హైదరాబాద్ యూనివర్సిటీలో యూజీ, ఇంటిగ్రేటెడ్ పీజీ కోర్సులకు ప్రవేశాలు

హైదరాబాద్ యూనివర్సిటీలో యూజీ, ఇంటిగ్రేటెడ్ పీజీ కోర్సులకు ప్రవేశాలకు నోటిఫికేషన్ విడుదలైంది. అర్హులైన, ఆసక్తిగల అభ్యర్థులు దరఖాస్తు చేసుకోవాలి.

హైదరాబాద్ విశ్వవిద్యాలయం 2026-27 విద్యా సంవత్సరానికి గాను అండర్ గ్రాడ్యుయేట్, ఇంటిగ్రేటెడ్ పోస్ట్ గ్రాడ్యుయేట్ ప్రోగ్రామ్‌లలో ప్రవేశాల కోసం ఆన్‌లైన్ దరఖాస్తులను ఆహ్వానించింది. 470 సీట్లు గల 17 ప్రోగ్రామ్‌లలో ప్రవేశాలు CUET (UG) 2026 స్కోర్‌ల ఆధారంగా ఉంటాయి. దరఖాస్తుల స్వీకరణకు చివరి తేదీ జూలై 21గా నిర్ణయించారు. హైదరాబాద్ విశ్వవిద్యాలయంలో అండర్ గ్రాడ్యుయేట్, ఇంటిగ్రేటెడ్ పోస్ట్ గ్రాడ్యుయేట్ (పీజీ) కోర్సుల్లో చేరాలనుకునేవారికి ఇది మంచి అవకాశం.

హైదరాబాద్ యూనివర్సిటీలో అడ్మిషన్స్

ఆసక్తిగల విద్యార్థులు తమ CUET (UG) 2026 స్కోర్‌ల ఆధారంగా 17 ప్రత్యేక ప్రోగ్రామ్‌లలో ప్రవేశానికి దరఖాస్తు చేసుకోవచ్చని యూనివర్సిటీ పేర్కొంది. ఆన్‌లైన్ దరఖాస్తు పోర్టల్ అధికారికంగా జూలై 7న ప్రారంభమైంది. దరఖాస్తులను సమర్పించడానికి చివరి తేదీ జూలై 21గా నిర్ణయించారనే విషయాన్ని అభ్యర్థులు గుర్తుంచుకోవాలి.

ఈ విశ్వవిద్యాలయం వివిధ విభాగాలలో మొత్తం 470 సీట్లను అందిస్తుంది. ప్రభుత్వ రిజర్వేషన్ విధానాల ప్రకారం(ఎస్సీ, ఎస్టీ, ఓబీసీ, ఈడబ్ల్యూఎస్, పీడబ్ల్యూడీ వర్గాలకు కేటాయింపులతో సహా) అడ్మిషన్స్ ఉంటాయి.

ప్రవేశాల్లో 4 సంవత్సరాల బీఎస్ (ఆనర్స్/రీసెర్చ్), కెమిస్ట్రీ, 5 సంవత్సరాల ఇంటిగ్రేటెడ్ ఎంఎస్సి ప్రోగ్రామ్‌లు: గణిత శాస్త్రం, ఫిజిక్స్, కెమిస్ట్రీ, బయాలజీ, అప్లైడ్ జియాలజీ మరియు సైకాలజీ, 5 సంవత్సరాల ఇంటిగ్రేటెడ్ ఎంఏ ప్రోగ్రామ్‌లు: ఫిలాసఫీ, హిందీ, తెలుగు, ఉర్దూ, భాషా శాస్త్రాలు, ఎకనామిక్స్, హిస్టరీ, పొలిటికల్ సైన్స్, సోషియాలజీ, ఆంత్రోపాలజీ ఉన్నాయి.

అప్లికేషన్ పీజు జనరల్ అభ్యర్థులకు రూ.300, ఈడబ్ల్యూఎస్: రూ. 200, ఓబీసీ-ఎన్‌సీఎల్ అభ్యర్థులకు రూ. 200, ఎస్సీ/ఎస్టీ/పీడబ్ల్యూడీ(పీహెచ్): రూ. 125గా ఉంది.

ప్రతి ప్రోగ్రామ్‌కు విడివిడిగా మెరిట్ జాబితా రూపొందిస్తారు. దరఖాస్తు రుసుము విజయవంతంగా చెల్లించిన తర్వాత, ఒక 'ఫారం నంబర్' (ఉదా: UOHUG99999999) జెనరేట్ అవుతుంది. దరఖాస్తు ఫారం ప్రింటవుట్ తీసుకుని, భవిష్యత్తు అవసరాల కోసం దానిని భద్రంగా ఉంచుకోండి. ఫారం నంబర్ లేని పక్షంలో దరఖాస్తు పరిగణనలోకి తీసుకోరు.

అర్హులైన అభ్యర్థులు తమ దరఖాస్తులను విశ్వవిద్యాలయం అధికారిక అకడమిక్ పోర్టల్ అయిన http://acad.uohyd.ac.in ద్వారా మాత్రమే ఆన్‌లైన్‌లో పూర్తి చేసి సమర్పించాలి.