E-Paper
Agniveer Recruitment Rally : హైదరాబాద్‌లో నవంబర్ 13 నుండి 24 వరకు అగ్నివీర్ రిక్రూట్‌మెంట్ ర్యాలీ
Agniveer Recruitment Rally : తెలంగాణలోని 33 జిల్లాల నుండి అగ్నివీర్ల కోసం నవంబర్ 13 నుండి 24 వరకు హైదరాబాద్ గచ్చిబౌలిలో రిక్రూట్‌మెంట్ ర్యాలీని జరగనుంది. అర్హులైన అభ్యర్థులు ఇందులో పాల్గొనవచ్చు.
Prefer HTon Google
తెలంగాణ రాష్ట్రంలోని నిరుద్యోగ యువతకు భారత సైన్యం గొప్ప అవకాశం కల్పించింది. 2027 రిక్రూట్‌మెంట్ సంవత్సరానికి గాను అగ్నివీర్ పోస్టుల భర్తీకి సంబంధించి భారీ రిక్రూట్‌మెంట్ ర్యాలీని నిర్వహించనున్నట్లు ఆర్మీ రిక్రూటింగ్ ఆఫీస్ సికింద్రాబాద్ ప్రకటించింది.
హైదరాబాద్ గచ్చిబౌలిలోని ప్రసిద్ధ జీఎంసీ బాలయోగి అథ్లెటిక్ స్టేడియం వేదికగా నవంబర్ 13 నుంచి నవంబర్ 24 వరకు ఈ ఎంపిక ప్రక్రియ సాగనుంది. తెలంగాణలోని 33 జిల్లాలకు చెందిన అర్హులైన అభ్యర్థులందరూ ఈ ర్యాలీలో పాల్గొనవచ్చు.
ఈ ర్యాలీ ద్వారా నాలుగు వేర్వేరు విభాగాలలో అభ్యర్థులను ఎంపిక చేస్తారు. అగ్నివీర్ జనరల్ డ్యూటీ, అగ్నివీర్ టెక్నికల్, అగ్నివీర్ ట్రేడ్స్‌మన్ - 10వ తరగతి ఉత్తీర్ణత, అగ్నివీర్ ట్రేడ్స్‌మన్ - 8వ తరగతి ఉత్తీర్ణత పోస్టులు ఉన్నాయి.
అగ్నివీర్ నియామక ర్యాలీకి సంబంధించి ఇప్పటికే ఆన్‌లైన్‌లో అడ్మిట్ కార్డ్ పొందిన అభ్యర్థులు మాత్రమే ఈ ర్యాలీకి హాజరు కావాలి. నియామక నోటిఫికేషన్‌లో పేర్కొన్న విధంగా తమ విద్యార్హత, కుల, నివాస, ఇతర అన్ని రకాల ధ్రువీకరణ పత్రాలను తప్పనిసరిగా వెంట తీసుకురావాలి.
కేటాయించిన తేదీల్లో నిర్ణీత సమయానికి మైదానానికి చేరుకుని రిపోర్ట్ చేయాల్సి ఉంటుంది. భారత సైన్యంలో ఉద్యోగాలు ఇప్పిస్తామంటూ డబ్బులు డిమాండ్ చేసే దళారులు, మధ్యవర్తులు మాటలను నమ్మవద్దని ఆర్మీ అధికారులు యువతను హెచ్చరించారు. ఆర్మీ రిక్రూట్‌మెంట్ ప్రక్రియ పూర్తిగా డిజిటలైజ్డ్, పారదర్శకమైనది, ప్రతిభాధారితమైనది. ఈ ఎంపిక ప్రక్రియలో ఎలాంటి దళారుల ప్రమేయం లేదా సిఫార్సులకు తావు ఉండదని స్పష్టం చేశారు.
ర్యాలీకి సంబంధించిన మరిన్ని వివరాలు, నిబంధనలు, సమాచారం కోసం అభ్యర్థులు అధికారిక వెబ్‌సైట్: www.joinindianarmy.nic.in చూడవచ్చు. ఆర్మీ రిక్రూటింగ్ ఆఫీస్ (ఏఆర్‌ఓ), సికింద్రాబాద్ కార్యాలయాన్ని 040-27740059 ఫోన్ నంబర్‌లో సంప్రదించి సమాచారం తెలుసుకోవచ్చు. దేశసేవ చేయాలనే ఉత్సాహం ఉన్న తెలంగాణ నిరుద్యోగ యువత ఈ అవకాశాన్ని సద్వినియోగం చేసుకోవాలని ఆర్మీ అధికారులు సూచించారు.
