E-Paper
Hyderabad : రూ. 6 లక్షలకు డీల్... 3 లక్షలు లంచం తీసుకుంటూ ఏసీబీకి దొరికిపోయిన సీఐ!
Mirchowk Inspector Bribe Case : రూ. 3 లక్షలు తీసుకుంటూ మీర్‌చౌక్ పోలీసు స్టేషన్ సీఐ కొండల్ రావు ఏసీబీకి చిక్కారు. ఇదే కేసులో హోంగార్డ్ ఆబిద్ అలీల్ ను కూడా అరెస్ట్ చేశారు. ఈ మేరకు అన్ని కోణాల్లో కేసును దర్యాప్తు చేస్తున్నారు.
Prefer HTon Google
హైదరాబాద్ నగరంలోని మీర్‌చౌక్ పోలీసు స్టేషన్‌లో లంచావతారం ఎత్తిన ఇన్‌స్పెక్టర్ ఆఫ్ పోలీస్ (సీఐ)… ఏసీబీకి రెడ్ హ్యాండెడ్ గా చిక్కాడు. ఓ కేసు నుంచి ఉపశమనం కల్పించేందుకు ఏకంగా లక్షల్లో లంచం డిమాండ్ చేసి…. ఆ మొత్తాన్ని స్వీకరిస్తుండగా పట్టుబడ్డాడు.
రూ. 6 లక్షలకు డీల్..
ఇందుకు సంబంధించిన వివరాల ప్రకారం…. మీర్‌చౌక్ పోలీసు స్టేషన్ పరిధిలోని ఓ ఫిర్యాదుదారుడి తండ్రిపై నమోదైన కేసును క్లోజ్ చేయడానికి, అతనిపై ఎలాంటి కఠిన చర్యలు తీసుకోకుండా ఉండటానికి, భవిష్యత్తులో పోలీసు సాయం అందించడానికి సీఐ ఎం. కొండల్ రావు రూ. 6 లక్షల లంచం డిమాండ్ చేశారు. ఈ క్రమంలోనే…. మొదటి విడతగా రూ. 3 లక్షల లంచం మొత్తాన్ని పోలీసు స్టేషన్ పరిధిలోని హోంగార్డ్ ఆబిద్ అలీ ద్వారా స్వీకరించేందుకు నిర్ణయించారు.
బాధితుడు ఈ వ్యవహారంపై అవినీతి నిరోధక శాఖ అధికారులను ఆశ్రయించడంతో ఏసీబీ సిటీ రేంజ్-1 బృందం పక్కా వ్యూహంతో దాడి నిర్వహించింది. ఫిర్యాదుదారుడి నుంచి హోంగార్డ్ ఆబిద్ అలీ రూ. 3 లక్షల లంచం నగదు తీసుకుంటుండగా అధికారులు పట్టుకున్నారు. హోంగార్డ్ స్వాధీనం నుంచి ఆ లంచం సొమ్మును స్వాధీనం చేసుకున్నారు.
సీఐ కొండల్ రావు, హోంగార్డ్ ఆబిద్ అలీపై కేసు నమోదు చేశారు. నాంపల్లిలోని ఏసీబీ కోర్టులో హాజరుపరిచి జుడీషియల్ రిమాండ్‌కు తరలిస్తున్నట్లు ఏసీబీ వెల్లడించింది. భద్రతా కారణాల దృష్ట్యా ఫిర్యాదుదారు వివరాలను రహస్యంగా ఉంచినట్లు తెలిపారు. ఈ కేసుకు సంబంధించి మరిన్ని కోణాల్లో సమగ్ర విచారణ కొనసాగుతోంది.
ప్రభుత్వ అధికారులు లేదా సిబ్బంది ఎవరైనా అధికారిక పనుల కోసం లంచం డిమాండ్ చేస్తే వెనుకాడకుండా తమకు ఫిర్యాదు చేయవచ్చని ఏసీబీ ప్రజలను కోరింది. బాధితులు ఏసీబీ టోల్ ఫ్రీ నంబర్ 1064 లేదా వాట్సాప్ నంబర్ 9440446106 ద్వారా సంప్రదించవచ్చని పేర్కొంది.
