తెలంగాణ కేబినెట్ విస్తరణ - మంత్రిగా అజారుద్దీన్ ప్రమాణస్వీకారం

తెలంగాణ కేబినెట్ విస్తరణ జరిగింది. ఇందులో భాగంగా మాజీ క్రికెటర్ అజారుద్దీన్ మంత్రిగా ప్రమాణస్వీకారం చేశారు. ఆయనతో గవర్నర్ ప్రమాణం చేయించారు.

తెలంగాణ కేబినెట్ విస్తరణ జరిగింది. శుక్రవారం మధ్యాహ్నం 12 తర్వాత రాజ్ భవన్ లో మాజీ క్రికెటర్ అజారుద్దీన్ మంత్రిగా ప్రమాణస్వీకారం చేశారు. ఆయనతో గవర్నర్ ప్రమాణం చేయించారు. ఈ కార్యక్రమానికి సీఎం రేవంత్ రెడ్డితో పాటు పలువురు మంత్రులు హాజరయ్యారు.

మంత్రిగా అజారుద్దీన్ ప్రమాణస్వీకారం

ఏ శాఖ…?

మంత్రిగా ప్రమాణస్వీకారం చేసిన అజారుద్దీన్ కు ఏ శాఖ కేటాయిస్తారనేది ఆసక్తిరంగా మారింది. మైనార్టీ వ్యవహారాల శాఖ మంత్రిగా అవకాశం కల్పిస్తారని తెలుస్తోంది. అయితే అలా కాకుండా మరేదైనా కీలక శాఖ కూడా అప్పగించే అవకాశం ఉందన్న చర్చ కూడా వినిపించింది. గత బీఆర్ఎస్ ప్రభుత్వ హయాంలో మహముద్ అలీ హోంశాఖ మంత్రిగా పని చేసిన సంగతి తెలిసిందే.

అజారుద్దీన్ ప్రమాణస్వీకారంతో ప్రస్తుత కేబినెట్లో ముఖ్యమంత్రి రేవంత్ రెడ్డితో సహా 16 మంది సభ్యులు ఉన్నారు. నిబంధనల ప్రకారం మంత్రివర్గంలో మరో ఇద్దరు సభ్యులకు ఇంకా అవకాశం ఉంది.

ఇక రాష్ట్రంలో జూబ్లీహిల్స్ ఉపఎన్నిక జరుగుతోంది. ఇక్కడ భారీ సంఖ్యలో ముస్లిం ఓటర్లు ఉన్నారు. వీరి ఓట్ల ఆధారంగా గెలుపోటములు డిసైడ్ అయ్యే అవకాశం స్పష్టంగా ఉంది. అయితే ఇక్కడ గెలవటం అధికార కాంగ్రెస్ కు అతిపెద్ద సవాల్ గా మారింది. పైగా బీసీ సామాజికవర్గానికి చెందిన వ్యక్తికి టికెట్ ఇచ్చింది. దీంతో ముస్లింల ఓట్లు ఏటువైపు ఉంటాయన్న ఆందోళన కూడా ఉంది. అయితే అజారుదీన్ కు కేబినెట్ లోకి తీసుకోవటం వల్ల పార్టీకి లాభం చేకూరవచ్చన్న అభిప్రాయాలు కూడా వ్యక్తమవుతున్నాయి.

ఇక అజారుద్దీన్ పేరును కాంగ్రెస్ పార్టీ మరో కోణంలో కూడా ఎంపిక చేసిందన్న చర్చ కూడా వినిపిస్తోంది. బీహార్ ఎన్నికల వేళ ఈ నిర్ణయం కలిసిరావొచ్చని కూడా అంచనా వేసినట్లు తెలుస్తోంది.

గత ఆగస్టులో తెలంగాణ ప్రభుత్వం గవర్నర్ కోటా కింద అజారుద్దీన్ ను శాసనమండలి (ఎమ్మెల్సీ) సభ్యుడిగా నామినేట్ చేసింది. అయితే గవర్నర్ జిష్ణు దేవ్ వర్మ ఇంకా ఈ నియామకానికి గ్రీన్ సిగ్నల్ ఇవ్వలేదు.

2023 ఎన్నికల్లో జూబ్లీహిల్స్ అసెంబ్లీ సెగ్మెంట్ నుంచే అజారుద్దీన్ పోటీ చేసి ఓటమి పాలయ్యారు. ప్రస్తుతం జరుగుతున్న జూబ్లీహిల్స్ ఉపఎన్నికలో కూడా ఆయన టికెట్ ఆశించారు. కానీ చివరికి నవీన్ యాదవ్ కు టికెట్ ఖరారైంది. అయితే ఆయనకు కేబినెట్ చోటు కల్పించటంపై హామీ ఇవ్వటంతో… వెనక్కి తగ్గారనే చర్చ కూడా వినిపించింది.