ఓల్డ్ మాంక్ వివాదం: చట్టపరంగా ‘రమ్’ లేదా ‘విస్కీ’ అని దేనిని పిలవవచ్చో తెలుసా?

తప్పుదోవ పట్టించే లేబులింగ్‌ను ఉపయోగిస్తున్నాయనే కారణంతో 'ఓల్డ్ మాంక్' (Old Monk) కి చెందిన మూడు ప్రముఖ వెరైటీలపై ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) నిషేధం విధించింది. ఈ నేపథ్యంలో అసలు చట్టబద్ధంగా రమ్, విస్కీలను ఎలా నిర్వచిస్తారు? తయారీ నిబంధనలు ఏం చెబుతున్నాయి? తెలుసుకుందాం.

ఓల్డ్ మాంక్‌కు చెందిన 'ది లెజెండ్' (The Legend), 'గోల్డ్ రిజర్వ్' (Gold Reserve), 'XXX మెచ్యూర్డ్ రమ్' (XXX Matured Rum) ఉత్పత్తులపై ఎఫ్‌ఎస్‌ఎస్‌ఏఐ నిషేధం విధించడంతో మద్యం తయారీ రంగంలో పెద్ద చర్చ నడుస్తోంది. కొన్ని రకాల బ్రాండ్లు 'న్యూట్రల్ స్పిరిట్' (సొంత రుచి లేని రసాయన ఆల్కహాల్) కు కృత్రిమంగా రమ్ లేదా విస్కీ ఫ్లేవర్లను కలిపి ప్రామాణిక ఉత్పత్తులుగా అమ్ముతున్నట్లు ల్యాబ్ పరీక్షల్లో తేలింది.

ఓల్డ్ మాంక్ వివాదం: చట్టపరంగా ‘రమ్’ లేదా ‘విస్కీ’ అని దేనిని పిలవవచ్చో తెలుసా?

"రమ్‌కు ప్రత్యేకంగా బయటి నుంచి రమ్ ఫ్లేవర్, విస్కీకి బయటి నుంచి విస్కీ ఫ్లేవర్ కలిపి తయారు చేసే విధానం అంతర్జాతీయంగా ఎక్కడా గుర్తింపు పొందలేదు. సహజమైన సువాసనను కప్పిపుచ్చి విడిగా ఫ్లేవర్లను చేర్చడం వినియోగదారులను మోసం చేయడమే" అని ఎఫ్‌ఎస్‌ఎస్‌ఏఐ స్పష్టం చేసింది.

చట్టపరంగా ‘రమ్’ అంటే ఏమిటి?

FSSAI (ఆల్కహాలిక్ బెవరేజెస్) నిబంధనలు - 2018 ప్రకారం రమ్‌ను క్రింది విధంగా నిర్వచించారు.

మూల పదార్థం (Base Ingredient): చెరకు రసం (Sugarcane Juice), చెరకు మొలాసిస్ (Sugarcane Molasses) లేదా చెరకు సంబంధిత పదార్థాలను పులియబెట్టి (Fermentation) డిస్టిలేషన్ ద్వారా తీసే ఆల్కహాల్ ఆధారంగా రమ్ ఉండాలి.

కలరింగ్ అండ్ ఫ్లేవరింగ్: రమ్‌లో 'కారమెల్' (Caramel) మినహా ఎలాంటి ఇతర కృత్రిమ రంగులు వాడకూడదు.

వైట్ రమ్: ఎలాంటి రంగులు కలపకుండా సహజంగా తయారు చేస్తే దానిని స్పష్టంగా "వైట్ రమ్" (White Rum) అని లేబుల్ చేయాలి.

చట్టపరంగా ‘విస్కీ’ అంటే ఏమిటి?

మూల పదార్థం (Base Ingredient): మొలకెత్తిన ధాన్యాలు (Malted Cereal Grains) అంటే మొక్కజొన్న, జొన్నలు, బార్లీ వంటి ధాన్యాల రసాన్ని పులియబెట్టి, డిస్టిలేషన్ ద్వారా విస్కీ తయారు చేస్తారు.

స్పిరిట్ సోర్స్: ధాన్యాల నుంచి వచ్చే న్యూట్రల్ స్పిరిట్ లేదా అగ్రికల్చరల్ స్పిరిట్ మిశ్రమాలను కూడా ఇందుకోసం వాడవచ్చు.

రమ్ vs విస్కీ: ప్రధాన వ్యత్యాసాలు

మద్యానికి దాని ప్రత్యేక రుచి, సువాసన సహజంగా వచ్చే ధాన్యాలు/చెరకు, ఫెర్మెంటేషన్, డిస్టిలేషన్, బారెల్ మెచ్యూరేషన్ (పరిపక్వత) ద్వారా మాత్రమే రావాలని ఎఫ్‌ఎస్‌ఎస్‌ఏఐ స్పష్టం చేసింది.

న్యూట్రల్ ఆల్కహాల్ వాడుకపై నిషేధం: చౌకగా లభించే న్యూట్రల్ ఆల్కహాల్‌కు ఆర్టిఫిషియల్ ఫ్లేవర్లు కలిపి దానిని 'రమ్' లేదా 'విస్కీ' అని అమ్మడం నేరం.

నూతన లేబులింగ్ నిబంధనలు: ఒకవేళ బయటి ఫ్లేవర్లు కలిపి తయారు చేస్తే, బాటిల్ ముందు భాగంలో స్పష్టంగా "రమ్-ఫ్లేవర్డ్ స్పిరిట్" (Rum-flavoured spirit) లేదా "విస్కీ-ఫ్లేవర్డ్ స్పిరిట్" (Whisky-flavoured spirit) అని ముద్రించాలి తప్ప, కేవలం రమ్ లేదా విస్కీగా విక్రయించకూడదు.