నల్సార్ స్నాతకోత్సవానికి సీజేఐ వద్దంటూ విద్యార్థుల అభ్యంతరం

హైదరాబాద్‌ 'నల్సార్' స్నాతకోత్సవానికి భారత ప్రధాన న్యాయమూర్తి జస్టిస్ సూర్యకాంత్‌ను ముఖ్య అతిథిగా ఆహ్వానించడంపై విద్యార్థులు తీవ్ర అభ్యంతరం వ్యక్తం చేశారు. ఢిల్లీలో విద్యార్థులపై జరిగిన పోలీసుల దౌర్జన్యంపై దాఖలైన పిటిషన్‌ను విచారించేందుకు సీజేఐ ధర్మాసనం నిరాకరించడమే ఇందుకు కారణమని స్పష్టం చేశారు.

హైదరాబాద్‌లోని నేషనల్ అకాడమీ ఆఫ్ లీగల్ స్టడీస్ అండ్ రీసెర్చ్ (నల్సార్) లా విశ్వవిద్యాలయంలో రాబోయే స్నాతకోత్సవ ఆహ్వానం తీవ్ర చర్చనీయాంశమైంది. తమ వార్షిక స్నాతకోత్సవానికి భారత ప్రధాన న్యాయమూర్తి (సీజేఐ) జస్టిస్ సూర్యకాంత్‌ను ముఖ్య అతిథిగా పిలవడాన్ని గ్రాడ్యుయేషన్ పూర్తి చేసుకుంటున్న విద్యార్థుల బృందం బహిరంగంగా వ్యతిరేకించింది. ఈ నిర్ణయాన్ని పునఃపరిశీలించాలని కోరుతూ విశ్వవిద్యాలయ నిర్వహణ మండలికి ఒక ఈ-మెయిల్ ద్వారా తమ నిరసనను తెలియజేశారు.

నల్సార్ స్నాతకోత్సవానికి సీజేఐ వద్దంటూ విద్యార్థుల అభ్యంతరం

నిరసనకు కారణాలు ఇవే

జూలై 20న న్యూఢిల్లీలోని జంతర్ మంతర్ వద్ద కేంద్ర విద్యాశాఖ మంత్రి ధర్మేంద్ర ప్రధాన్ రాజీనామాను డిమాండ్ చేస్తూ 'కాక్రోచ్ జనతా పార్టీ' ఆధ్వర్యంలో 'ఛలో సన్సద్' ప్రదర్శన జరిగింది. ఈ ప్రదర్శనపై ఢిల్లీ పోలీసులు, ర్యాపిడ్ యాక్షన్ ఫోర్స్ (ఆర్‌ఏఎఫ్), సీఆర్‌పీఎఫ్ బలగాలు ఉక్కుపాదం మోపాయి. ఆందోళనకారులను చెదరగొట్టడానికి భాష్ప వాయుగోళాలు, లాఠీఛార్జ్, ఎలక్ట్రిక్ బ్యాటన్లు, పెల్లెట్ తుపాకులను సైతం ప్రయోగించడంతో పలువురు విద్యార్థులు గాయపడ్డారు.

ఈ నేపథ్యంలో పోలీసుల దౌర్జన్యాన్ని సవాలు చేస్తూ దాఖలైన పిటిషన్‌ను విచారించేందుకు జూలై 22న సీజేఐ జస్టిస్ సూర్యకాంత్ నేతృత్వంలోని సుప్రీంకోర్టు ధర్మాసనం నిరాకరించింది. పోలీసులు జరిపిన దాడికి సంబంధించిన వీడియో ఆధారాలను కోర్టుకు చూపించేందుకు న్యాయవాదులు ప్రయత్నించినప్పటికీ, సీజేఐ దానిని తోసిపుచ్చారు. "మాకు వీడియోలు చూడటంలో ఆసక్తి లేదు, వాటిని చూసే సమయం కూడా లేదు" అని సీజేఐ వ్యాఖ్యానించారు.

రాజ్యాంగ విలువలపై విద్యార్థుల ప్రశ్నాస్త్రం

స్నాతకోత్సవ ఆహ్వానాన్ని వ్యతిరేకిస్తూ నల్సార్ యాజమాన్యానికి పంపిన లేఖలో విద్యార్థులు తమ ఆవేదనను స్పష్టంగా వ్యక్తపరిచారు.

"చట్టాన్ని అభ్యసిస్తున్న విద్యార్థులుగా రాజ్యాంగ హక్కులు, న్యాయం పొందడం, బాధిత వ్యక్తుల విన్నపాలను ఆలకించడం వంటి సూత్రాలు మాకు అత్యంత ముఖ్యం. విశ్వవిద్యాలయం ఎంచుకునే ముఖ్య అతిథిలో ఈ విలువలు ప్రతిబింబించాలి. నిరసనకారులపై పోలీసుల దౌర్జన్యాన్ని తీవ్రంగా పరిగణించని వ్యక్తి చేతుల మీదుగా పట్టాలు తీసుకోవడం, నల్సార్‌లో మేం నేర్చుకున్న సూత్రాలకు భిన్నంగా ఉంది" అని విద్యార్థులు ఆ లేఖలో పేర్కొన్నట్లు పీటీఐ (PTI) తెలిపింది.

వర్సిటీ యాజమాన్యం నుంచి రాని స్పందన

స్నాతకోత్సవానికి తగినంత సమయం ఉన్నందున యాజమాన్యం తమ నిర్ణయాన్ని మార్చుకోవాలని విద్యార్థులు కోరారు. అయితే, విద్యార్థుల ఈ-మెయిల్‌పై నల్సార్ విశ్వవిద్యాలయ యజమాన్యం నుంచి ఇప్పటివరకు ఎలాంటి అధికారిక స్పందనా రాలేదని పీటీఐ నివేదించింది.