బలపడుతున్న అల్పపీడనం - ఏపీ తీరం వైపు పయనం..! నవంబర్ 4 వరకు తెలంగాణలో భారీ వర్షాలు

ఆంధ్రప్రదేశ్, తెలంగాణ రాష్ట్రాలకు వాతావరణ శాఖ కీలక హెచ్చరికలు జారీ చేసింది. అండమాన్ సముద్రంలో అల్పపీడనం బలపడుతుండటంతో రాగల కొద్ది రోజుల్లో తెలుగు రాష్ట్రాల్లో ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశముంది.

తెలుగు రాష్ట్రాల ప్రజలకు వాతావరణ శాఖ కీలక అప్డేట్ అందించింది. రాబోయే ఐదు రోజుల పాటు ఆంధ్రప్రదేశ్, తెలంగాణ రాష్ట్రాల్లో వాతావరణం మారనుందని, పలు జిల్లాల్లో ఉరుములు, మెరుపులు మరియు బలమైన ఈదురుగాలులతో కూడిన వర్షాలు కురిసే అవకాశం ఉందని అంచనా వేసింది.

అల్పపీడనం ఎఫెక్ట్ - తెలుగు రాష్ట్రాలకు వర్ష సూచన

అల్పపీడనం బలపడే అవకాశం….

దక్షిణ అండమాన్ సముద్రం మరియు దాని పరిసర ప్రాంతాలపై ఏర్పడిన అల్పపీడనం అదే ప్రాంతంలో కొనసాగుతోంది. దీనికి సంబంధించిన ఉపరితల ఆవర్తనం సగటు సముద్ర మట్టానికి 5.8 కిలోమీటర్ల ఎత్తు వరకు విస్తరించి ఉంది. ఇది పశ్చిమ-వాయువ్య దిశగా కదులుతూ ఆగ్నేయ బంగాళాఖాతం, అండమాన్ - నికోబార్ దీవులు మరియు అండమాన్ సముద్ర ఆనుకోని ప్రాంతాలలో అల్పపీడనంగా మరింత బలపడే అవకాశం ఉంది.

ఆ తర్వాత రాబోయే రోజుల్లో పశ్చిమ-వాయువ్య దిశగా కదిలి ఆంధ్రప్రదేశ్ తీరం వైపు వచ్చే అవకాశముందని అమరావతి వాతావరణ కేంద్రం తెలిపింది. ప్రస్తుతం ఆంధ్రప్రదేశ్, యానాంలపై దిగువ ట్రోపో ఆవరణంలో నైరుతి గాలులు వీస్తున్నాయి.

ఏపీలో వర్షాలు…

కోస్తాంధ్ర, యానాం ప్రాంతాల్లో రాగల మూడు రోజులు తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు ఒకటి లేదా రెండు చోట్ల కురిసే అవకాశం ఉంది. ఉరుములతో కూడిన మెరుపులు సంభవించే అవకాశం ఉండటంతో పాటు, గంటకు 30 నుండి 40 కిలోమీటర్లు, గరిష్ఠంగా 50 కిలోమీటర్ల వేగంతో బలమైన గాలులు వీచే అవకాశముంది. రాయలసీమ ప్రాంతంలో కూడా ఒకటి రెండు చోట్ల తేలికపాటి నుండి మోస్తరు వర్షాలు, ఈదురుగాలులు వీచే అవకాశం ఉందని అమరావతి కేంద్రం పేర్కొంది.

తెలంగాణకు భారీ వర్ష సూచన…

హైదరాబాద్ వాతావరణ కేంద్రం విడుదల చేసిన ఏడు రోజుల వాతావరణ బులెటిన్ ప్రకారం…. తెలంగాణలో పలు జిల్లాలకు ఎల్లో, ఆరెంజ్ అలర్ట్‌లు జారీ అయ్యాయి.

అక్టోబర్ 30 నుంచి నవంబర్ 2 వరకు చూస్తే…. ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, జనగామ, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్ మల్కాజ్‌గిరి, నాగర్‌కర్నూల్ జిల్లాల్లో అక్కడక్కడ ఉరుములు, మెరుపులు, గంటకు 30-40 కిమీ వేగంతో గాలులతో కూడిన వర్షాలు కురిసే అవకాశం ఉంది.

నవంబర్ 2 నుంచి 3 వరకు చూస్తే…. ఆదిలాబాద్, కొమరం భీమ్ ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, జనగామ, సిద్దిపేట, యాదాద్రి భువనగిరి జిల్లాల్లో అక్కడక్కడ భారీ వర్షాలు కురిసే అవకాశం ఉంది. ఈ ప్రాంతాల్లో గంటకు 40-50 కిమీ వేగంతో బలమైన గాలులు వీచే ప్రమాదం ఉందని వాతావరణ శాఖ హెచ్చరించింది.

నవంబర్ 3 నుంచి 4 వరకు… నిర్మల్, నిజామాబాద్, వికారాబాద్, సంగారెడ్డి, మెదక్, కామారెడ్డి, మహబూబ్‌నగర్ జిల్లాల్లో భారీ వర్షాలు కురిసే అవకాశం ఉంది. ఆ తర్వాత తేలికపాటి నుంచి మోస్తారు వర్షాలు పడే సూచనలున్నాయి.