తెలుగు రాష్ట్రాల్లోని ప్రసిద్ధ పుణ్యక్షేత్రాలను, ఉభయ గోదావరి జిల్లాల సౌందర్యాన్ని తక్కువ సమయంలో, సౌకర్యవంతంగా దర్శించుకోవాలనుకునే ఆధ్యాత్మిక భక్తుల కోసం…. IRCTC అద్భుతమైన టూర్ ప్యాకేజీని అందుబాటులోకి తెచ్చింది. 'గోదావరి టెంపుల్ టూర్' (Godavari Temple Tour) పేరుతో రూపొందించిన ఈ ప్రత్యేక ప్యాకేజీ ద్వారా గోదావరి తీరంలో వెలసిన అత్యంత మహిమాన్వితమైన దేవాలయాలను, కోనసీమ ప్రకృతి అందాలను సందర్శించవచ్చు.
3 రాత్రులు, 4 రోజుల వ్యవధితో సాగే ఈ ఆధ్యాత్మిక యాత్ర ప్రతి శుక్రవారం హైదరాబాద్ నుంచి ప్రారంభమవుతుంది. ప్రస్తుతం ఈ ప్యాకేజీ అక్టోబర్ 29వ తేదీన అందుబాటులో ఉంది. ఈ తేదీ మిస్ అయితే మరో తేదీలో ప్లాన్ చేసుకోవచ్చు.
శుక్రవారం రాత్రి 08:30 గంటలకు లింగంపల్లి రైల్వే స్టేషన్ నుంచి, అలాగే రాత్రి 09:15 గంటలకు సికింద్రాబాద్ రైల్వే స్టేషన్ నుంచి బయలుదేరే గౌతమి ఎక్స్‌ప్రెస్ (రైలు నంబర్: 12738) ద్వారా యాత్ర ప్రారంభమవుతుంది. రాత్రి అంతా రైలులోనే ప్రయాణం ఉంటుంది.
శనివారం ఉదయం 04:38 గంటలకు ప్రయాణికులు రాజమండ్రి రైల్వే స్టేషన్‌కు చేరుకుంటారు. అక్కడ నుంచి హోటల్‌కు వెళ్లి ప్రెష్‌అప్ అవుతారు. అనంతరం రాజమండ్రి నుంచి సుమారు 80 కిలోమీటర్ల దూరంలో ఉన్న ప్రసిద్ధ పుణ్యక్షేత్రం అన్నవరం బయలుదేరుతారు. రత్నగిరిపై వెలసిన శ్రీ వీర వేంకట సత్యనారాయణ స్వామివారిని దర్శించుకుని పూజలు నిర్వహిస్తారు. సాయంత్రం తిరిగి రాజమండ్రికి చేరుకుంటారు. అక్కడ పవిత్ర గోదావరి ఘాట్, సుందరమైన ఇస్కాన్ (ISKCON) ఆలయాన్ని సందర్శిస్తారు. రాత్రికి రాజమండ్రిలోని హోటల్‌లోనే బస చేస్తారు. మూడో రోజు ఉదయాన్నే హోటల్ నుంచి చెక్-అవుట్ చేసి అంతర్వేదికి బయలుదేరుతారు. అక్కడ ప్రసిద్ధ శ్రీ లక్ష్మీనరసింహస్వామి ఆలయాన్ని దర్శించుకోవడంతో పాటు సముద్ర తీరాన్ని (బీచ్) సందర్శిస్తారు. అనంతరం అప్పనపల్లిలోని శ్రీ బాల బాలాజీ ఆలయం, ఐనవిల్లిలోని శ్రీ విఘ్నేశ్వర స్వామి ఆలయం మరియు ప్రముఖ ద్వాదశ జ్యోతిర్లింగాల్లో ఒకటిగా భావించే ద్రాక్షారామం భీమేశ్వరస్వామి ఆలయాలను దర్శించుకుంటారు.
క్షేత్ర దర్శనాలన్నీ పూర్తయిన తర్వాత సాయంత్రం రాజమండ్రి రైల్వే స్టేషన్‌కు చేరుకుంటారు. రాత్రి 08:18 గంటలకు బయలుదేరే గౌతమి ఎక్స్‌ప్రెస్ (రైలు నంబర్: 12737) ఎక్కి హైదరాబాద్‌కు తిరుగుప్రయాణం అవుతారు. రాత్రి అంతా ప్రయాణంలో ఉంటారు.
సోమవారం ఉదయం గౌతమి ఎక్స్‌ప్రెస్ సికింద్రాబాద్ మరియు లింగంపల్లి స్టేషన్లకు చేరుకోవడంతో ఈ ఆధ్యాత్మిక యాత్ర పూర్తవుతుంది.
ఈ ప్యాకేజీ బుకింగ్స్ మరియు ఇతర వివరాల కోసం ఐఆర్‌సీటీసీ అధికారిక వెబ్‌సైట్‌ ( https://www.irctctourism.com/ ) ను సందర్శించవచ్చు లేదా ఈ క్రింది ఫోన్ నంబర్లలో నేరుగా సంప్రదించవచ్చు: 8287932229 / 8287932228 / 9701360701.