Yadagirigutta Temple Mandapam : యాదగిరిగుట్టలో కొత్త కళ్యాణ మండపం - ఘనంగా భూమిపూజ

యాదగిరిగుట్ట శ్రీ లక్ష్మీ నరసింహ స్వామివారి కొండపైన నూతన కళ్యాణ మండప నిర్మాణానికి భూమిపూజ ఘనంగా జరిగింది. దేవస్థాన చైర్మన్ మన్నె సత్యనారాయణ రెడ్డి సొంత నిధులతో ఈ భవనాన్ని నిర్మిస్తున్నారు.

రాష్ట్రంలోని ప్రముఖ ఆధ్యాత్మిక క్షేత్రంగా వెలుగొందుతున్న శ్రీ యాదగిరి లక్ష్మీ నరసింహ స్వామివారి దివ్యక్షేత్రంలో మరో కీలక ఘట్టం చోటుచేసుకుంది. యాదగిరిగుట్ట కొండపైన నూతనంగా నిర్మించతలపెట్టిన కళ్యాణ మండప నిర్మాణ పనులకు సంబంధించి భూమిపూజ కార్యక్రమం వైభవంగా జరిగింది. వేద పండితుల మంత్రోచ్చారణలు, శాస్త్రోక్త పూజా విధానాల నడుమ ఈ కార్యక్రమాన్ని నిర్వహించారు.

యాదగిరిగుట్టలో నూతన కళ్యాణ మండపం - నమూనా చిత్రం

ఈ భూమిపూజ మహోత్సవంలో ప్రభుత్వ విప్, ఆలేరు శాసనసభ్యులు బీర్ల ఐలయ్యతో పాటు యాదగిరిగుట్ట దేవస్థాన ధర్మకర్తల మండలి చైర్మన్ మన్నె సత్యనారాయణ రెడ్డి ముఖ్య అతిథులుగా హాజరై ప్రత్యేక పూజలు నిర్వహించారు. క్షేత్రానికి వచ్చే భక్తుల సౌకర్యార్థం ఈ నూతన కళ్యాణ మండపాన్ని అందుబాటులోకి తీసుకువస్తున్నట్లు వారు తెలిపారు.

ఛైౌర్మన్ సొంత నిధులతో…

భక్తులకు సేవ చేయాలనే గొప్ప సంకల్పంతో యాదగిరిగుట్ట దేవస్థాన బోర్డు చైర్మన్ ఎం. సత్యనారాయణ రెడ్డి తన సొంత నిధులను వెచ్చించి ఈ కళ్యాణ మండప నిర్మాణ పనులను చేపట్టడం విశేషం. స్వామివారి సేవలో భాగస్వాములు కావడానికే ఈ బృహత్తర కార్యక్రమానికి శ్రీకారం చుట్టినట్లు ఈ సందర్భంగా ఆయన పేర్కొన్నారు.

ఈ పూజా కార్యక్రమంలో పలువురు ప్రజాప్రతినిధులు, ఉన్నతాధికారులు పెద్ద సంఖ్యలో పాల్గొన్నారు. దేవస్థాన బోర్డు సభ్యులతో పాటు ఎమ్మెల్యే గడ్డం వినోద్, టీ. విజేందర్ గౌడ్, లక్ష్మీనారాయణ, ఈశ్వరమ్మ, గుండు మల్లయ్య, యాదాద్రి భువనగిరి జిల్లా కలెక్టర్ అనురాగ్ జయంతి, దేవస్థాన కార్యనిర్వహణాధికారి (ఈఓ) జె. భవానీ శంకర్ తదితరులు పాల్గొన్నారు.

కొండపైన ఈ కళ్యాణ మండపం అందుబాటులోకి వస్తే భక్తులకు… కల్యాణాలు జరిపించుకునే వారికి మరింత సౌకర్యవంతంగా ఉంటుందని ఆలయ అధికారులు తెలిపారు.