E-Paper
పద్మ అవార్డులు ప్రకటించిన కేంద్రం.. తెలుగు రాష్ట్రాల నుంచి 11 మంది వీరే!
కేంద్ర ప్రభుత్వం పద్మ అవార్డులు ప్రకటించింది. తెలుగు రాష్ట్రాల నుంచి మెుత్తం 11 మందికి పద్మ పురస్కారాలు వరించాయి.
2026కి సంబంధించి.. కేంద్ర ప్రభుత్వం పద్మ అవార్డులను ప్రకటించింది. రిపబ్లిక్ డే సందర్భంగా ఒకరోజు ముందుగానే ఈ పురస్కారాల లిస్ట్ను విడుదల చేసింది. ఐదుగురికి పద్మవిభూషణ్, 13 మందికి పద్మ భూషణ్, 113మందికి పద్మశ్రీ అవార్డులు వచ్చాయి. పద్మశ్రీ వచ్చిన వారిలో 11 మంది తెలుగు వారు ఉన్నారు. ప్రముఖ క్యాన్సర్ వైద్యుడు నోరి దత్తాత్రేయుడు(యూఎస్) పద్మభూషణ్ అవార్డుకు ఎంపికయ్యారు. యూజీసీ మాజీ ఛైర్మన్ మామిడాల జగదీశ్ కుమార్కు దిల్లీ కోటాలో పద్మశ్రీ వరించింది.
తెలంగాణకు చెందిన రామ రెడ్డి మామిడి.. పశు పోషణ, పాడి రంగంలో చేసిన విశేష సేవలకు పద్మశ్రీ పురస్కారం లభించింది. పశు పోషణ, పాడి రంగంలో సహకార సంస్థల ఆధారిత వృద్ధికి ఆయన మార్గదర్శకుడిగా నిలిచారు. సహ వికాస సంస్థ స్థాపకుడిగా రామ రెడ్డి మామిడి.. సహకార సంస్థలను ఏర్పాటు చేసి చాలా మందికి జీవనోపాధిని మెరుగుపరిచారు. పశుపోషణ, పాడి నిర్వహణ, ఆర్థిక పరిపాలన అంశాల్లో రైతులకు శిక్షణ అందించారు. మహిళల నేతృత్వంలోని సహకార సంస్థలను ప్రోత్సహిస్తూ, దూరదృష్టి కలిగిన వ్యక్తిగా తనదైన ముద్ర వేశారు.
హైదరాబాద్ సీసీఎంబీ శాస్త్రవేత్త డా.కుమారస్వామి తంగరాజ్కు పద్మశ్రీ పురస్కారాన్ని ప్రకటించింది కేంద్రం. భారతీయ జనాభా జన్యు చరిత్రపై ఆయన మూడు దశాబ్దాలకు పైగా పరిశోధనలు చేశారు. అంతర్జాతీయ స్థాయిలో గుర్తింపు పొందారు. ఆఫ్రికా నుంచి జరిగిన మెుట్టమెుదటి మానవ వలసలపై పరిశోధన చేశారు. వీటితోపాటుగా అనేక పరిశోధనలు చేస్తూ.. కీలక విషయాలను తెలిపారు
తెలుగు రాష్ట్రాలకు చెందిన పద్మ అవార్డు గ్రహీతలు..
సినీనటుడు గద్దె బాబు రాజేంద్ర ప్రసాద్- కళలు(ఆంధ్రప్రదేశ్)
మాగంటి మురళీ మోహన్ - కళలు(ఆంధ్రప్రదేశ్)
కృష్ణమూర్తి బాల సుబ్రహ్మణియన్ - సైన్స్ అండ్ ఇంజినీరింగ్(తెలంగాణ)
పాల్కొండ విజయ్ ఆనంద్రెడ్డి - వైద్యం(తెలంగాణ)
గరిమెళ్ల బాలకృష్ణ ప్రసాద్ - కళలు(ఆంధ్రప్రదేశ్)
డాక్టర్ కుమారస్వామి తంగరాజ్ - సైన్స్(తెలంగాణ)
రామారెడ్డి మామిడి - పశుసంవర్థక, పాడి పరిశ్రమ(తెలంగాణ)
వెంపటి కుటుంబ శాస్త్రి - సాహిత్యం(ఆంధ్రప్రదేశ్)
గూడూరు వెంకట్రావు - వైద్యం(తెలంగాణ)
దీపికారెడ్డి - నృత్యకారిణి(తెలంగాణ)
గద్దమనుగు చంద్రమౌళి - సైన్స్ విభాగం(తెలంగాణ)
