నెల్లూరు జైలుకు నకిలీ మద్యం కేసులో అరెస్టయిన మాజీ మంత్రి జోగి రమేశ్‌!

నకిలీ మద్యం కేసులో అరెస్టయిన మాజీ మంత్రి జోగి రమేశ్‌ను విజయవాడ నుంచి నెల్లూరు జైలుకు తరలించారు. దీనిపై ఆయన కుటుంబ సభ్యులు ఆందోళన వ్యక్తం చేస్తున్నారు.

నకిలీ మద్యం కేసులో మాజీ మంత్రి జోగి రమేశ్‌ను అరెస్ట్ చేసిన విషయం తెలిసిందే. ఆదివారం తెల్లవారుజామున ఎన్టీఆర్ జిల్లా ఇబ్రహీంపట్నంలో జోగి రమేశ్, ఆయన సోదరుడు జోగి రాము ఇంటికి సిట్, ఎక్సైజ్, పోలీస్ అధికారులు చేరుకున్నారు. లోపలికి వెళ్లే ప్రయత్నం చేశారు. మూడు నాలుగు గంటలపాటు అక్కడ హడావుడి నడిచింది. అయితే తర్వాత జోగి రమేశ్ బయటకు వచ్చారు. దీంతో సిట్ అధికారులు ఆయనను అదుపులోకి తీసుకున్నారు.

జోగి రమేశ్(ఫైల్ ఫొటో)

జోగి రమేశ్‌ను సుమారు 12 గంటలపాటు అధికారులు ప్రశ్నించారు. ఆయన సోదరుడు రాముని కూడా వేరేగా విచారించారు. జనార్దనరావుతో సంబంధాలపై ఆరా తీశారు. వైద్య పరీక్షలు చేసిన తర్వాత అధికారులు జోగి రమేశ్‌ను న్యాయమూర్తి ఎదుట ప్రవేశపెట్టారు. అర్ధారాత్రి దాటిన తర్వాత వాదనలు మెుదలవ్వగా.. న్యాయమూర్తి తెల్లవారుజామున 5 గంటలకు రిమాండ్ విధిస్తూ తీర్పు ఇచ్చారు. మెుదట జోగి రమేశ్‌, ఆయన సోదరుడు రాముని విజయవాడ జైలుకు తీసుకెళ్లారు. అక్కడ నుంచి తాజాగా నెల్లూరు జైలుకు తరలించారు. జైలు మార్పుతో జోగి రమేశ్ కుటుంబ సభ్యులు ఆందోళన వ్యక్తం చేశారు.

అయితే జోగి రమేశ్‌కు ఆసుపత్రి వైద్య పరీక్షలు నిర్వహించే సమయంలో ఉద్రిక్త పరిస్థితి నెలకొంది. ఆయన అనుచరులు, వైసీపీ కార్యకర్తలు పెద్ద ఎత్తున ఆసుపత్రికి చేరుకున్నారు. కాసేపు పోలీసులు, జోగి అనుచరుల మధ్య తోపులాట జరిగింది. ఈ సమయంలో హాస్పిటల్ అద్దాలు పగలగొట్టారు.

జోగి రమేశ్‌కు వైద్య పరీక్షలు నిర్వహిస్తున్నంత సేపు ఆసుపత్రిలో ఆందోళనకర పరిస్థితులు నెలకొన్నాయి. ఆసుపత్రిలోకి వచ్చేందుకు జోగి అనుచరులు ప్రయత్నం చేశారు. పోలీసులు సముదాయించినా.. వెనక్కి తగ్గలేదు. దీంతో తోపులాట జరిగింది. అయితే అద్దాలు పగలగొట్టిన ఘటనపై జోగి రమేష్ భార్య, కుమారుడిపై కేసు నమోదైనట్టుగా తెలుస్తోంది. మాచవరం పోలీసులకు డ్యూటీ కానిస్టేబుల్ శ్రీనివాసరావు ఫిర్యాదు చేశారు. ఆయన ఫిర్యాదుతో మాచవరం పోలీసులు కేసు నమోదు చేశారు.