సిద్ధిపేట జిల్లాలో బాలికపై దారుణం - పోక్సో కేసులో ముగ్గురు మైనర్లు సహా ఏడుగురి అరెస్ట్

సిద్ధిపేట జిల్లా మద్దూరు పోలీస్ స్టేషన్ పరిధిలో బాలికపై లైంగిక దాడికి పాల్పడిన ఏడుగురిని పోలీసులు అరెస్ట్ చేశారు. ఇందులో ముగ్గురు మైనర్లు ఉన్నారు.

తెలంగాణలోని సిద్ధిపేట జిల్లాలో దారుణ సంఘటన వెలుగు చూసింది. మైనర్ బాలికపై లైంగిక దాడికి పాల్పడిన కేసులో ముగ్గురు మైనర్లు సహా మొత్తం ఏడుగురు నిందితులను పోలీసులు అరెస్ట్ చేశారు. ఈ ఘటన స్థానికంగా తీవ్ర కలకలం రేపింది.

పోక్సో కేసులో ముగ్గురు మైనర్లు సహా ఏడుగురి అరెస్ట్ (Pixel image)

సిద్ధిపేట పోలీసు కమిషనరేట్ పరిధిలోని మద్దూరు పోలీస్ స్టేషన్ సరిహద్దుల్లో ఈ ఘటనపై పోక్సో (POCSO) చట్టం కింద కేసు నమోదైంది. సమాచారం అందుకున్న మద్దూరు పోలీసులు…. నిందితులందరినీ అదుపులోకి తీసుకున్నారు.

ఏం జరిగిందంటే..?

దసరా పండుగ రోజున బాలిక తల్లిదండ్రులు పొలం పనులకు వెళ్లారు. ఇంట్లో ఒంటరిగా ఉన్న బాలికను గమనించిన నిందితులు…. ఆమెను కిడ్నాప్ చేసి సమీపంలోని మరో గ్రామానికి తీసుకెళ్లారు. అక్కడ ఆమెపై సామూహిక అత్యాచారానికి ఒడిగట్టారు. మరుసటి రోజు(అక్టోబర్ 21) ఉదయం బాధితురాలిని ఆమె గ్రామ సమీపంలో వదిలిపెట్టి వెళ్లిపోయారు. ఇంటికి చేరుకున్న బాలిక జరిగిన దారుణాన్ని తల్లిదండ్రులకు వివరించడంతో…. వారు వెంటనే పోలీసులకు ఫిర్యాదు చేశారు.

అయితే గతంలోనూ సదరు బాలికను వేధించినట్లు సమాచారం. బాలికకు సంబంధించిన ఫొటోలు, వీడియో లు తీసి నిందితులు ఈ అఘాయిత్యాలకు ఒడి గట్టుతున్నట్లు తెలిసింది…! ఈ క్రమంలోనే ఈ దారుణం గురించి… ఇంటి పెద్దలకు తెలియటంతో పోలీసులను ఆశ్రయించారు. రంగంలోకి దిగిన పోలీసులు… అన్ని కోణాల్లో దర్యాప్తు చేస్తున్నారు. ఈ కేసులోని నిందితులందర్నీ అరెస్ట్ చేశారు.

అనంతరం వారిని న్యాయమూర్తి ముందు హాజరుపరిచి రిమాండ్‌కు తరలించారు. అరెస్టు చేసిన నిందితులకు వెంటనే ర్యాపిడ్ డ్రగ్ టెస్టులు నిర్వహించినట్లు పోలీసులు తెలిపారు. ఈ పరీక్షల్లో నిందితులందరికీ డ్రగ్స్ నెగెటివ్ అని నివేదిక వచ్చిందని స్పష్టం చేశారు.