మారుతి నుంచి తొలి సీఎన్‌జీ ఆటోమేటిక్ కార్: సెప్టెంబర్ 5న కొత్త బాలెనో లాంచ్

భారత మార్కెట్లో అత్యంత ప్రాచుర్యం పొందిన ప్రీమియం హ్యాచ్‌బ్యాక్ మారుతి సుజుకి బాలెనో కొత్త ఫేస్‌లిఫ్ట్ అవతారంలో అలరించేందుకు సిద్ధమైంది. మారుతి సంస్థలోనే తొలిసారిగా సీఎన్‌జీ-ఏఎమ్‌టీ ఆటోమేటిక్ టెక్నాలజీతో రానున్న ఈ కారు విశేషాలు పరిశీలించండి.

ప్రీమియం హ్యాచ్‌బ్యాక్ విభాగంలో తిరుగులేని ఆధిపత్యం చెలాయిస్తున్న మారుతి సుజుకి బాలెనో (Baleno) సరికొత్త రూపంలో మార్కెట్లోకి అడుగుపెట్టబోతోంది. వినియోగదారులు ఎంతగానో ఎదురుచూస్తున్న బాలెనో ఫేస్‌లిఫ్ట్ వెర్షన్‌ను సెప్టెంబర్ 5న అధికారికంగా విడుదల చేయనున్నారు. భారత ప్యాసింజర్ వాహన మార్కెట్లో టాటా ఆల్ట్రోజ్, హ్యుందాయ్ ఐ20, టయోటా గ్లాంజా వంటి కార్లతో ఇది నేరుగా పోటీపడనుంది.

నయా ఇంజిన్.. మారుతి చరిత్రలోనే మొదటి సీఎన్‌జీ ఆటోమేటిక్

మారుతి నుంచి తొలి సీఎన్‌జీ ఆటోమేటిక్ కార్: సెప్టెంబర్ 5న కొత్త బాలెనో లాంచ్ (@YouTube/Harsh VLOGS)

ఈ కొత్త బాలెనో ఫేస్‌లిఫ్ట్ కేవలం లుక్స్, డిజైన్‌లోనే కాకుండా మెకానికల్ పరంగానూ కీలక మార్పులతో వస్తోంది. సరికొత్త స్విఫ్ట్‌లో అందిస్తున్న 1.2-లీటర్ 'జెడ్-సిరీస్' (Z-Series) 3-సిలిండర్ పెట్రోల్ ఇంజిన్‌ను ఈ కారులో ఉపయోగించనున్నారు. ఇదే ఇంజిన్‌తో ఫ్యాక్టరీ ఫిట్టెడ్ సీఎన్‌జీ (CNG) ఆప్షన్ కూడా లభిస్తుంది.

అయితే, ఇక్కడ అత్యంత ఆసక్తికరమైన అంశం ఏంటంటే.. మారుతి సుజుకి తమ వాహన శ్రేణిలోనే తొలిసారిగా 'సీఎన్‌జీ-ఏఎమ్‌టీ' (CNG-AMT) ఆటోమేటిక్ గేర్‌బాక్స్ కాంబినేషన్‌ను ఈ బాలెనో ఫేస్‌లిఫ్ట్ ద్వారా పరిచయం చేయబోతోంది.

మైలేజ్, డ్రైవింగ్ హాయి కలిసొచ్చే టెక్నాలజీ

సీఎన్‌జీ-ఏఎమ్‌టీ టెక్నాలజీ ద్వారా వాహనదారులకు రెండు రకాల ప్రయోజనాలు లభిస్తాయి. పెట్రోల్, సీఎన్‌జీ రెండు ఆప్షన్లు ఉండటంతో సుదీర్ఘ ప్రయాణాలు చేసేందుకు వీలవుతుంది. సీఎన్‌జీ మోడ్‌లో నడపడం వల్ల ప్రయాణ ఖర్చులు గణనీయంగా తగ్గుతాయి. మరోవైపు, ట్రాఫిక్ నిండిన నగర రహదారులపై పదే పదే గేర్లు మార్చే అవసరం లేకుండా ఏఎమ్‌టీ (Automated Manual Transmission) సులువైన డ్రైవింగ్ అనుభూతిని ఇస్తుంది.

సంప్రదాయ ఫుల్లీ ఆటోమేటిక్ గేర్‌బాక్స్‌లతో పోలిస్తే ఏఎమ్‌టీ టెక్నాలజీ తక్కువ ధరకే లభించడమే కాకుండా, మెరుగైన ఇంధన సామర్థ్యాన్ని, తక్కువ నిర్వహణ వ్యయాన్ని అందిస్తుంది. డ్రైవర్ తన అవసరానికి తగినట్లుగా దీనిని ఆటోమేటిక్ లేదా మాన్యువల్ మోడ్‌లో నడుపుకునే వెసులుబాటు కూడా ఉంటుంది.

పోటీదారులకు సవాలు.. ఏడీఏఎస్ (ADAS) ఫీచర్లు

ఇతర కీలక మార్పుల విషయానికొస్తే, ప్రీమియం హ్యాచ్‌బ్యాక్ విభాగంలోనే తొలిసారిగా అడ్వాన్స్‌డ్ డ్రైవర్ అసిస్టెన్స్ సిస్టమ్ (ADAS) ఫీచర్లను కూడా ఈ బాలెనో ఫేస్‌లిఫ్ట్‌లో పరిచయం చేసే అవకాశాలు ఉన్నాయి.