Daily Special Trains : సికింద్రాబాద్-కాగజ్‌నగర్-హైదరాబాద్ మధ్య డైలీ స్పెషల్ ట్రైన్స్

Daily Special Trains : పండుగల రద్దీ కారణంగా దక్షిణ మధ్య రైల్వే పలు స్పెషల్ సర్వీసులను ప్రకటించింది. సికింద్రాబాద్ – సిర్పూర్ కాగజ్‌నగర్ – హైదరాబాద్ నడుమ ఈ రైళ్లు నడవనున్నాయి.

దీపావళి పండుగ రద్దీని దృష్టిలో ఉంచుకుని దక్షిణ మధ్య రైల్వే ప్రయాణికులకు ఊరటనిచ్చే తీపి కబురు అందించింది. ప్రయాణికుల రద్దీకి అనుగుణంగా సికింద్రాబాద్ – సిర్పూర్ కాగజ్‌నగర్ – హైదరాబాద్ మార్గంలో 22 ప్రత్యేక రైలు సర్వీసులను నడపాలని నిర్ణయించింది. అక్టోబర్ 26, 2026 నుండి నవంబర్ 05, 2026 వరకు ప్రతిరోజూ ఈ స్పెషల్ రైళ్లు అందుబాటులో ఉంటాయి.

సికింద్రాబాద్-కాగజ్‌నగర్-హైదరాబాద్ స్పెషల్ ట్రైన్స్

రైలు నంబర్ 07711 (సికింద్రాబాద్ – సిర్పూర్ కాగజ్‌నగర్)

అక్టోబర్ 26, 2026 నుండి నవంబర్ 05, 2026 వరకు మొత్తం 11 సర్వీసులు నడుస్తాయి. ప్రతిరోజూ మధ్యాహ్నం 12:10 గంటలకు సికింద్రాబాద్‌లో బయలుదేరి, అదే రోజు సాయంత్రం 5:30 గంటలకు సిర్పూర్ కాగజ్‌నగర్ చేరుకుంటుంది.

రైలు నంబర్ 07712 (సిర్పూర్ కాగజ్‌నగర్ – హైదరాబాద్):

అక్టోబర్ 26, 2026 నుండి నవంబర్ 05, 2026 వరకు 11 సర్వీసులు నడుస్తాయి. ప్రతిరోజూ సాయంత్రం 6 గంటలకు సిర్పూర్ కాగజ్‌నగర్‌లో బయలుదేరి, అదే రోజు రాత్రి 11:15 గంటలకు నాంపల్లి (హైదరాబాద్) స్టేషన్‌కు చేరుకుంటుంది.

ఆగే ముఖ్యమైన స్టేషన్లు

ఈ రెండు ప్రత్యేక రైళ్లు ఇరువైపులా చర్లపల్లి, భువనగిరి, యాదాద్రి, జనగామ, కాజీపేట, జమ్మికుంట, పెద్దపల్లి, రామగుండం, మంచిర్యాల, బెల్లంపల్లి, ఆసిఫాబాద్ రోడ్ స్టేషన్‌లలో ఆగుతాయి. ప్రయాణికుల సౌకర్యార్థం ఈ రైళ్లలో ఏసీ చైర్ కార్, రిజర్వ్డ్ సెకండ్ సిట్టింగ్ క్లాస్, జనరల్ సెకండ్ క్లాస్ కోచ్‌లను ఏర్పాటు చేశారు.

ఆక్యుపెన్సీ లేక నాందేడ్ – ఉద్నా రైళ్లు రద్దు

దక్షిణ మధ్య రైల్వే సేకరించిన ప్రయాణికుల వివరాల ప్రకారం, గతంలో ప్రకటించిన నాందేడ్ – ఉద్నా స్పెషల్ రైళ్లకు ఆశించిన స్పందన రాకపోవడంతో (తక్కువ ఆక్యుపెన్సీ) కింద పేర్కొన్న సర్వీసులను రద్దు చేశారు.

రైలు నంబర్ 07605 (హెచ్.ఎస్. నాందేడ్ – ఉద్నా) సోమవారాలు (నవంబర్ 02, 2026 నుండి నవంబర్ 23, 2026 వరకు) - మొత్తం 04 సర్వీసులు రద్దు చేశారు.

రైలు నంబర్ 07606 (ఉద్నా – హెచ్.ఎస్. నాందేడ్) మంగళవారాలు (నవంబర్ 03, 2026 నుండి నవంబర్ 24, 2026 వరకు) - మొత్తం 04 సర్వీసులు రద్దు అయ్యాయి.

పండుగ సీజన్‌లో సొంత ఊళ్లకు వెళ్లే ప్రయాణికులు ఈ ప్రత్యేక సర్వీసులను వినియోగించుకోవాలని దక్షిణ మధ్య రైల్వే సూచించింది. రైలు వేళలు, సీట్ల లభ్యత వివరాల కోసం ఐఆర్‌సీటీసీ అధికారిక వెబ్‌సైట్ లేదా 139 హెల్ప్‌లైన్ నంబర్‌ను సంప్రదించి టికెట్లు బుక్ చేసుకోవచ్చు.