భవిష్యత్తు జీతభత్యాలు ఖరారవుతాయి.

మరిన్ని తాజా వివరాల కోసం ఉద్యోగులు 8వ పే కమిషన్ అధికారిక వెబ్‌సైట్ https://8cpc.gov.in ను సందర్శించవచ్చు.