సింగిల్​ ఛార్జ్​తో 150 కి.మీ రేంజ్​- టీవీఎస్​ నుంచి కొత్త ఎలక్ట్రిక్​ స్కూటర్​ వచ్చేస్తోంది!

టీవీఎస్​ నుంచి ఇంకొన్ని రోజుల్లో ఒక కొత్త ఎలక్ట్రిక్​ స్కూటర్​ లాంచ్​ కాబోతోంది! దాని పేరు టీవీఎస్​ ఎం1 ఎస్​. ఇదొక మ్యాక్సీ ఎలక్ట్రిక్​ స్కూటర్​. ఈ మోడల్​ రేంజ్​, ఫీచర్స్​పై ఇప్పటి వరకు ఉన్న వివరాలను ఇక్కడ చూసేయండి..

టీవీఎస్ సంస్థ ఇటీవల టీవీఎస్ ఆర్​టీఎక్స్​ 300 మోడల్‌ను విడుదల చేసి అడ్వెంచర్ మోటార్‌సైకిల్ సెగ్మెంట్‌లోకి ప్రవేశించింది. ఇప్పుడు, ఐయాన్​ మొబిలిటీతో ఉన్న భాగస్వామ్యంలో భాగంగా, ఈసారి ఎలక్ట్రిక్ మ్యాక్సీ స్కూటర్ సెగ్మెంట్‌లోకి ప్రవేశించాలని టీవీఎస్ యోచిస్తోంది. ఇందులో భాగంగానే గత ఆగస్టులో 'ఎం1 ఎస్​' ఎలక్ట్రిక్ మ్యాక్సీ స్కూటర్​ టీజర్‌ను విడుదల చేసింది. ఇక ఇప్పుడు నవంబర్​లో జరగనున్న ఈఐసీఎంఏ 2025 ఈవెంట్​లో ఈ ఈ-స్కూటర్​ని అధికారికంగా ఆవిష్కరించనుంది. ఈ నేపథ్యంలోనే మరో టీజర్‌ను సైతం విడుదల చేసింది.

టీవీఎస్​ కొత్త ఎలక్ట్రిక్​ స్కూటర్​ వివరాలు..

టీవీఎస్​ ఎం1 ఎస్​ ఎలక్ట్రిక్​ స్కూటర్​..

లేటెస్ట్​, పాత టీజర్ చిత్రాలను గమనిస్తే.. టీవీఎస్ ఎం1 ఎస్ ఎలక్ట్రిక్​ స్కూటర్ షార్ప్‌గా, ఏరోడైనమిక్​గా ఉన్న ముందు భాగాన్ని కలిగి ఉందని స్పష్టమవుతోంది. ఇందులో 'కనుబొమ్మల' ఆకారంలో ఉన్న డీఆర్​ఎల్​ (డేటైమ్ రన్నింగ్ లైట్లు), అంతర్నిర్మిత టర్న్ ఇండికేటర్‌లతో ఎల్​ఈడీ హెడ్‌ల్యాంప్‌లు ఉన్నాయి. ఇది ఫ్లాట్ ఫ్లోర్‌బోర్డ్, సింగిల్​ పీస్​ సీటు, సన్నని రేర్​ గ్రాబ్ రైల్‌ను సైతం కలిగి ఉంది. ఇది నిత్యం ఉపయోగించే సౌలభ్యాన్ని అందిస్తూనే, స్కూటర్‌కు స్పోర్టీ లుక్‌ను ఇస్తుంది.

మొదట ఐయాన్​ ఎం1 ఎస్​గా పేరొందిన ఈ మ్యాక్సీ ఎలక్ట్రిక్​ స్కూటర్‌లో 7-ఇంచ్​ టీఎఫ్​టీ స్క్రీన్ ఉండనుంది. ఇది కాల్, ఎస్​ఎంఎస్​ అలర్ట్‌లు, నావిగేషన్, ఇతర కనెక్టివిటీ ఆప్షన్‌లతో పాటు అనేక ఫంక్షన్‌లకు సపోర్ట్ చేస్తుంది. ప్రస్తుత సెగ్మెంట్ ట్రెండ్‌లకు అనుగుణంగా ఇందులో స్మార్ట్ కీ సిస్టమ్ కూడా ఉండే అవకాశం ఉంది.

టీవీఎస్ ఎం1 ఎస్ ఎలక్ట్రిక్​ స్కూటర్​: పనితీరు, రేంజ్ వివరాలు..

టీవీఎస్ ఎం1 ఎస్ ఎలక్ట్రిక్ స్కూటర్ 4.3 కేడబ్ల్యూహెచ్​ బ్యాటరీ ప్యాక్‌తో పనిచేస్తుంది. ఈ బ్యాటరీ ద్వారా గరిష్టంగా 16.76 హెచ్​పీ పవర్​ని, 45 ఎన్​ఎం టార్క్‌ను ఉత్పత్తి చేయగలదు. ఈ ఎలక్ట్రిక్ మ్యాక్సీ స్కూటర్ గంటకు 105 కిమీ. గరిష్ట వేగాన్ని కలిగి ఉంది. ఇది కేవలం 3.7 సెకన్లలో 0 నుంచి 50 కేఎంపీహెచ్​ వేగాన్ని అందుకోగలదు. ఈ ఈ-స్కూటర్​ని ఒక్కసారి పూర్తి ఛార్జ్ చేస్తే 150 కిలోమీటర్ల రేంజ్​ ఇస్తుందని కంపెనీ ప్రకటించింది.

ఈ మ్యాక్సీ స్కూటర్‌ భారతదేశంలో ఎప్పుడు లాంచ్​ అవుతుంది?అనే విషయంపై టీవీఎస్ ఇంకా స్పష్టమైన ప్రణాళికను వెల్లడించలేదు. అయితే టీవీఎస్ తన స్వదేశీ మార్కెట్‌పై ప్రత్యేక దృష్టిని ఉంచుతుంది కాబట్టి, యూరోప్‌లో ఆవిష్కరించిన తర్వాత ఈ టీవీఎస్ ఎం1 ఎస్ ఎలక్ట్రిక్ మ్యాక్సీ స్కూటర్‌ను త్వరలోనే భారతదేశానికి తీసుకువచ్చే అవకాశం ఉందని మార్కెట్ వర్గాలు అంచనా వేస్తున్నాయి.

ఇండియాలో లాంచ్​ అయిన తర్వాత దీని ధర, ఫీచర్స్​ సహా పూర్తి వివరాలు అందుబాటులోకి వస్తాయి.