Telangana Rains : తెలంగాణకు బిగ్ అలర్ట్ - ఈనెల 18 నుంచి భారీ వర్షాలు : వాతావరణ కేంద్రం

Telangana Weather Updates : తెలంగాణకు ఐఎండీ బిగ్ అలర్ట్ ఇచ్చింది. జూన 18 నుంచి భారీ వర్షాలు కురిసే అవకాశం ఉందని అంచనా వేసింది. పలు జిల్లాలకు హెచ్చరికలను జారీ చేసింది.

Telangana Heavy Rains : తెలంగాణకు వాతావరణ కేంద్రం బిగ్ అలర్ట్ జారీ చేసింది. రాబోయే ఐదు రోజుల పాటు పలు జిల్లాల్లో ఉరుములు, మెరుపులు మరియు ఈదురు గాలులతో కూడిన భారీ వర్షాలు కురిసే అవకాశం ఉందని వెల్లడించింది. ఈ మేరకు రాష్ట్రంలోని పలు ప్రాంతాలకు ఎల్లో అలర్ట్ హెచ్చరికలను జారీ చేసింది.రాబోయే రెండు రోజుల్లో గరిష్ఠ ఉష్ణోగ్రతలలో పెద్దగా మార్పు ఉండకపోయినప్పటికీ…. ఆ తర్వాత మూడు రోజుల పాటు ఉష్ణోగ్రతలు క్రమంగా తగ్గే అవకాశం ఉంది.

తెలంగాణకు భారీ వర్ష సూచన

జూన్ 15 నుంచి జూన్ 16 (ఉదయం 08:30 వరకు)… రాష్ట్రంలోని పలు జిల్లాల్లో 30 నుంచి 40 కిమీ ఈదురు గాలులు, ఉరుములు, మెరుపులతో కూడిన తేలికపాటి నుండి ఒక మోస్తరు వర్షాలు అక్కడక్కడా కురిసే అవకాశం ఉంది. పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, జనగాం, సిద్దిపేట, యాదాద్రి భువనగిరి, రంగారెడ్డి జిల్లాలకు హెచ్చరికలు జారీ అయ్యాయి.

జూన్ 16 నుంచి జూన్ 17 (ఉదయం 08:30 వరకు) వరకు 30 నుంచి 40 కిమీ ఈదురు గాలులు, ఉరుములు, మెరుపులతో కూడిన తేలికపాటి నుండి ఒక మోస్తరు వర్షాలు అక్కడక్కడా కురిసే అవకాశం ఉంది. ఆదిలాబాద్, కొమురంభీం ఆసిఫాబాద్, మంచిర్యాల, నిర్మల్, నిజామాబాద్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ జిల్లాల్లో అక్కడక్కడా వర్షాలు పడవచ్చు.

ఈనెల 18 నుంచి భారీ వర్షాలు…

ఈనెల 18 నుంచి వాతావరణంలో భారీ మార్పులు రానున్నాయి. గాలుల వేగం గంటకు 40 నుండి 50 కి.మీ వేగంతో ఉంటాయి. రాష్ట్రంలోని కొన్ని జిల్లాల్లో భారీ వర్షాలు (Heavy Rains) కురిసే అవకాశం ఉందని వాతావరణ కేంద్రం హెచ్చరించింది. జూన్ 18న రంగారెడ్డి, హైదరాబాద్, మేడ్చల్-మల్కాజిగిరి, వికారాబాద్, సంగారెడ్డి, మహబూబ్ నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల జిల్లాల్లో అక్కడక్కడా భారీ వానలు పడే సూచనలు ఉన్నాయి.