E-Paper
స్విగ్గీ క్యూ1 ఫలితాలు: రూ.791 కోట్లకు తగ్గిన నికర నష్టం, 37% పెరిగిన ఆదాయం
ప్రముఖ ఫుడ్ అండ్ క్విక్ కామర్స్ డెలివరీ ప్లాట్ఫారమ్ స్విగ్గీ 2026-27 ఆర్థిక సంవత్సరం తొలి త్రైమాసికంలో తన నష్టాలను గణనీయంగా తగ్గించుకుంది. క్విక్ కామర్స్ విభాగంలో నమోదైన వృద్ధితో ఆదాయం ఏకంగా 37 శాతం పెరిగి రూ. 6,812 కోట్లకు చేరింది.
ప్రముఖ ఫుడ్ డెలివరీ, క్విక్ కామర్స్ దిగ్గజం స్విగ్గీ ప్రస్తుత ఆర్థిక సంవత్సరం తొలి త్రైమాసికంలో (Q1 FY27) అద్భుత పనితీరు కనబరిచింది. ఏప్రిల్-జూన్ కాలానికి సంబంధించి కన్సాలిడేటెడ్ నికర నష్టాన్ని రూ. 791 కోట్లకు తగ్గించుకున్నట్లు ప్రకటించింది. క్రితం ఏడాది ఇదే కాలంలో నమోదైన రూ. 1,197 కోట్ల నష్టంతో పోలిస్తే ఇది గణనీయమైన మార్పు. మార్చి త్రైమాసికంలో ఉన్న రూ. 800 కోట్ల నష్టంతో పోల్చినా కంపెనీ ప్రతిభ మెరుగైంది.
కంపెనీ కార్యకలాపాల ద్వారా వచ్చిన కన్సాలిడేటెడ్ ఆదాయం ఏటా 37 శాతం వృద్ధి చెంది రూ. 6,812 కోట్లకు చేరుకుంది. గతేడాది ఇదే త్రైమాసికంలో ఆదాయం రూ. 4,961 కోట్లుగా ఉండగా, గత మార్చి త్రైమాసికంలో (Q4 FY26) రూ. 6,383 కోట్లుగా నమోదైంది. ప్రధానంగా క్విక్ కామర్స్ వ్యాపారంలో వచ్చిన జోరు కంపెనీ ఆదాయాన్ని పెంచడంలో కీలక పాత్ర పోషించింది. సర్దుబాటు చేసిన ఎబిటా (Adjusted EBITDA) నష్టం గత ఏడాది నమోదైన రూ. 945 కోట్ల నుంచి రూ. 650 కోట్లకు తగ్గింది.
వినియోగదారుల సంఖ్యలో జోరు
స్విగ్గీ ప్లాట్ఫారమ్ను ఉపయోగించే నెలవారీ లావాదేవీల వినియోగదారుల (MTUs) సంఖ్య ఏటా 27.4 శాతం పెరిగి 2.75 కోట్లకు (27.5 మిలియన్లు) చేరింది. జూన్ త్రైమాసికంలోనే వినియోగదారుల సంఖ్య 9.2 శాతం వృద్ధి చెందింది.
ఫుడ్ డెలివరీ విభాగంలో మొత్తం ఆర్డర్ల విలువ (GOV) 17.4 శాతం పెరిగి రూ. 9,490 కోట్లకు చేరింది. ఈ త్రైమాసికంలో క్రొత్తగా 9 లక్షల మంది వినియోగదారులు తోడవడంతో, ఫుడ్ డెలివరీ సేవలు పొందే వారి సంఖ్య 1.92 కోట్లకు పెరిగింది. ఈ విభాగం సర్దుబాటు చేసిన ఎబిటా ఏటా రూ. 100 కోట్లు మెరుగై రూ. 292 కోట్లుగా నమోదైంది.
రికార్డు వృద్ధితో క్విక్ కామర్స్
క్విక్ కామర్స్ విభాగం తన వేగవంతమైన ప్రగతిని కొనసాగించింది. ఈ విభాగంలో మొత్తం ఆర్డర్ల విలువ (GOV) ఏటా 39.8 శాతం పెరిగి రూ. 7,907 కోట్లకు చేరుకోగా, నికర ఆర్డర్ విలువ (NOV) 38.9 శాతం పెరిగి రూ. 5,817 కోట్లకు చేరింది. సగటు ఆర్డర్ విలువ (nAOV) 12.1 శాతం పెరిగి రూ. 508 గా నమోదైంది. నిత్యావసరాలు కాని ఇతర వస్తువుల విక్రయాలు పెరగడం ఇందుకు దోహదపడింది.
"పోటీ తీవ్రంగా ఉన్నప్పటికీ స్వల్పకాలిక ప్రచార ఆర్డర్ల కంటే వ్యాపార లాభదాయకత (Unit Economics) మెరుగుపరచుకోవడానికే ప్రాధాన్యత ఇచ్చాం" అని స్విగ్గీ తమ ప్రకటనలో స్పష్టం చేసింది.
ఈ త్రైమాసికంలో కంపెనీ కొత్తగా 28 డార్క్ స్టోర్లను ప్రారంభించింది. దీంతో దేశవ్యాప్తంగా 131 నగరాల్లో డార్క్ స్టోర్ల సంఖ్య 1,171 కి చేరింది. క్విక్ కామర్స్ విభాగంలో కంట్రిబ్యూషన్ మార్జిన్ బ్రేక్-ఈవెన్ లక్ష్యాన్ని కంపెనీ సాధించింది. సర్దుబాటు చేసిన ఎబిటా నష్టాలు రూ. 778 కోట్లకు తగ్గాయి.
