ఈరోజే కోటి సోమవారం.. శుభ ముహుర్తం, పూజా విధానం, విశిష్టతతో పాటు కోటి యాగాల ఫలితం కోసం ఏం చెయ్యాలో తెలుసుకోండి!

కార్తీకమాసంలో కోటి సోమవారం మరింత విశిష్టమైనది. కోటి సోమవారం నాడు ఆచరించే స్నానం, దానం, ఉపవాసానికి ఎన్నో కోటి రెట్ల ఎక్కువ ఫలితాన్ని పొందడానికి వీలవుతుంది. కోటి సోమవారం శుభ ముహుర్తం, పూజా విధానం, విశిష్టతతో పాటు కోటి యాగాల ఫలితం కోసం ఏం చెయ్యాలో తెలుసుకోండి.

కార్తీక మాసంలో పరమశివుడుని భక్తి శ్రద్ధలతో ఆరాధిస్తారు. కార్తీక మాసంలో సోమవారం రోజున శివుడిని ఆరాధించడం వలన విశేష ఫలితాన్ని పొందవచ్చు. కార్తీకమాసంలో కోటి సోమవారం మరింత విశిష్టమైనది. కోటి సోమవారం నాడు ఆచరించే స్నానం, దానం, ఉపవాసానికి ఎన్నో కోటి రెట్ల ఎక్కువ ఫలితాన్ని పొందడానికి వీలవుతుంది.

ఈరోజే కోటి సోమవారం (pinterest)

ఈ సంవత్సరం కోటి సోమవారం అక్టోబర్ 30న వచ్చింది. అక్టోబర్ 29 సాయంత్రం 5:29కి శ్రవణ నక్షత్రం మొదలై, అక్టోబర్ 30 సాయంత్రం 6:30 వరకు కొనసాగుతుంది. ఈ లెక్కన అక్టోబర్ 30న కోటి సోమవారాన్ని జరుపుకోబోతున్నారు.

కోటి సోమవారానికి ఉన్న విశిష్టత మీకు తెలుసా?

వ్యాస మహర్షి రాసిన స్కంద పురాణం ప్రకారం చూసినట్లయితే, కార్తీక మాసంలో శ్రవణ నక్షత్రం నాడు కోటి సోమవారం అని పిలుస్తారు. శివ కేశవులకు కార్తీకమాసం అంటే ఎంతో ఇష్టం. అందులో కోటి సోమవారం చాలా ప్రత్యేకమైనది, శివకేశవులకు ఎంతో ఇష్టమైన రోజు.

కోటి సోమవారం నాడు ఉదయాన్నే నిద్రలేచి నది స్నానం చేస్తే విశేష ఫలితాన్ని పొందవచ్చు. కార్తీక మాసంలో మహావిష్ణువు చెరువులు, నదులు, కాలువల్లో నివసిస్తాడని అంటారు. అందుకని కార్తీక మాసంలో నది స్నానం చేస్తే ఎక్కువ పుణ్యం వస్తుంది.

కోటి సోమవారం నాడు ఏం చెయ్యాలి?

1. కోటి సోమవారం నాడు శివాలయానికి వెళ్లి భక్తి శ్రద్ధలతో పంచామృతంతో శివుడికి అభిషేకం చేస్తే చాలా ఎక్కువ ఫలితం ఉంటుంది.
2. అలాగే మట్టి ప్రమిదలో నువ్వుల నూనె పోసి దీపారాధన చేస్తే శివకేశవుల అనుగ్రహం పొందవచ్చు.
3. శివుడికి ఎంతో ఇష్టమైన బిల్వపత్రాలను సమర్పించండి. తుమ్మి పూలను కూడా శివుడికి అర్పిస్తే మంచిది.
4. కొబ్బరికాయ, అరటి పండ్లను నైవేద్యంగా సమర్పించండి.
5. సాయంత్రం స్నానం చేసి మహావిష్ణువు ఆలయంలో ఆవు నెయ్యితో దీపారాధన చేయండి.
6. శ్రీహరికి తులసి మాలను సమర్పించండి.
7. విష్ణు సహస్రనామ పారాయణం చేస్తే ఎంతో మంచి జరుగుతుంది.

ఉపవాసం చాలా మంచిది

కోటి సోమవారం నాడు ఉపవాసం ఉంటే ఎంతో మంచి ఫలితం లభిస్తుంది. ఉదయం నుంచి సాయంత్రం దాకా ఎలాంటి ఆహారం తీసుకోకుండా ఉపవాసం చేస్తే చాలా మంచి ఫలితాన్ని పొందవచ్చు. రాత్రి నక్షత్రం దర్శనం చేసుకున్నాక భోజనం చేయాలి.

కోటి యాగాల ఫలితం లభిస్తుంది.

కోటి సోమవారం రోజు ఏదైనా వ్రతాన్ని ఆచరిస్తే ఆ వ్రత ఫలం అనంతమని చెప్తారు. ఆ రోజు వెంకటేశ్వర స్వామి వ్రతకల్పం, సత్యనారాయణ స్వామి వ్రతం వంటివి చేస్తే ఎంతో మంచి ఫలితం ఉంటుంది. కోటి సోమవారం నాడు కన్యాదానం చేయడం అశ్వమేధ యాగానికి సమానమైన ఫలితాన్ని ఇస్తుందని స్కంద పురాణంలో చెప్పబడింది.