యూఎస్ వీసా బాండ్ నిబంధన: భారత్‌పై ప్రభావం ఉందా? 50 దేశాల జాబితా ఇదే

అమెరికా బీ1/బీ2 వీసాల జారీ ప్రక్రియలో కొత్త మార్పులు తీసుకొచ్చింది. నిర్దేశిత 50 దేశాల పౌరులు 10,000 డాలర్ల నుంచి 20,000 డాలర్ల వరకు రిఫండబుల్ వీసా బాండ్ డిపాజిట్ చేయాలని ఆదేశించింది. ఈ జాబితాలో భారతదేశం ఉందో లేదో తెలుసుకోండి.

అమెరికా పర్యటనకు వెళ్లాలనుకునే వ్యాపార, పర్యాటక ప్రయాణికులకు సంబంధించి యూఎస్ ప్రభుత్వం వీసా నిబంధనల్లో కీలక మార్పులు చేసింది. ఎంపిక చేసిన 50 దేశాల పౌరులకు బీ1/బీ2 వీసాలు జారీ చేయాలంటే 10,000 డాలర్ల నుంచి 20,000 డాలర్ల వరకు (సుమారు రూ. 8.4 లక్షల నుంచి రూ. 16.8 లక్షలు) గ్యారంటీ డిపాజిట్ (వీసా బాండ్) చెల్లించడం తప్పనిసరి చేసింది.

యూఎస్ వీసా బాండ్ నిబంధన

ఈ నిబంధనలకు సంబంధించిన సమగ్ర జాబితాను యూఎస్ విదేశాంగ శాఖ 2026 అక్టోబర్ 2న అధికారికంగా ఖరారు చేసింది. ఇమ్మిగ్రేషన్ అండ్ నేషనాలిటీ యాక్ట్ సెక్షన్ 221(జి)(3) ప్రకారం రూపకల్పన చేసిన ఈ నియమావళి, 2026 ఆగస్టు 3 నుంచి అమలులోకి వచ్చిన తుది నిబంధనల ఆధారంగా శాశ్వత ప్రాతిపదికన కొనసాగుతోంది.

యూఎస్ వీసా బాండ్ అంటే ఏమిటి?

యూఎస్ వీసా బాండ్ అనేది నిర్దేశిత దేశాల దరఖాస్తుదారులు బీ1/బీ2 (వ్యాపార, పర్యాటక ప్రయాణాలు) వీసా అర్హత పొందడానికి చెల్లించాల్సిన తాత్కాలిక భద్రతా డిపాజిట్. జాబితాలో ఉన్న దేశాల పౌరులు వీసా అర్హతలు సాధించిన తర్వాత, యూఎస్ కాన్సులర్ అధికారి ఇంటర్వ్యూ సమయంలో 10,000 డాలర్ల నుంచి 20,000 డాలర్ల మధ్య బాండ్ మొత్తాన్ని నిర్ణయిస్తారు.

ఈ బాండ్ సాధారణ వీసా దరఖాస్తు రుసుము కంటే భిన్నమైనది. ప్రయాణికుడు అనుమతించిన వ్యవధి ముగిసేలోపు అమెరికా నుంచి తిరిగి స్వదేశానికి చేరుకోవడం వంటి అన్ని షరతులను నెరవేరిస్తే ఈ సొమ్మును తిరిగి ఇచ్చేస్తారు. అయితే, కేవలం బాండ్ చెల్లించినంత మాత్రాన వీసా ఆమోదం లభిస్తుందనే గ్యారంటీ ఉండదు. కాన్సులర్ అధికారి నుంచి స్పష్టమైన ఆదేశాలు వచ్చేవరకు దరఖాస్తుదారులు ఎలాంటి డబ్బు చెల్లించవద్దని విదేశాంగ శాఖ సూచించింది. బాండ్ చెల్లించాల్సిన వారు డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ ఫారమ్ I-352 నింపి, Pay.gov పోర్టల్ ద్వారా రుసుము చెల్లించాల్సి ఉంటుంది.

