తెలంగాణ వ్యాప్తంగా సమృద్ధిగా వర్షాలు కురవాలని చిలుకూరు ఆలయం వరుణ జపం

తెలంగాణ వ్యాప్తంగా సమృద్ధిగా వర్షాలు కురవాలని, నదులు, జలాశయాలు నిండాలని కోరుతూ చిలుకూరు బాలాజీ ఆలయం జూలై 21న వరుణ జపాన్ని నిర్వహించనుంది. ఈ కార్యక్రమంలో వేద పూజారులు నడుము లోతు నీటిలో పవిత్ర మంత్రాలను పఠిస్తారు.

తెలంగాణ వ్యాప్తంగా వర్షాలు సమృద్ధిగా కురిసి, పంటలు పండాలని, ఎండిపోతున్న నదులు, జలాశయాలు జలకళతో నిండాలని కోరుతూ ప్రసిద్ధ చిలుకూరు బాలాజీ దేవస్థానం ఆధ్వర్యంలో సాంప్రదాయ 'వరుణ జపం' కార్యక్రమాన్ని నిర్వహించనున్నారు. జూలై 21, మంగళవారం ఉదయం 8:30 గంటల నుండి 11:00 గంటల వరకు హైదరాబాద్ శివార్లలోని గండిపేట జలాశయంలో ఈ విశేష పూజా కార్యక్రమం జరగనుంది.

ప్రతీకాత్మక చిత్రం

చిలుకూరు బాలాజీ ఆలయ అర్చకులు సి.ఎస్. లక్ష్మీ నరసింహన్ నాయకత్వంలో వేద పండితులు, అర్చకులు గండిపేట చెరువులో నడుములోతు నీటిలో నిలబడి ఈ పవిత్రమైన వరుణ జపాన్ని నిర్వహించనున్నారు. వేదభవన్‌కు చెందిన డాక్టర్ వి. శ్రీరామ ఘనపాటి నేతృత్వంలో పండితులు వేదాల్లోని తైత్తిరీయ సంహిత నుంచి వరుణ జప మంత్రాలను పఠిస్తారు. చిలుకూరు బాలాజీ స్వామి వారి అనుగ్రహంతో వరుణ దేవుడు, ఇంద్ర భగవానుడు శాంతించి వర్షాలు కురిపించాలని కోరుతూ ఈ మంత్రాలను 108 సార్లు జపిస్తారు.

వర్షాలు లేక ఎండిపోతున్న పంటలను కాపాడటం, రాష్ట్రవ్యాప్తంగా తాగునీరు, సాగునీటి ఎద్దడిని నివారించడమే ఈ సమూహ ప్రార్థనల ముఖ్య ఉద్దేశమని ఆలయ నిర్వహణ కమిటీ ప్రకటనలో తెలిపింది. పురాతన వేద సంప్రదాయం ప్రకారం దేశంలో అనావృష్టి (కరువు) పరిస్థితులు ఏర్పడినప్పుడు లేదా వర్షాలు ఆలస్యమైనప్పుడు వరుణ జపాలు, హోమాలు నిర్వహించడం ఆనవాయితీగా వస్తోంది. ఈ నేపథ్యంలో చిలుకూరు ఆలయం తలపెట్టిన ఈ ఆధ్యాత్మిక కార్యక్రమానికి ప్రాధాన్యత సంతరించుకుంది.

రాష్ట్రంలో ఎల్ నినో పరిస్థితుల ప్రభావాన్ని అంచనా వేయడానికి ప్రభుత్వం 27 మంది సభ్యులతో కూడిన నిపుణుల కమిటీని ఏర్పాటు చేసింది. ఈ కమిటీ తగిన ఉపశమన, అనుసరణ వ్యూహాలను సిఫార్సు చేయడంతో పాటు రాష్ట్ర/జిల్లా స్థాయి అత్యవసర ప్రణాళికలను సిద్ధం చేస్తుంది. తెలంగాణ రాష్ట్ర ప్రణాళికా బోర్డు వైస్ చైర్మన్ డాక్టర్ జి. చిన్నారెడ్డి చైర్మన్‌గా నియమితులయ్యారు.

తాగునీరు, సాగునీరు, విద్యుత్ సరఫరా కోసం ప్రత్యామ్నాయ ప్రణాళికలు సిద్ధం చేయాలని అధికారులను ఆదేశించినట్లు సమాచార, పౌర సంబంధాల శాఖ మంత్రి పొంగులేటి శ్రీనివాసరెడ్డి ఇప్పటికే తెలిపారు. రైతులు మొక్కజొన్న, పప్పుధాన్యాల వంటి తక్కువ నీరు అవసరమయ్యే పంటలను పండించాలని ఆయన సూచించారు.