కాపురానికి రావట్లేదని భార్య ముక్కు కొరికేసిన భర్త.. మంచిర్యాలలో దారుణం!

మంచిర్యాల జిల్లాలో ఘోరమైన ఘటన వెలుగుచూసింది. భార్యపై కోపంతో ఆమె ముక్కు కొరికేశాడు భర్త. దీంతో భార్య ముక్కు తెగిపడింది.

మంచిర్యాల జిల్లాలో కుటుంబ కలహాలు తీవ్ర విషాదానికి దారితీశాయి. క్షణికావేశం ఓ కుటుంబాన్ని తీవ్ర వేదనలోకి నెట్టింది. కోటపల్లి మండలంలో చోటుచేసుకున్న ఈ అమానుష సంఘటన స్థానికంగా తీవ్ర కలకలం రేపింది.

భార్య ముక్కు కొరికిన భర్త

కోటపల్లి మండలం మల్లంపేట గ్రామానికి చెందిన మణిచందర్‌కు, అదే మండలానికి చెందిన మమతతో ఎనిమిదేళ్ల క్రితం వివాహమైంది. వీరికిద్దరు పిల్లలు ఉన్నారు. కొన్నాళ్ల పాటు వీరి సంసారం సాఫీగానే సాగినా, ఇటీవల కాలంలో ఇద్దరి మధ్య తరచూ గొడవలు జరుగుతున్నాయి. రెండు రోజుల క్రితం కూడా ఇద్దరి మధ్య తీవ్రస్థాయిలో వాగ్వాదం చోటుచేసుకుంది. భర్త వేధింపులను తట్టుకోలేకపోయిన మమత, మనస్తాపంతో కోటపల్లిలోని తన తల్లిగారింటికి వెళ్లిపోయింది.

భార్య ఇంట్లో నుంచి వెళ్లిపోవడాన్ని జీర్ణించుకోలేకపోయిన మణిచందర్, తీవ్ర ఆగ్రహంతో ఊగిపోతూ అత్తగారింటికి వెళ్లాడు. అక్కడ తీవ్రస్థాయిలో హంగామా సృష్టించి, అడ్డువచ్చిన మామపై దాడి చేశాడు. ఈ దాడిలో మామకు తీవ్ర గాయాలయ్యాయి. మామను కర్రతో కొట్టాడు.

అంతటితో ఆగకుండా ఆవేశంలో విచక్షణ కోల్పోయిన మణిచందర్ తన భార్య మమతపై పడి ఆమె ముక్కును బలంగా కొరికేశాడు. దీంతో మమత ముక్కు తీవ్రంగా తెగిపోయి రక్తం అదుపులేకుండా కారింది. బాధితురాలి కేకలతో స్థానికులు వచ్చారు. ఆ ఘటన చూసి భయాందోళనలకు గురయ్యారు.

తీవ్రంగా గాయపడిన మమతను స్థానికులు వెంటనే అంబులెన్స్‌లో చెన్నూర్ ప్రభుత్వ ఆసుపత్రికి తరలించారు. ఆమెకు అక్కడ ప్రాథమిక చికిత్స అందించారు. పరిస్థితి విషమించడంతో మెరుగైన వైద్యం కోసం మంచిర్యాల ఆసుపత్రికి, ఆపై వరంగల్‌లోని ఆసుపత్రికి తరలించి అత్యవసర చికిత్స అందిస్తున్నారు.

ఈ ఘటనపై బాధితురాలి కుటుంబ సభ్యులు కోటపల్లి పోలీస్ స్టేషన్‌లో ఫిర్యాదు చేశారు. వారి ఫిర్యాదు మేరకు పోలీసులు కేసు నమోదు చేసుకుని, పరారీలో ఉన్న నిందితుడి కోసం గాలింపు చర్యలు చేపట్టారు. ఎనిమిదేళ్ల బంధం, ఇద్దరు పిల్లల భవిష్యత్తును కూడా పక్కనబెట్టి భర్త ప్రవర్తించిన తీరుపై స్థానికులు తీవ్ర ఆగ్రహం వ్యక్తం చేస్తున్నారు.