E-Paper
Telangana : అక్రమ నిల్వలపై ఉక్కుపాదం - రూ. 66కే కిలో బీపీటీ బియ్యం! కీలక ఆదేశాలు
తెలంగాణలో బియ్యం ధరలను అదుపు చేసేందుకు సివిల్ సప్లైస్ శాఖ చర్యలు చేపట్టింది. సాధారణ బీపీటీ బియ్యం గరిష్ఠ ధరను కిలోకు రూ.66గా ఖరారు చేసిన ప్రభుత్వం…. బ్లాక్ మార్కెటింగ్ చేసేవారిపై కేసులు నమోదు చేసి విస్తృత దాడులు నిర్వహిస్తోంది.
Prefer HTon Google
రాష్ట్రంలో పెరుగుతున్న బియ్యం ధరల నుంచి సామాన్య వినియోగదారులకు ఉపశమనం అందించడమే లక్ష్యంగా తెలంగాణ ప్రభుత్వం చర్యలు చేపడుతోంది. మార్కెట్లో కృత్రిమ కొరత సృష్టించి బియ్యాన్ని అధిక ధరలకు విక్రయించే వ్యాపారులు, రైస్ మిల్లర్లపై ఉపేక్షించేది లేదని స్పష్టం చేస్తోంది. ఈ మేరకు రాష్ట్ర పౌరసరఫరాల శాఖ మంత్రి ఉత్తమ్ కుమార్ రెడ్డి హెచ్చరించారు. అక్రమ నిల్వలు (హోర్డింగ్), బ్లాక్ మార్కెటింగ్ మరియు ఎక్కువ ధరలకు విక్రయించే వారిపై చట్టపరమైన కఠిన చర్యలు తప్పవని స్పష్టం చేశారు. ధరల నియంత్రణకుగానూ ప్రత్యేక నిఘా, టాస్క్‌ఫోర్స్ తనిఖీలను విస్తృతం చేసినట్లు మంత్రి తెలిపారు.
ధరల నియంత్రణపై ఫోకస్….
బియ్యం ధరలను అదుపులోకి తీసుకురావడంలో భాగంగా పౌరసరఫరాల శాఖ అధికారులు హోల్‌సేల్ వ్యాపారులు, రిటైలర్లు మరియు రైస్ మిల్లర్లతో శుక్రవారం సమీక్షా సమావేశం నిర్వహించారు. ఈ చర్చల ఆధారంగా, వినియోగదారులు ఎక్కువగా వాడే 'బిపిటి' (BPT) రకం బియ్యం గరిష్ఠ ధరను కిలోకు రూ. 66గా ప్రభుత్వం నిర్ణయించింది. ఇక 'ఆర్ఎన్ఆర్' రకం బియ్యం ధరను దాని నాణ్యత, ఉత్పత్తి వ్యయాన్ని బట్టి త్వరలోనే సమీక్షించి నిర్ణయిస్తామని చెప్పారు.
"సామాన్యుల అవసరాలను ఆసరాగా చేసుకుని దందాలు చేసేవారిని ప్రభుత్వం ఎంతమాత్రం సహించదు. మార్కెట్లో ధరలు స్థిరపడేవరకు ఈ తనిఖీలు నిరంతరం కొనసాగుతాయి," అని ఉత్తమ్ కుమార్ రెడ్డి వ్యాపారులను హెచ్చరించారు.
పౌరసరఫరాలు, పోలీస్, జీఎస్టీ (GST), లీగల్ మెట్రాలజీ, సంబంధిత ఎన్‌ఫోర్స్‌మెంట్ విభాగాల అధికారులతో కూడిన 5 శాఖల ఉమ్మడి బృందాలు ఇప్పటికే రాష్ట్రవ్యాప్తంగా సోదాలు చేపడుతున్నాయి. అక్రమంగా ధాన్యం నిల్వ చేయడం…. నిర్ణయించిన ధర కంటే ఎక్కువకు అమ్మడం వంటి ఉల్లంఘనలకు పాల్పడిన బియ్యం వ్యాపారులపై ఇప్పటివరకు 12 కేసులు నమోదు చేశారు.
ముఖ్యంగా హైదరాబాద్, రంగారెడ్డి, మేడ్చల్-మల్కాజిగిరి జిల్లాల్లోని ప్రధాన హోల్‌సేల్ కేంద్రాలైన బేగం బజార్, నాంపల్లి, మహారాజ్‌గంజ్ పరిధిలో విస్తృత దాడులు సాగాయి. రాష్ట్రమంతటా అన్ని జిల్లాల్లోనూ ఈ తనిఖీలను మరింత వేగవంతం చేయాలని అధికారులను మంత్రి ఆదేశించారు.
ఈ సందర్భంగా సివిల్ సప్లైస్ కమిషనర్ స్టీఫెన్ రవీంద్ర, డైరెక్టర్ శ్యామ్ ప్రసాద్ లాల్ తదితర ఉన్నతాధికారులు తాజా ఎన్‌ఫోర్స్‌మెంట్ వివరాలను మంత్రికి నివేదించారు. రాష్ట్రంలో సరిపడా బియ్యం నిల్వలు అందుబాటులో ఉన్నాయని, ప్రజలు ఎలాంటి ఆందోళనకు గురై అనవసరంగా పెద్దమొత్తంలో బియ్యాన్ని కొనుగోలు చేయాల్సిన అవసరం లేదని మంత్రి స్పష్టం చేశారు పబ్లిక్ డిస్ట్రిబ్యూషన్ సిస్టమ్ (PDS) ద్వారా ప్రభుత్వం రేషన్ షాపుల్లో అందిస్తున్న సన్న బియ్యాన్ని నిరభ్యంతరంగా వినియోగించుకోవాలని కోరారు.
