వీసీపై లైంగిక వేధింపుల ఆరోపణలు.. తెలంగాణ మహిళా కమిషన్ నోటీసులు!

హైదరాబాద్ రాజేంద్రనగర్ అగ్రికల్చర్ యూనివర్సిటీ వైస్ ఛాన్సలర్‌ అల్డాస్ జానయ్యపై లైంగిక వేధింపుల ఆరోపణలు వచ్చాయి. ఆయన విచారణకు రావాలని మహిళా కమిషన్ నోటీసులు ఇచ్చింది.

హైదరాబాద్ రాజేంద్రనగర్‌లోని ఆచార్య జయశంకర్ తెలంగాణ వ్యవసాయ విశ్వవిద్యాలయం (PJTAU)లో తీవ్ర కలకలం రేగింది. యూనివర్సిటీ వైస్ ఛాన్సలర్ ప్రొఫెసర్ అల్డాస్ జానయ్యపై ఒక మహిళా అసిస్టెంట్ ప్రొఫెసర్ తీవ్రస్థాయిలో లైంగిక వేధింపుల ఆరోపణలు చేశారు.

వీసీకి నోటీసులు

పీజేటీఏయూలో అసిస్టెంట్ ప్రొఫెసర్‌గా బాధ్యతలు నిర్వర్తిస్తున్న ముసిని తేజశ్రీ ఆరోపణలు చేశారు. వైస్ ఛాన్సలర్ అల్డాస్ జానయ్య తనను లైంగికంగా వేధించడంతో పాటు భయభ్రాంతులకు గురిచేస్తున్నారని తెలంగాణ రాష్ట్ర మహిళా కమిషన్‌ను ఆశ్రయించారు. ఈ మేరకు నవంబర్ 7న ఆమె మహిళా కమిషన్‌కు అధికారికంగా పిటిషన్ సమర్పించారు.

ఈ ఘటనను తీవ్రంగా పరిగణించిన మహిళా కమిషన్, విచారణ నిమిత్తం వర్సిటీ వీసీకి నోటీసులు జారీ చేసింది. నవంబర్ 12న విచారణకు హాజరు కావాలని ఆదేశించింది. మహిళా అసిస్టెంట్ ప్రొఫెసర్ ఇచ్చిన ఫిర్యాదు ఆధారంగా స్పందించిన రాష్ట్ర మహిళా కమిషన్ కార్యదర్శి, వీసీ అల్డాస్ జానయ్యకు సమన్లు పంపించింది.

నవంబర్ 12న హైదరాబాద్‌లోని మహిళా కమిషన్ ముందు వీసీ స్వయంగా విచారణకు హాజరు కావాలని నోటీసుల్లో స్పష్టం చేశారు. ఎలాంటి మినహాయింపు లేకుండా విచారణకు విధిగా హాజరుకావాలని కమిషన్ ఆదేశించింది. ఈ విచారణకు సంబంధించిన నోటీసు ప్రతిని ఫిర్యాదు చేసిన అసిస్టెంట్ ప్రొఫెసర్ ముసిని తేజశ్రీకి కూడా పంపి, విచారణ తేదీ వివరాలను తెలియజేశారు.

నవంబర్ 12న జరగబోయే విచారణలో ఫిర్యాదుదారు చేసిన ఆరోపణలపై వీసీ అల్డాస్ జానయ్య ఇచ్చే వివరణను మహిళా కమిషన్ రికార్డు చేయనుంది. ఇరు వర్గాల వాదనలు, ప్రాథమిక ఆధారాలను పరిశీలించిన అనంతరం తదుపరి చట్టపరమైన లేదా పరిపాలనాపరమైన చర్యలపై మహిళా కమిషన్ తుది నిర్ణయం తీసుకోనుంది. విద్యాసంస్థల్లో ఉన్నత స్థానంలో ఉన్న అధికారిపైనే ఈ తరహా లైంగిక వేధింపుల ఆరోపణలు రావడంతో ఈ అంశం చర్చనీయాంశంగా మారింది.