TGSRTC Free Bus : నీట్ విద్యార్థులకు టీజీఎస్ఆర్టీసీ బస్సుల్లో ఉచిత ప్రయాణం

నీట్ పరీక్ష రాసే అభ్యర్థులకు తెలంగాణ సర్కార్ గుడ్‌న్యూస్ చెప్పింది. పరీక్ష రోజున హాల్ టికెట్లు చూపించి టీజీఎస్ఆర్టీసీ బస్సుల్లో ఉచిత ప్రయాణం చేయవచ్చని తెలిపింది.

వైద్య విద్యా కోర్సుల్లో ప్రవేశాల కోసం రాసే నీట్ యూజీ 2026 (NEET UG 2026) రీ-షెడ్యూల్డ్ పరీక్షకు హాజరయ్యే అభ్యర్థులకు తెలంగాణ ప్రభుత్వం ఒక అద్భుతమైన అవకాశాన్ని కల్పించింది. ఈ నెల 21వ తేదీ జరగనున్న ఈ ప్రవేశ పరీక్షకు హాజరయ్యే విద్యార్థులందరూ టీజీఎస్‌ఆర్‌టీసీ (TGSRTC) బస్సుల్లో ఉచితంగా ప్రయాణించవచ్చని రాష్ట్ర బీసీ సంక్షేమ, రవాణా శాఖ మంత్రి పొన్నం ప్రభాకర్ అధికారికంగా ప్రకటించారు.

టీజీఎస్ఆర్టీసీ ఉచిత బస్సు ప్రయాణం

నేషనల్ స్టూడెంట్స్ యూనియన్ ఆఫ్ ఇండియా(NSUI) రాష్ట్ర అధ్యక్షుడు యాదవల్లి వెంకటస్వామి నేతృత్వంలోని ప్రతినిధి బృందం జూన్ 16 నాడు డాక్టర్ బి.ఆర్.అంబేద్కర్ తెలంగాణ సచివాలయంలో మంత్రి పొన్నం ప్రభాకర్‌ను కలిసింది. గ్రామీణ ప్రాంతాల నుండి హైదరాబాద్, ఇతర పట్టణాల్లోని పరీక్షా కేంద్రాలకు వచ్చే పేద విద్యార్థులకు రవాణా భారం తగ్గించేందుకు ఉచిత బస్సు సౌకర్యం కల్పించాలని వారు విజ్ఞప్తి చేశారు. దీనిపై సానుకూలంగా స్పందించిన మంత్రి, పరీక్ష రోజున అభ్యర్థులు తమ హాల్ టికెట్ చూపించి ఉచితంగా ప్రయాణించేలా జీవో జారీ చేశారు.

ఈ నిర్ణయం వెలువడిన మరుసటి రోజే రవాణా శాఖ మంత్రి పొన్నం ప్రభాకర్, సాంఘిక సంక్షేమ శాఖ మంత్రి అడ్లూరి లక్ష్మణ్ కుమార్ కలిసి కరీంనగర్ జిల్లా మానకొండూరు మండలం తిమ్మాపూర్ గ్రామం నుండి కరీంనగర్ వరకు సాధారణ టీజీఎస్ఆర్టీసీ బస్సులో ప్రయాణించారు. ఈ ప్రయాణంలో విద్యార్థులు, మహిళలు, ఇతర ప్రయాణికులతో ముచ్చటించారు. ఉచిత ప్రయాణ సౌకర్యాలు, ఆర్టీసీ సేవలపై క్షేత్రస్థాయి ఫీడ్‌బ్యాక్ తీసుకున్నారు.

మరోవైపు నీట్ పరీక్షను నిర్వహించే నేషనల్ టెస్టింగ్ ఏజెన్సీ ఈ ఏడాది విద్యార్థులపై ఒత్తిడిని తగ్గించడానికి కొన్ని కీలకమైన, ఉపయోగకరమైన మార్పులను ప్రకటించింది. గతంలో విద్యార్థులకు సమయం సరిపోవడం లేదనే ఫిర్యాదులు రావడంతో, ఈసారి పరీక్షా సమయాన్ని మరో 15 నిమిషాలు పెంచారు. పరీక్ష మధ్యాహ్నం 2:00 గంటల నుండి సాయంత్రం 5:15 గంటల వరకు (మొత్తం 195 నిమిషాలు) జరుగుతుంది. ఇన్విజిలేషన్ ప్రక్రియలు, సంతకాలు వంటి ఫార్మాలిటీస్ వల్ల విద్యార్థుల ఒరిజినల్ పరీక్ష సమయం వృథా కాకుండా ఉండేందుకు ఈ అదనపు సమయం ఉపయోగపడుతుంది.

ఫిజిక్స్, కెమిస్ట్రీ కోసం విద్యార్థులకు స్థలం సరిపోవడం లేదని గమనించిన ఎన్టీఏ, క్వశ్చన్ పేపర్ బుక్‌లెట్‌లో రఫ్ వర్క్ పేజీల సంఖ్యను రెండు నుండి నాలుగుకు పెంచింది. బుక్‌లెట్ ప్రారంభంలో, చివరలో ఇచ్చిన ఈ ఖాళీ పేజీలను విద్యార్థులు వినియోగించుకోవచ్చు.

జూన్ 21న పరీక్షకు వెళ్లే విద్యార్థులు తమ అడ్మిట్ కార్డ్ (హాల్ టికెట్)తో పాటు ఒక చెల్లుబాటు అయ్యే ఒరిజినల్ ఐడీ ప్రూఫ్ (ఆధార్ కార్డ్ వంటివి) పరీక్షా కేంద్రానికి, ఉచిత బస్సు ప్రయాణ సమయాల్లో వెంట ఉంచుకోవాలి.