ఈ నిర్ణయానికి ప్రధాన కారణం ఏంటి?

వీసా గడువు ముగిసినప్పటికీ చాలామంది విదేశీయులు అమెరికాలోనే అక్రమంగా ఉండిపోతుండటాన్ని (ఓవర్‌స్టే) అరికట్టేందుకు యూఎస్ ఈ నిర్ణయం తీసుకుంది. హోమ్‌ల్యాండ్ సెక్యూరిటీ నివేదికలోని ఆధారాల ప్రకారం, బీ1/బీ2 వీసాదారుల్లో ఓవర్‌‌స్టే రేటు ఎక్కువగా ఉన్న దేశాలపైనే ఈ నిబంధన విధించారు. తాత్కాలిక పర్యటనపై వచ్చే విదేశీయులు నిబంధనలు పాటించి, నిర్ణీత సమయంలోగా తమ దేశాలకు తిరుగుపయనం అయ్యేలా చూడటమే ఈ చర్య ముఖ్య ఉద్దేశం.

బాండ్ పొందిన ప్రయాణికులు రాకపోకల కోసం ప్రత్యేక నిబంధనలు పాటించాలి. వారు తప్పనిసరిగా సీబీపీ (CBP) ప్రీ-క్లియరెన్స్ సదుపాయం ఉన్న ఆమోదిత వాణిజ్య విమానాశ్రయాల ద్వారానే ప్రయాణించాలి. నేలమార్గం, సముద్రరేవులు, చార్టర్డ్ విమానాలు లేదా జనరల్ ఏవియేషన్ సేవల ద్వారా సరిహద్దులు దాటడానికి అనుమతి ఉండదు.

వీసా బాండ్ జాబితాలో భారత్ ఉందా?

భారతదేశ పౌరులకు ఇది ఊరటనిచ్చే అంశం. యూఎస్ విదేశాంగ శాఖ విడుదల చేసిన 50 దేశాల జాబితాలో భారతదేశం పేరు లేదు. కాబట్టి భారత పాస్‌పోర్ట్ కలిగిన ప్రయాణికులు అమెరికా బీ1/బీ2 వీసా కోసం ఎలాంటి వీసా బాండ్ డిపాజిట్ చేయాల్సిన అవసరం లేదు.

వీసా బాండ్ పరిధిలోకి వచ్చే 50 దేశాల జాబితా

ఆఫ్రికా, ఆసియా, కరేబియన్, పసిఫిక్ ప్రాంతాలకు చెందిన 50 దేశాలను ఈ జాబితాలో చేర్చారు.

దక్షిణాసియా: బంగ్లాదేశ్, భూటాన్, నేపాల్.

ఆసియా / మధ్య ఆసియా: కంబోడియా, జార్జియా, కిర్గిజ్ రిపబ్లిక్, మంగోలియా, తజికిస్తాన్, తుర్క్మెనిస్తాన్.

ఆఫ్రికా: అల్జీరియా, అంగోలా, బెనిన్, బోట్స్వానా, బురుండి, సెంట్రల్ ఆఫ్రికన్ రిపబ్లిక్, కోట్ డి ఐవోయిర్, జిబౌటీ, ఇథియోపియా, గాబన్, గాంబియా, గినియా, గినియా-బిస్సావు, లెసోథో, మలావి, మౌరిటానియా, మారిషస్, మొజాంబిక్, నమీబియా, నైజీరియా, సావో తోమ్ అండ్ ప్రిన్సిపే, సెనెగల్, సీషెల్స్, టాంజానియా, టోగో, ఉగాండా, జాంబియా, జింబాబ్వే.

కరేబియన్ / అమెరికాస్: ఆంటిగ్వా అండ్ బార్బుడా, క్యూబా, డొమినికా, గ్రెనడా, నికరాగువా, వెనిజులా.

పసిఫిక్ ప్రాంతం: ఫిజీ, పాపువా న్యూ గినియా, టోంగా, తువాలు, వనౌతు.