మైక్రోసాఫ్ట్‌ ఉద్యోగులకు షాక్: 90% మందికి 5% కంటే తక్కువ జీతాల పెంపు

మైక్రోసాఫ్ట్ ఇండియాలో పనిచేస్తున్న 90 శాతానికి పైగా ఉద్యోగులకు ఈ ఏడాది 5 శాతం లేదా అంతకంటే తక్కువ శాతమే జీతాలు పెరిగాయి. కంపెనీ లాభాల్లో రికార్డులు సృష్టిస్తున్నప్పటికీ, వేతన పెంపు విషయంలో నిరాశే మిగిలిందని 'బ్లైండ్' ప్లాట్‌ఫామ్ నిర్వహించిన సర్వే వెల్లడించింది.

టెక్ దిగ్గజం మైక్రోసాఫ్ట్ ఇండియా ఉద్యోగులకు ఈ ఏడాది అప్రైజల్స్ తీవ్ర నిరాశను మిగిల్చాయి. వృత్తిపరమైన నెట్‌వర్కింగ్ వేదిక 'బ్లైండ్' (Blind) నిర్వహించిన సర్వే ప్రకారం.. భారతదేశంలోని 90 శాతానికి పైగా మైక్రోసాఫ్ట్ ఉద్యోగులకు 2026 అప్రైజల్ సైకిల్‌లో కేవలం 5 శాతం లేదా అంతకంటే తక్కువ శాతమే వేతన పెంపు లభించింది.

మైక్రోసాఫ్ట్‌ ఉద్యోగులకు షాక్: 90% మందికి 5% కంటే తక్కువ జీతాల పెంపు

ఈ సర్వేలో పాల్గొన్న 2,178 మంది భారతీయ ఐటీ నిపుణులలో, 91 శాతం మంది మైక్రోసాఫ్ట్ సిబ్బంది తమకు 5 శాతం లేదా అంతకంటే తక్కువ పెంపు మాత్రమే వచ్చిందని చెప్పారు. గతేడాది ఈ సంఖ్య 45 శాతంగా ఉండగా, ఈసారి అమాంతం పెరిగింది. 10 శాతానికంటే ఎక్కువ పెంపు పొందిన ఉద్యోగుల సంఖ్య గతేడాది ఉన్న 27 శాతం నుండి ఈ ఏడాది కేవలం 5 శాతానికి పడిపోయింది.

రికార్డు లాభాలు ఒకవైపు.. ఉద్యోగుల ఆవేదన మరోవైపు

కంపెనీ ఆర్థికంగా అత్యుత్తమ ప్రదర్శన కనబరుస్తున్న తరుణంలోనే ఈ పరిణామం చోటుచేసుకుంది. ఇటీవల ముగిసిన జూలై-సెప్టెంబర్ త్రైమాసికంలో మైక్రోసాఫ్ట్ నికర ఆదాయం ఏడాది క్రితంతో పోలిస్తే 32 శాతం పెరిగి 36.6 బిలియన్ డాలర్లకు చేరింది. కంపెనీ మొత్తం రాబడి 19 శాతం వృద్ధితో 92.3 బిలియన్ డాలర్లను తాకింది. మైక్రోసాఫ్ట్ క్లౌడ్ రాబడి 30 శాతం పెరిగి 63.9 బిలియన్ డాలర్లకు చేరుకోగా, యాజూర్ (Azure) విభాగం రాబడి ఏకంగా 48 శాతం వృద్ధి చెందింది.

రాబోయే త్రైమాసికంలో రాబడి 97.1 బిలియన్ డాలర్లకు చేరుకుంటుందని అంచనా వేస్తున్న మైక్రోసాఫ్ట్, ఏఐ ఇన్ఫ్రాస్ట్రక్చర్ అభివృద్ధి కోసం 50 బిలియన్ డాలర్లకు పైగా మూలధన వ్యయాన్ని కేటాయించాలని ప్రణాళికలు సిద్ధం చేసింది. ఇంతటి భారీ రాబడులు వస్తున్నప్పటికీ, వేతన పెంపుపై 86 శాతం మంది మైక్రోసాఫ్ట్ సిబ్బంది తీవ్ర అసంతృప్తి వ్యక్తం చేశారు. ఫలితంగా, జోహో (Zoho) తర్వాత అత్యంత తక్కువ రేటింగ్ పొందిన రెండో ఐటీ యజమానిగా మైక్రోసాఫ్ట్ నిలిచింది.

