E-Paper
Phone Tapping Case : ఫోన్ ట్యాపింగ్ కేసులో హరీశ్ రావుపై సిద్దిపేటలో ఎఫ్ఐఆర్
Phone Tapping Case : ఫోన్ ట్యాపింగ్ కేసులో కీలక పరిణామం చోటుచేసుకుంది. మాజీ మంత్రి హరీశ్‌రావుపై సిద్దిపేటలో ఎఫ్ఐఆర్ నమోదైంది.
Prefer HTon Google
తెలంగాణ రాజకీయాల్లో తీవ్ర కలకలం రేపిన ఫోన్ ట్యాపింగ్ వ్యవహారంలో కొత్త మలుపు తీసుకుంది. మాజీ మంత్రి, బీఆర్‌ఎస్ నేత తన్నీరు హరీశ్‌రావుపై నమోదైన కేసులో కీలక పరిణామం చోటుచేసుకుంది. హైదరాబాద్‌లోని పంజాగుట్ట పోలీసు స్టేషన్ నుంచి సిద్ధిపేట వన్‌టౌన్ పోలీసు స్టేషన్‌కు బదిలీ అయిన ఈ కేసులో అధికారులు తాజాగా కొత్త ఎఫ్ఐఆర్ నమోదు చేశారు. పాత ఎఫ్‌ఐఆర్‌కు తోడుగా ఈసారి మరికొన్ని సెక్షన్లను జోడిస్తూ కేసు తీవ్రతను పెంచారు.
గతంలో పంజాగుట్ట పోలీస్ స్టేషన్‌లో నమోదైన ప్రాథమిక ఎఫ్‌ఐఆర్‌తో పోలిస్తే, సిద్ధిపేట వన్‌టౌన్ పోలీసులు నమోదు చేసిన కొత్త ఎఫ్‌ఐఆర్‌లో అదనంగా ఆరు కఠినమైన సెక్షన్లను చేర్చారు. ఐపీసీ (IPC) సెక్షన్లు 419, 420, 467, 406, ఐటీ యాక్ట్ (IT Act) సెక్షన్లు 66C (అనుమతి లేకుండా ఇతరుల ఐడెంటిటీ సమాచారాన్ని దొంగిలించడం), 66D (కంప్యూటర్ వనరులను ఉపయోగించి ఆన్‌లైన్ మోసాలకు పాల్పడటం) కొత్త సెక్షన్లు చేర్చారు.
ఈ కొత్త సెక్షన్ల జోడించడంతో కేసు విచారణ మరింత వేగవంతం కానుంది. బాధితుడైన చక్రధర్ గౌడ్ ఇచ్చిన ఫిర్యాదు ఆధారంగా 2024 డిసెంబర్ 1న పంజాగుట్ట పోలీస్ స్టేషన్‌లో తొలిసారిగా కేసు నమోదైంది. ఈ విచారణ ప్రక్రియలో అధికారులు రూపొందించిన ఎఫ్‌ఐఆర్‌లో ఎ1 మాజీ మంత్రి తన్నీరు హరీశ్‌రావు, ఎ2 హైదరాబాద్ టాస్క్‌ఫోర్స్ మాజీ డీసీపీ రాధాకిషన్‌రావు ఉన్నారు.
2023 సంవత్సరంలో తనతో పాటు తన భార్యకు చెందిన వ్యక్తిగత మొబైల్ ఫోన్లను కూడా ట్యాపింగ్ చేశారని చక్రధర్ గౌడ్ పోలీసులకు ఇచ్చిన ఫిర్యాదులో పేర్కొన్నారు. రాజకీయ ప్రయోజనాలు, సమాచారం కోసం అధికార దుర్వినియోగానికి పాల్పడి తమ వ్యక్తిగత స్వేచ్ఛకు విఘాతం కలిగించారని తీవ్ర ఆరోపణలు చేశారు.
ప్రభుత్వ వ్యవస్థలను ఉపయోగిస్తూ చేపట్టిన ఈ ట్యాపింగ్ వ్యవహారంలో ఉన్నతాధికారుల పాత్రపై కూడా దర్యాప్తు జరుగుతోంది. కేసు సిద్ధిపేటకు బదిలీ కావడంతో పాటు కొత్త ఎఫ్‌ఐఆర్‌తో అదనపు సెక్షన్లు నమోదు కావడంతో రాబోయే రోజుల్లో విచారణ ఏ మలుపు తిరుగుతుందోనని తీవ్ర ఉత్కంఠ నెలకొన్నది.
