Video : డివైడర్‌ను ఢీకొట్టిన కారు.. మంటలు చెలరేగి న్యూరో సర్జన్ సజీవ దహనం

Hyderabad-Khammam : హైదరాబాద్-ఖమ్మం జాతీయ రహదారిపై సూర్యాపేట సమీపంలో ఘోర రోడ్డు ప్రమాదం జరిగింది. ఈ ఘటనలో ఓ డాక్టర్ సజీవ దహనం అయ్యారు.

హైదరాబాద్-ఖమ్మం రహదారిపై పిల్లలమర్రి ఫ్లైఓవర్ సమీపంలో ఘోర ప్రమాదం జరిగింది. మృతుడు ఖమ్మంలోని మమత ఆసుపత్రిలో పనిచేస్తున్న న్యూరో సర్జన్ జగదీష్ (50) అని, ఆయన ఖమ్మం జిల్లా వైరాకు చెందినవారని గుర్తించారు. తన కుటుంబాన్ని కలిసేందుకు ఆయన హైదరాబాద్ నుండి ఖమ్మం వెళ్తుండగా ఈ ప్రమాదం జరిగిందని పోలీసులు తెలిపారు. డివైడర్‌ను ఢీకొట్టిన తర్వాత కారులో మంటలు చెలరేగి, పూర్తిగా కాలిపోయింది.

హైదరాబాద్-ఖమ్మం రహదారిపై రోడ్డు ప్రమాదం

రోడ్డు డివైడర్ ఇనుప గ్రిల్స్‌ను ఢీకొట్టిన తర్వాత న్యూరో సర్జన్ జగదీష్ కారు మంటల్లో చిక్కుకుంది. ప్రమాదం జరిగిన సమయంలో జగదీష్ కారులో ఒక్కరే ఉన్నారని ఏఎన్‌ఐ వార్తా సంస్థ నివేదించింది. సమాచారం అందుకున్న వెంటనే పోలీసు బృందం, అగ్నిమాపక సిబ్బంది ఘటనా స్థలానికి చేరుకుని మంటలను ఆర్పారు.

అయితే మంటలను ఆర్పే సమయానికి వాహనం పూర్తిగా కాలిపోయింది. 'తరువాత, డ్రైవర్ సీటులో కాలిపోయిన మృతదేహం లభ్యమైంది. సమీపంలోని టోల్ గేట్ సమాచారం, వాహనం తాత్కాలిక రిజిస్ట్రేషన్ నంబర్ ఆధారంగా, మృతుడిని ఖమ్మం జిల్లాలోని ఆసుపత్రిలో పనిచేస్తున్న న్యూరో సర్జన్ కె.జగదీష్‌గా గుర్తించారు.' అని ఒక అధికారి తెలిపారు.

మృతదేహాన్ని పోస్ట్‌మార్టం కోసం తరలించామని, ఈ ఘటనపై కేసు నమోదు చేశామని పోలీసులు వెల్లడించారు. దీనిపై తదుపరి విచారణ జరుగుతోంది. నిద్రలేమి కారణంగా డాక్టర్ వాహనంపై నియంత్రణ కోల్పోయి ఉండవచ్చ అని చెబుతున్నారు.

నిద్రలేమి కారణంగానే డాక్టర్ కారుపై నియంత్రణ కోల్పోయి ఉండవచ్చని అనుమానిస్తున్నట్లు ఖమ్మం రూరల్ సీఐ జి. రాజశేఖర్ వెల్లడించారు. ప్రారంభంలో బాధితుడిని గుర్తించడంలో పోలీసులకు ఇబ్బందులు ఎదురయ్యాయి. అయితే టోల్ గేట్ సమాచారం ఆధారంగా.. చివరకు మృతుడిని మమత ఆసుపత్రిలో న్యూరోసర్జరీ విభాగం అధిపతిగా పనిచేస్తున్న జగదీష్‌గా గుర్తించారు.

ఖమ్మం వైపు వెళ్తున్న కారు డివైడర్‌ను ఢీకొట్టినట్టుగా వీడియోలో కనపడుతుంది. ఈ ప్రమాదానికి సంబంధించిన దృశ్యాలు సీసీటీవీలో రికార్డు అయ్యాయి. క్షణాల్లోనే కారు మంటల్లో చిక్కుకుంది. దీంతో కారులో ఉన్న డాక్టర్ జగదీశ్ సజీవ దహనమయ్యారు.