స్వచ్ఛంద విరమణల భయం.. మారిన ఉద్యోగుల ప్రాధాన్యతలు

మరోవైపు, మైక్రోసాఫ్ట్ చీఫ్ పీపుల్ ఆఫీసర్ అమీ కోల్‌మన్ ఇటీవల గ్లోబల్ వ్యాప్తంగా దాదాపు 60,000 మంది ఉద్యోగుల కోసం వాలంటరీ ఎగ్జిట్ ఆఫర్ (VEO) ప్రకటించారు. భారతదేశం, అమెరికా, కెనడా, బ్రిటన్ వ్యాప్తంగా ఉన్న లెవెల్ 70, అంతకంటే తక్కువ స్థాయి అర్హత కలిగిన ఉద్యోగులు డిసెంబర్ ప్రారంభం వరకు ఈ ప్రోగ్రామ్‌లో చేరేందుకు అవకాశం ఉంది.

ఈ స్వచ్ఛంద విరమణ ఆఫర్ల నేపథ్యంలో ఉద్యోగుల దృష్టి వేతన పెంపు నుండి ఉద్యోగ రక్షణ వైపు మళ్లింది. గడిచిన ఏడాది కాలంలో భారతీయ వినియోగదారులు బైఅవుట్‌లు, వాలంటరీ ఎగ్జిట్ ప్రోగ్రామ్‌లకు సంబంధించిన సమాచారం కోసం చేసిన సెర్చ్‌లు 60 శాతం పెరిగినట్లు బ్లైండ్ నివేదించింది. అలాగే లేఆఫ్‌లు, సెవెరెన్స్ ప్యాకేజీల వెతుకులాట 16 శాతం నుంచి 21 శాతానికి పెరగ్గా, జీతాల పెంపుపై ఆసక్తి 7 శాతం తగ్గింది.

ఐటీ రంగాన్ని ఏలుతున్న ఏఐ, ఖర్చుల కోతలు

ఈ ధోరణి కేవలం ఒక్క కంపెనీకే పరిమితం కాకుండా మొత్తం భారత ఐటీ రంగంలోని ఆందోళనలను ప్రతిబింబిస్తోంది. కంపెనీలు తమ వ్యక్తిగత ప్రతిభ కంటే కార్పొరేట్ ప్రాధాన్యతలకే ఎక్కువ ప్రాముఖ్యత ఇస్తున్నాయని ఉద్యోగులు భావిస్తున్నారు.

సర్వే ప్రకారం, 41 శాతం మంది ఉద్యోగులు తమ అప్రైజల్ ఫలితాలకు కంపెనీల ఆర్థిక ప్రదర్శన, ఖర్చుల కోతలే కారణమని పేర్కొన్నారు. మరో 18 శాతం మంది ఏఐ, ఆటోమేషన్ దిశగా మారుతున్న వ్యాపార ప్రాధాన్యతలను బాధ్యులను చేయగా, కేవలం 22 శాతం మంది మాత్రమే తమ వ్యక్తిగత ప్రతిభే పెంపునకు ప్రధాన కారణమని భావించారు.

మొత్తంగా చూస్తే, ఈ ఏడాది భారత ఐటీ ఉద్యోగుల్లో 35 శాతం మందికి ఎలాంటి పెంపు లభించలేదు లేదా జీతాల్లో కోత పడింది. 59 శాతం మందికి 5 శాతం లేదా అంతకంటే తక్కువ పెంపు దక్కింది. దాదాపు మూడింట రెండొంతుల మంది ఐటీ సిబ్బంది తమ వార్షిక అప్రైజల్స్‌పై తీవ్ర అసంతృప్తితో ఉన్నారని నివేదిక స్పష్టం చేసింది.