తెలంగాణలో డిలీట్ అయిన ఓటర్ల లిస్ట్ విడుదల.. మీ పేరు ఎలా చెక్ చేయాలి?

తెలంగాణ ఓటర్ల జాబితా నుంచి తొలగించిన ఓటర్ల జాబితాను తెలంగాణ ముఖ్య ఎన్నికల అధికారి(సీఈఓ) సి.సుదర్శన్ రెడ్డి విడుదల చేశారు. ఈ జాబితా ప్రకారం అన్ని జిల్లాల్లోనూ హైదరాబాద్‌లోనే అత్యధిక సంఖ్యలో ఓటర్ల తొలగింపు జరిగినట్లు తెలుస్తోంది.

తెలంగాణ రాష్ట్ర వ్యాప్తంగా ఓటర్ల జాబితా నుండి 73,39,235 ఓట్లను తొలగించినట్లు రాష్ట్ర ప్రధాన ఎన్నికల అధికారి సి.సుదర్శన్ రెడ్డి వెల్లడించారు. తాజా డ్రాఫ్ట్ నోటిఫికేషన్ ప్రకారం రాష్ట్రవ్యాప్తంగా తొలగించిన మొత్తం ఓట్లలో ఒక్క హైదరాబాద్ జిల్లాలోనే అత్యధికంగా 19,41,444 ఓట్లు డిలీట్ అయ్యాయి.

ఓటర్ల తొలగింపు

జూన్ 10, 2026 నాటికి తెలంగాణలో 3,38,26,448 ఓటర్లు ఉండగా, ప్రస్తుతం ప్రచురించిన డ్రాఫ్ట్ జాబితాలో ఆ సంఖ్య 2,64,87,213 కి తగ్గింది. అంటే మొత్తం ఓటర్ల జాబితాలో 21.70 శాతం తగ్గుదల నమోదైంది. ఓట్ల తొలగింపునకు ప్రధాన కారణాలు ఉన్నాయి.

శాశ్వతంగా వేరే ప్రాంతాలకు వెళ్లినవారు 45,18,963, అడ్రస్ లేనివారు / కనిపించకుండా పోయినవారు 11,25,546, మరణించిన ఓటర్లు 9,22,229, ఇతర నియోజకవర్గాల్లో నమోదు 6,70,203, ఇతర కారణాలతో 1,02,294 మందివి తొలగించారు.

అత్యధికంగా హైదరాబాద్‌లో 19,41,444 ఓట్లు తొలగించారు. రంగారెడ్డి రెండో స్థానంలో 12,87,091 ఓట్లు డిలీట్ అయ్యాయి. మేడ్చల్-మల్కాజ్‌గిరిలో 10,71,566 ఓట్లు తొలగించారు. యాదాద్రి-భువనగిరిలో అత్యల్పంగా కేవలం 26,121 ఓట్లు మాత్రమే తొలగించారు.

హైదరాబాద్ జూబ్లీహిల్స్ నియోజకవర్గంలో అత్యధికంగా 1,79,510 ఓట్లు తొలగించగా, యాకుత్‌పురాలో 1,54,982 ఓట్లు తొలగించారు. అత్యల్పంగా ఛార్మినార్ నియోజకవర్గంలో 94,174 ఓట్లు డిలీట్ అయ్యాయి. శాతాల వారీగా చూస్తే ముషీరాబాద్‌లో అత్యధికంగా 45.17 శాతం, మలక్‌పేటలో 44.76 శాతం ఓట్లు తొలగిపోగా, బహదూర్‌పురాలో అత్యల్పంగా 34.57 శాతం తొలగింపు నమోదైంది.

జిల్లాల వారీగా డిలీట్ అయిన ఓట్లు?

కుమరం భీమ్ ఆసిఫాబాద్-48,139, మంచిర్యాల-1,14,468, ఆదిలాబాద్- 63,159, నిర్మల్-1,13,170, నిజామాబాద్-2,11,670, కామారెడ్డి-84,268, జగిత్యాల-74,738, పెద్దపల్లి-81,139, కరీంనగర్- 1,77,102, రాజన్న సిరిసిల్ల-58,567, సంగారెడ్డి-2,98,278, మెదక్-42,936, సిద్దిపేట-1,18,786, రంగారెడ్డి- 12,87,091, వికారాబాద్-2,10,297, మేడ్చల్ మల్కాజ్‌గిరి-10,71,566, హైదరాబాద్-19,41,444, మహబూబ్‌నగర్-1,03,086, నాగర్‌కర్నూల్-1,13,040, వనపర్తి-38,564, జోగులాంబ గద్వాల్-63,925, నల్గొండ-1,58,635, సూర్యాపేట-96,307, యాదాద్రి భువనగిరి-26,121, జనగామ-63,891, మహబూబాబాద్-47,979, వరంగల్-98,413, హనుమకొండ-1,01,697, జయశంకర్ భూపాలపల్లి-35,918, భద్రాద్రి కొత్తగూడెం-1,32,785, ఖమ్మం-1,57,854, ములుగు-27,842, నారాయణపేట-76,360.

తొలగించిన ఓటర్ల వివరాల జాబితాను తెలంగాణ సీఈఓ (CEO) అధికారిక వెబ్‌సైట్‌లో చూడవచ్చు. ప్రస్తుతం అభ్యంతరాలు, క్లెయిమ్‌ల (Claims and objections) సమయం నడుస్తున్నందున, పొరపాటున ఓటు కోల్పోయిన అర్హులైన పౌరులు 'ఫారమ్ 6' (FORM 6) సమర్పించి తమ ఓటును తిరిగి నమోదు చేసుకోవచ్చని అధికారులు తెలిపారు.

ఈ లింక్ క్లిక్ చేసి డిలీట్ అయిన వారి వివరాలు చూసుకోవచ్చు.