మోదీ 76వ పుట్టినరోజు: వారాణాసిలో ఎన్డీయే సీఎంల భేటీ

ప్రధాన మంత్రి నరేంద్ర మోదీ 76వ జన్మదినాన్ని పురస్కరించుకుని గురువారం వారాణాసిలో ఎన్డీయే పాలిత రాష్ట్రాల ముఖ్యమంత్రులు భేటీ కానున్నారు. ఈ సందర్భంగా 'సేవా సే సంకల్ప్ అభియాన్' పేరిట నెల రోజుల పాటు సేవా కార్యక్రమాలు, రెండు ప్రత్యేక బైక్ ర్యాలీలను నిర్వహించనున్నారు.

ప్రధాన మంత్రి నరేంద్ర మోదీ 76వ జన్మదిన వేడుకలకు దేశ ఆధ్యాత్మిక రాజధాని వారాణాసి వేదిక కానుంది. సెప్టెంబర్ 17న ప్రధాని మోదీ పుట్టినరోజును పురస్కరించుకుని ఆయన ప్రాతినిధ్యం వహిస్తున్న వారాణాసి లోక్‌సభ నియోజకవర్గంలో ఎన్డీయే (NDA) పాలిత రాష్ట్రాల ముఖ్యమంత్రులందరూ ప్రత్యేకంగా సమావేశం కానున్నారు.

మోదీ 76వ పుట్టినరోజు: వారాణాసిలో ఎన్డీయే సీఎంల భేటీ (Aftab Alam Siddiqui)

నెల రోజుల పాటు 'సేవా సే సంకల్ప్ అభియాన్'

ప్రధాని పుట్టినరోజు సందర్భాన్ని పురస్కరించుకుని భారతీయ జనతా పార్టీ (బీజేపీ) దేశవ్యాప్తంగా సెప్టెంబర్ 17 నుంచి అక్టోబర్ 17 వరకు నెల రోజుల పాటు ‘సేవా సే సంకల్ప్ అభియాన్’ పేరిట పలు ప్రజా సంక్షేమ, సేవా కార్యక్రమాలను చేపట్టనుంది. ఈ అభియాన్ ప్రారంభానికి గుర్తుగా ప్రధాని జన్మస్థలమైన గుజరాత్‌లోని వడ్నాగర్, ఆయన పార్లమెంట్ నియోజకవర్గమైన ఉత్తరప్రదేశ్‌లోని వారాణాసిల మధ్య రెండు భారీ బైక్ ర్యాలీలను నిర్వహించనున్నారు.

'వడ్నాగర్ నుంచి వారాణాసి', 'వారాణాసి నుంచి వడ్నాగర్' పేరిట ఈ రెండు బైక్ ర్యాలీలు సెప్టెంబర్ 17న ఒకే సమయంలో ప్రారంభమై అక్టోబర్ 7న ముగుస్తాయని బైక్ ర్యాలీ జాతీయ ఇన్‌ఛార్జ్ వి.డి.శర్మ వెల్లడించారు.

ప్రముఖ నాయకుల సమక్షంలో ప్రారంభోత్సవాలు

వడ్నాగర్‌లో జరిగే ఫ్లాగ్ ఆఫ్ కార్యక్రమానికి కేంద్ర హోం మంత్రి అమిత్ షా, గుజరాత్ ముఖ్యమంత్రి భూపేంద్ర పటేల్, మహారాష్ట్ర డిప్యూటీ సీఎం ఏక్‌నాథ్ షిండే, కేంద్ర మంత్రి అనుప్రియా పటేల్, గుజరాత్ బీజేపీ అధ్యక్షుడు జగదీష్ విశ్వకర్మ హాజరుకానున్నారు.

మరోవైపు వారాణాసిలో జరిగే ర్యాలీ ప్రారంభోత్సవంలో కేంద్ర రక్షణ మంత్రి రాజ్‌నాథ్ సింగ్, ఉత్తరప్రదేశ్ ముఖ్యమంత్రి యోగి ఆదిత్యనాథ్, ఆంధ్రప్రదేశ్ ముఖ్యమంత్రి నారా చంద్రబాబు నాయుడు, కేంద్ర మంత్రి చిరాగ్ పాశ్వాన్ తదితర ముఖ్య నేతలు పాల్గొంటారు. వడ్ నగర్ నుంచి బయలుదేరే ర్యాలీ దేశంలోని వివిధ ప్రాంతాల గుండా ప్రయాణించి వారాణాసి చేరుకోగా, వారాణాసి నుంచి బయలుదేరే ర్యాలీ వడ్ నగర్ వైపు సాగుతుంది.

కోల్‌కతాలో రాజ్‌నాథ్ సింగ్ విలేకరుల సమావేశం

'సేవా సే సంకల్ప్ అభియాన్' కార్యక్రమాలపై అవగాహన కల్పించేందుకు కేంద్ర రక్షణ మంత్రి రాజ్‌నాథ్ సింగ్ బుధవారం (సెప్టెంబర్ 16న) కోల్‌కతాలో విలేకరుల సమావేశాన్ని ఉద్దేశించి ప్రసంగించనున్నారు.

"ప్రధాని నరేంద్ర మోదీ జన్మదినంతో పాటు ఆయన గుజరాత్ ముఖ్యమంత్రిగా 13 ఏళ్లు, భారత ప్రధానిగా 12 ఏళ్లు.. మొత్తం 25 ఏళ్ల పాటు ప్రభుత్వ అధినేతగా విజయవంతంగా సేవలందించిన సందర్భాన్ని పురస్కరించుకుని 'సేవా సే సంకల్ప్ అభియాన్' చేపడుతున్నాం. ఈ విషయమై కోల్‌కతాలో మీడియా సమావేశంలో మాట్లాడబోతున్నాను" అని రాజ్‌నాథ్ సింగ్ 'ఎక్స్' (ట్విట్టర్) వేదికగా పేర్కొన్నారు.

ప్రధాని పుట్టినరోజు వేడుకలతో పాటు ప్రభుత్వ అధినేతగా పాతికేళ్ల మైలురాయిని పురస్కరించుకుని ఎన్డీయే కూటమి శ్రేణులు ఈ అభియాన్‌ను ఎంతో ప్రతిష్ఠాత్మకంగా నిర్వహిస్తున్నాయి.