సెప్టెంబర్ 8 భౌమ ప్రదోషం.. మూడు శుభయోగాల కలయిక, ఈ పూజ చేస్తే శివుడి అనుగ్రహం!

సెప్టెంబర్ 8, 2026న మంగళవారం వచ్చే భౌమ ప్రదోష వ్రతం శివభక్తులకు ఎంతో విశేషమైనదిగా భావిస్తారు. ఈ రోజున ప్రదోష కాలంలో పరమశివుడిని పూజించడం వల్ల పాపాలు తొలగి, ధైర్యసాహసాలు పెరగడంతో పాటు రుణ, అప్పుల బాధల నుంచి ఉపశమనం లభిస్తుందని భక్తుల విశ్వాసం.

హిందూ సనాతన ధర్మంలో ప్రదోష వ్రతానికి అత్యంత విశిష్టమైన స్థానం ఉంది. ముఖ్యంగా మంగళవారం రోజున వచ్చే ప్రదోష వ్రతాన్ని 'భౌమ ప్రదోష వ్రతం' అని పిలుస్తారు. ఈ పవిత్రమైన రోజున జగత్ప్రభువు ఆ పరమశివుడిని ప్రదోష కాలంలో ఆరాధించడం ద్వారా సకల పాపాలు తొలగిపోతాయని భక్తుల ప్రగాఢ విశ్వాసం. ఈసారి సెప్టెంబర్ 8న రానున్న భౌమ ప్రదోషం ఎన్నో అరుదైన యోగాల కలయికతో ఎంతో ప్రత్యేకం కానుంది.

సెప్టెంబర్ 8 భౌమ ప్రదోషం.. మూడు శుభయోగాల కలయిక, ఈ పూజ చేస్తే శివుడి అనుగ్రహం!

భౌమ ప్రదోషం ముహూర్తం మరియు తిథి వివరాలు

పంచాంగం ప్రకారం, శ్రావణ కృష్ణ పక్ష త్రయోదశి తిథి సెప్టెంబర్ 8 మధ్యాహ్నం 2:42 గంటలకు ప్రారంభమై, సెప్టెంబర్ 9 మధ్యాహ్నం 12:30 గంటలకు ముగుస్తుంది. సూర్యాస్తమయ సమయానికి ప్రదోష కాలం వర్తించనుండటంతో సెప్టెంబర్ 8, 2026 (మంగళవారం) నాడే ఈ వ్రతాన్ని ఆచరించనున్నారు. మంగళవారం కుజ గ్రహానికి సంబంధించిన రోజు కావడంతో, ఈ ప్రదోష వ్రతం ఆచరించడం వల్ల ధైర్యసాహసాలు ఇనుమడించడంతో పాటు రుణాలు, అప్పుల బాధల నుంచి ఉపశమనం లభిస్తుందని జ్యోతిష్య నిపుణులు స్పష్టం చేస్తున్నారు.

పూజకు లభించే అద్భుతమైన సమయం

శివారాధనకు అత్యంత ప్రీతిపాత్రమైన ప్రదోష కాలంలో భక్తులకు సుమారు రెండు గంటల పద్దెనిమిది నిమిషాల పాటు అత్యంత శుభప్రదమైన సమయం దక్కుతుంది.

పూజా సమయం: సెప్టెంబర్ 8న సాయంత్రం 6:35 గంటల నుంచి రాత్రి 8:52 గంటల వరకు.

ఈ నిర్ణీత సమయంలో భక్తులు భక్తిశ్రద్ధలతో శివలింగానికి జలాభిషేకం, క్షీరాభిషేకం చేసి బిల్వపత్రాలు, పూలతో పూజించాలి. అలాగే ఈ రోజు బ్రహ్మ ముహూర్తం ఉదయం 4:31 నుండి 5:17 గంటల వరకు, అభిజిత్ ముహూర్తం ఉదయం 11:54 నుండి మధ్యాహ్నం 12:44 గంటల వరకు ఉంటుంది.

మూడు విశేష యోగాల కలయిక

ఈసారి ప్రదోష వ్రతం రోజు ఏకంగా మూడు అద్భుతమైన యోగాలు ఏర్పడుతున్నాయి. మొదటిది సర్వార్థ సిద్ధి యోగం, రెండవది పరిఘ యోగం, మూడవది శివ యోగం. పరిఘ యోగం ఉదయం నుండి రాత్రి 12:40 గంటల వరకు కొనసాగుతుంది. ఆ తర్వాత శివ యోగం ప్రారంభమవుతుంది. ఇక సర్వార్థ సిద్ధి యోగం సెప్టెంబర్ 8 సాయంత్రం 4:39 నుండి సెప్టెంబర్ 9 ఉదయం 6:03 గంటల వరకు ఉంటుంది. ఈ యోగాల కారణంగా ఈరోజు చేసే ఏ పూజ లేదా శుభకార్యమైనా వంద రెట్లు అధిక ఫలితాన్ని ఇస్తుందని నమ్ముతారు.

శివారాధన చేసే సరైన పద్ధతి

ప్రదోష రోజున సూర్యాస్తమయానికి ముందే తలస్నానం చేసి శుభ్రమైన వస్త్రాలు ధరించాలి. ఆ తర్వాత శివాలసయానికి వెళ్లి లేదా ఇంట్లోనే ఈశాన్య మూలన శివలింగానికి జలాభిషేకం చేయాలి.

ఆ పై పాలు, బిల్వపత్రాలు, ధతూరా, తెల్లని పూలు, అక్షతలు సమర్పించాలి.

ఆవు నెయ్యితో దీపం వెలిగించి 'ఓం నమః శివాయ' అనే పంచాక్షరి మంత్రాన్ని మనసారా జపించాలి.

తెల్లని మిఠాయిలను లేదా పండ్లను నైవేద్యంగా సమర్పించి, కుటుంబ సమేతంగా ప్రశాంత వాతావరణంలో పూజను ముగించాలి. ఈ రోజు కోపానికి దూరంగా ఉంటూ, సాత్విక ఆహారాన్ని మాత్రమే తీసుకోవడం శ్రేయస్కరం.