సీజేఐపై వివాదాస్పద పోస్ట్: కేరళ కాంగ్రెస్‌కు సుప్రీంకోర్టు కోర్టుధిక్కార నోటీసులు

భారత ప్రధాన న్యాయమూర్తి (సీజేఐ) జస్టిస్ సూర్యకాంత్‌పై సోషల్ మీడియాలో అనుచిత వ్యాఖ్యలు చేసిన వ్యవహారంలో కేరళ ప్రదేశ్ కాంగ్రెస్ కమిటీకి సుప్రీంకోర్టు కోర్టుధిక్కార నోటీసులు జారీ చేసింది. రాజ్యాంగానికి ఎవరూ అతీతులు కారని, న్యాయవ్యవస్థను కించపరిచే చర్యలను ఉక్కుపాదంతో అణచివేస్తామని హెచ్చరించింది.

భారత ప్రధాన న్యాయమూర్తి (సీజేఐ) జస్టిస్ సూర్యకాంత్‌ను లక్ష్యంగా చేసుకుని సామాజిక మాధ్యమాల్లో పెట్టిన పోస్ట్‌పై అత్యున్నత న్యాయస్థానం తీవ్రంగా స్పందించింది. ఈ వ్యవహారంలో కేరళ ప్రదేశ్ కాంగ్రెస్ కమిటీ (కేపీసీసీ) నిర్వాహకులకు సుప్రీంకోర్టు శుక్రవారం కోర్టుధిక్కార నోటీసులు జారీ చేసింది.

రాజ్యాంగమే అత్యున్నతమైనది

భారత ప్రధాన న్యాయమూర్తి (సీజేఐ) జస్టిస్ సూర్యకాంత్‌

జస్టిస్ అరవింద్ కుమార్, జస్టిస్ విపుల్ ఎం పంబోలీలతో కూడిన ద్విసభ్య ధర్మాసనం ఈ పిటిషన్‌పై విచారణ చేపట్టింది. విచారణ సందర్భంగా న్యాయస్థానం పలు కీలక వ్యాఖ్యలు చేసింది.

"రాజ్యాంగమే అత్యున్నతమైనది. ఏ వ్యక్తి, ఏ వ్యవస్థ లేదా ఏ రాజకీయ పార్టీ కూడా రాజ్యాంగానికి అతీతం కాదు. న్యాయవ్యవస్థ స్వతంత్రత అనేది రాజకీయ ప్రయోజనాల కోసం వాడుకునే అంశం కాదు. అది భారత రాజ్యాంగం ఈ దేశ ప్రజలకు ఇచ్చిన పవిత్రమైన హామీ" అని ధర్మాసనం స్పష్టం చేసింది.

"న్యాయస్థానాల అధికార పరిధిని తక్కువ చేసి చూపించే లేదా వ్యవస్థను దెబ్బతీసే ఎలాంటి ప్రయత్నాలనైనా ఉక్కుపాదంతో అణచివేయాల్సిందే" అని కోర్టు హెచ్చరించింది.

అటార్నీ జనరల్ సహాయం అర్థించిన ధర్మాసనం

ఈ వ్యవహారంలో సివిల్ కోర్టుధిక్కారం వర్తిస్తుందా లేదా క్రిమినల్ కోర్టుధిక్కారం కింద చర్యలు తీసుకోవాలా అనే అంశాన్ని పరిశీలించేందుకు అత్యున్నత న్యాయస్థానం ఒక సీనియర్ న్యాయవాదిని 'అమిసస్ క్యూరీ'గా నియమించింది. అదే సమయంలో ఈ కేసులో కోర్టుకు సమగ్రంగా సహకరించాల్సిందిగా భారత అటార్నీ జనరల్ ఆర్ వెంకటరమణీని ధర్మాసనం కోరింది.

వివాదానికి నేపథ్యం ఏమిటి?

దేశ రాజధాని ఢిల్లీలో కాక్రోచ్ జనతా పార్టీ (సీజేపీ) నిర్వహించిన ఆందోళనల సందర్భంగా ఢిల్లీ పోలీసులు మితిమీరి ప్రవర్తించారంటూ దాఖలైన పిటిషన్లపై గత నెలలో సీజేఐ జస్టిస్ సూర్యకాంత్ విచారణ జరిపారు. ఆ విచారణ సమయంలో సీజేఐ చేసిన కొన్ని వ్యాఖ్యలను ఉటంకిస్తూ కేరళ ప్రదేశ్ కాంగ్రెస్ కమిటీ తన అధికారిక సోషల్ మీడియా ఖాతాలో వివాదాస్పద పోస్ట్ పెట్టింది.

ఖండించిన బార్ అసోసియేషన్లు.. కాంగ్రెస్ క్షమాపణలు

తీవ్రస్థాయిలో నిరసనలు, విమర్శలు వెల్లువెత్తడంతో కేపీసీసీ ఆ వివాదాస్పద పోస్ట్‌ను డిలీట్ చేసింది. అనంతరం కాంగ్రెస్ నాయకులు ఈ ఘటనపై బహిరంగంగా క్షమాపణలు చెప్పారు. ఆ పోస్ట్ పెట్టడానికి బాధ్యుడైన ఉద్యోగిని ఉద్యోగం నుంచి తొలగించినట్లు కాంగ్రెస్ పార్టీ ప్రకటించింది.